ହାଇଦ୍ରାବାଦ,୧।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ତେଲଙ୍ଗାନା ଗସ୍ତ କରିବାକୁ ଯାଉଛନ୍ତି, କିନ୍ତୁ ଏହାପୂର୍ବରୁ ଭାରତ ରାଷ୍ଟ୍ର ସମିତି (ବିଆର୍ଏସ୍) ଏବଂ ଭାରତୀୟ ଜନତା ପାର୍ଟି (ଭାଜପା) ମଧ୍ୟରେ ପୋଷ୍ଟର ଓ୍ବାର ଆରମ୍ଭ ହୋଇଛି। ପୋଷ୍ଟର ମାଧ୍ୟମରେ ଉଭୟ ଦଳ ପରସ୍ପରକୁ ଟାର୍ଗେଟ କରିଛନ୍ତି।
ଶାସକ ବିଆରଏସ ଗତ ୧୦ବର୍ଷ ମଧ୍ୟରେ ତେଲଙ୍ଗାନାକୁ ଦେଇଥିବା ପ୍ରତିଶ୍ରୁତି ପୂରଣ ନ କରିବାରୁ ପ୍ରଧାନମନ୍ତ୍ରୀ ମୋଦିଙ୍କୁ ପ୍ରଶ୍ନ କରୁଥିବା ପୋଷ୍ଟର ଲଗାଇଛନ୍ତି। ଏଥି ସହ ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓଙ୍କୁ ସମାଲୋଚନା କରି ଭାଜପା ଏହାର ପ୍ରତିଶୋଧ ନେଇଛି। ଚନ୍ଦ୍ରଶେଖର ରାଓଙ୍କୁ ପ୍ରତି ୫ବର୍ଷରେ ତେଲଙ୍ଗାନାର ସବୁଠାରୁ ବଡ ବିଧାୟକ କ୍ରେତା ଭାବରେ ବର୍ଣ୍ଣନା କରାଯାଇଛି।
ବିଆରଏସ କର୍ମୀମାନେ ଶମଶାବାଦ ବିମାନବନ୍ଦର ନିକଟରେ ଅନେକ ପୋଷ୍ଟର ଲଗାଇଛନ୍ତି। ଏହିଠାରେ ପ୍ରଧାନମନ୍ତ୍ରୀ ମୋଦି ମହବୁବଗର ଯିବା ପୂର୍ବରୁ ଅବତରଣ କରିବେ। ବିଆରଏସ ସମର୍ଥକଙ୍କ ଦ୍ୱାରା ଲଗା ହୋଇଥିବା ଗୋଟିଏ ପୋଷ୍ଟରରେ ଲେଖା ଅଛି – ମୋଦି ଜୀଙ୍କୁ ସ୍ବାଗତ। ପାଲାମୁରୁ-ରଙ୍ଗାରେଡି ପ୍ରକଳ୍ପକୁ ଜାତୀୟ ମାନ୍ୟତା ଦେବାର ପ୍ରତିଜ୍ଞା ସହିତ କ’ଣ ହେଲା ବୋଲି ପ୍ରଶ୍ନ କରାଯାଇଛି।
ଅନ୍ୟ ଏକ ପୋଷ୍ଟରେ କୁହାଯାଇଛି – ସାବତ ମା’ ଆଚରଣ । ମହବୁବନଗର ଯିବାକୁ ମୋଦିଙ୍କର କୌଣସି ନୈତିକ ଅଧିକାର ନାହିଁ। ଦ୍ୱିତୀୟ ପୋଷ୍ଟରରେ ତେଲଙ୍ଗାନାବାସୀଙ୍କୁ ପ୍ରଧାନମନ୍ତ୍ରୀଙ୍କ ଦେଇଥିବା ପ୍ରତିଶ୍ରୁତି ଉପରେ ଆଲୋକପାତ କରାଯାଇଛି। ଏଥି ମଧ୍ୟରେ ଆଇଟିଆଇଆର, ଟେକ୍ସଟାଇଲ ପାର୍କ, ଡିଫେନ୍ସ କରିଡର, କାଜିପେଟ କୋଚ କାରଖାନା, ମିଶନ ଭଗୀରଥ ପାଣ୍ଠି, ବାୟାରାମ ଷ୍ଟିଲ ପ୍ଲାଣ୍ଟ, ହଲଦି ବୋର୍ଡ, ମେଡିକାଲ କଲେଜ ଏବଂ ଆଇଆଇଏମ ଅନ୍ତର୍ଭୁକ୍ତ।