ବିଷମକଟକ/ମୁନିଗୁଡ଼ା,୨୬।୧୧(ଡି.ଏନ୍.ଏ.): ଭାରତୀୟ ସମାଜବାଦୀ ପାର୍ଟି(ବିଏସ୍ପି) ରାୟଗଡ଼ା ଜିଲା ସଭାପତି ତଥା ଆଦିବାସୀ ନେତା ଜିତୁ ଜାକାସିକାଙ୍କୁ ଟାର୍ଗେଟକରି ବିଷମକଟକ, ମୁନିଗୁଡ଼ା ଏବଂ ଅମ୍ବାଦଳା ଥାନା ଅନ୍ତର୍ଗତ ବିଭିନ୍ନ ସ୍ଥାନରେ ପୋଷ୍ଟର ଲଗାଯାଇଛି। ବିଷମକଟକ ବ୍ଲକ କାର୍ଯ୍ୟାଳୟ କାନ୍ଥ, ମୁନିଗୁଡ଼ା ଥାନା ଅଧୀନ ମୁନିଖୋଲ ପଞ୍ଚାୟତ କାର୍ଯାଳୟ କାନ୍ଥ ଏବଂ ଅମ୍ବାଦଳା ଥାନା ଅଧୀନ ହାଟଦହିଖାଲ ଛକରେ ଏହି ପୋଷ୍ଟର ଲାଗିଥିବା ଦୃଷ୍ଟିକୁ ଆସିଛି।
ବିଏସ୍ପି ନେତା ଜିତୁ ଜାକାକା କିଏ, ସେ କାହିଁକି ନିଜ ନାମକୁ ଜିତୁ ଜାକାସିକା ଲେଖୁଛନ୍ତି। ରାୟଗଡ଼ା ଜିଲା ସଦର ବ୍ଲକ ହାଲୁଆ ଗ୍ରାମର ଇନ୍ଦ୍ର ଜାକାକାଙ୍କ ପୁଅ ଜିତେନ୍ଦ୍ର ଜାକାକା ହୋଇଥିବା ବେଳେ ସେ ନିଜ ନାମ ଜିତୁ ଜାକାସିକା କହି ଡଙ୍ଗରିଆଙ୍କ ନଁାରେ ସମସ୍ତଙ୍କୁ ଲୁଟୁଛି ବୋଲି ପୋଷ୍ଟରରେ ଉଲ୍ଲେଖ ରହିଛି। ଜିତେନ୍ଦ୍ର ଜକାକା ଡଙ୍ଗରିଆ ସମ୍ପ୍ରଦାୟର ନ ହୋଇ ମଧ୍ୟ ନିଜକୁ ଡଙ୍ଗରିଆ ଭାବରେ ପରିଚୟ ଦେଉଛନ୍ତି। ଫେସ୍ବୁକ୍ରେ ଜିତୁ ଜାକାସିକା ନାମରେ ଲୋକଙ୍କୁ ଭୁଆଁ ବୁଲାଉଛନ୍ତି। ତାଙ୍କ ବ୍ୟାଙ୍କ ଆକାଉଣ୍ଟ, ସରକାରୀ ଫାଇଲରେ ଜିତେନ୍ଦ୍ର ଜାକାକା ନାମ ରହିଛି। ଜିତେନ୍ଦ୍ର ଜାକାକା ଓରଫ ଜିତୁ ଜାକାସିକା ନିୟମଗିରିର ସରଳ ଡଙ୍ଗରିଆଙ୍କୁ ଧର୍ମ ପରିବର୍ତ୍ତନ କରିବାକୁ ପ୍ରବର୍ତ୍ତାଉଛି ବୋଲି ଏଥିରେ ଉଲ୍ଲେଖ ରହିଛି। ଆଦିବାସୀଙ୍କ ନଁାରେ ଠିକାଦାର, ସରକାରୀ ଅଧିକାରୀ ଓ ବେପାରୀ ମାନଙ୍କୁ ବ୍ଲାକ୍ମେଲ କରି ଟଙ୍କା ଲୁଟୁଛନ୍ତି। ଏହାର ହିସାବ ପ୍ରଜାକୋର୍ଟରେ ହେବ ବୋଲି ମଧ୍ୟ ପୋଷ୍ଟରରେ ଲେଖାଯାଇଛି। ସାଦା କାଗଜରେ ଲାଲ୍ ସଲାମ ଲେଖି ବିଏସ୍ପି ନେତାଙ୍କୁ ଟାର୍ଗେଟ କରାଯାଇଥିବାବେଳେ ଏହି ହାତଲେଖା ପୋଷ୍ଟର ମାଓବାଦୀ ଲଗାଇଛନ୍ତି ନା ଆଉ କିଏ ତାହା ଅସ୍ପଷ୍ଟ ରହିଛି। ଅନ୍ୟପକ୍ଷରେ ପୋଷ୍ଟର ବିଷୟରେ ବିଏସ୍ପି ଜିଲା ସଭାପତି ଜିତୁ ଜାକାସିକାଙ୍କୁ ପଚାରିବାରୁ ସେ କହିଛନ୍ତି, ଏହା ମାଓବାଦୀଙ୍କ ପୋଷ୍ଟର ନୁହେଁ। ବିଏସ୍ପିର ଲୋକପ୍ରିୟତା ଯୋଗୁ କେତେଜଣ କୁଚକ୍ରୀ ଏଭଳି କାର୍ଯ୍ୟ କରିଛନ୍ତି ବୋଲି ସେ ଅଭିଯୋଗ କରିଛନ୍ତି। ସେହିପରି ଏଭଳି ପୋଷ୍ଟର ମାଧ୍ୟମରେ ଅପପ୍ରଚାର କରି ଦଳର କର୍ମକର୍ତ୍ତାଙ୍କୁ ଅପମାନିତ କରାଯାଇଛି ବୋଲି ବିଏସ୍ପି ପକ୍ଷରୁ ମୁନିଗୁଡ଼ା ଥାନାରେ ଏତଲା ଦିଆଯାଇଛି। ତଦନ୍ତକରି ପୋଷ୍ଟର ଲଗାଇଥିବା ଲୋକଙ୍କୁ ଗିରଫ କରା ନ ଗଲେ ଥାନା ପରିସରରେ ଶାନ୍ତିପୂର୍ଣ୍ଣ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି। ପୋଲିସ ପୋଷ୍ଟରଗୁଡ଼ିକୁ ଜବତକରି ତଦନ୍ତ ଚଳାଇଥିବା ବିଷମକଟକ ଏସ୍ଡିପିଓ ଆକାଶ ଚନ୍ଦ୍ର ସାହୁ ପ୍ରକାଶ କରିଛନ୍ତି।
ଫଟୋ-ଜବତ କରାଯାଇଥିବା ପୋଷ୍ଟର।