ଭୁବନେଶ୍ୱର, ୨୦।୧୦(ବ୍ୟୁରୋ): ଶିକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ସାଇ ଇଣ୍ଟରନ୍ୟାଶନାଲ ସ୍କୁଲର ପ୍ରତିଷ୍ଠାତା ସ୍ବର୍ଗତ ଡ. ବିଜୟ କୁମାର ସାହୁଙ୍କୁ ଏଜୁକେଶନ୍ ୱାର୍ଲଡ ଇଣ୍ଡିଆ ତରଫରୁ ମରଣୋତ୍ତର ‘ଲାଇଫ୍ ଟାଇମ୍ ଆଚିଭ୍ମେଣ୍ଟ ଆୱାର୍ଡ’ପ୍ରଦାନ କରାଯାଇଛି। ସାଇ ଇଣ୍ଟରନ୍ୟାଶନାଲ ତରଫରୁ ଡ. ସାହୁଙ୍କ ପୁତ୍ର ବିକ୍ରମ ଆଦିତ୍ୟ ସାହୁ ଏହି ପୁରସ୍କାର ଗ୍ରହଣ କରିଛନ୍ତି। ଓଡ଼ିଶା ତଥା ସାରା ଭାରତରେ କେ-୧୨ ଶିକ୍ଷାର ଅଭିବୃଦ୍ଧି, ଭିତ୍ତିଭୂମିର ବିକାଶ, ନୂତନ ଉଦ୍ଭାବନ, ଟେକ୍ନୋଲୋଜି ସହାୟତାରେ ଅନ୍ତର୍ଜାତୀୟ ମାନର ଶିକ୍ଷାପ୍ରଦାନ, ୨ଲକ୍ଷରୁ ଅଧିକ ଛାତ୍ରୀଛାତ୍ରଙ୍କୁ ଦକ୍ଷ ଲିଡର ଭାବେ ଗଢ଼ି ତୋଳିବା ଏବଂ ଓଡ଼ିଶାକୁ ଶିକ୍ଷା କ୍ଷେତ୍ରରେ ଅନ୍ତର୍ଜାତୀୟ ସ୍ତରରେ ପରିଚିତ କରାଇବା ପାଇଁ ଏହି ମର୍ଯ୍ୟାଦାଜନକ ପୁରସ୍କାର ମିଳିଛି।
ପୁରସ୍କାର ଗ୍ରହଣ ଅବସରରେ ବିକ୍ରମ ଆଦିତ୍ୟ କହିଛନ୍ତି, ଏହି ପୁରସ୍କାର ପାଇଁ ସମସ୍ତ ସାଇ ଇଣ୍ଟରନ୍ୟାଶନାଲ ପରିବାର ଗର୍ବିତ। ଡ. ସାହୁଙ୍କ ନୀତି ଓ ଆଦର୍ଶକୁ ଅନୁସରଣ କରି ଛାତ୍ରୀଛାତ୍ରଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରିବା ପାଇଁ ସାଇ ଇଣ୍ଟରନ୍ୟାଶନାଲ ପ୍ରତିଶ୍ରୁତିବଦ୍ଧ। ସ୍ବର୍ଗତ ବିଜୟ ସାହୁ ଜଣେ ଦୂରଦୃଷ୍ଟି ସମ୍ପନ୍ନ ବ୍ୟକ୍ତି ଥିଲେ। ସେ ସାଇ ଇଣ୍ଟରନ୍ୟାଶନାଲ ସ୍କୁଲ, ସାଇ ଆଙ୍ଗନ, ସାଇ ଇଣ୍ଟରନ୍ୟାଶନାଲ ରେସିଡେନ୍ସିଆଲ ପରି ତିନୋଟି ଉନ୍ନତମାନର ବିଦ୍ୟାଳୟ ପ୍ରତିଷ୍ଠା କରିଥିଲେ। ସେହିପରି ସେ ଆଦର୍ଶ ବିଦ୍ୟାଳୟ ସଙ୍ଗଠନର ଉପଦେଷ୍ଟା ଭାବେ କାର୍ଯ୍ୟକରି ଆଦର୍ଶ ବିଦ୍ୟାଳୟ ଶିକ୍ଷାକ୍ଷେତ୍ରରେ ଅନେକ ପରିବର୍ତ୍ତନ ଆଣିଥିଲେ। ୨୦୨୧ରେ ତାଙ୍କୁ ଡକ୍ଟରେଟ୍ ସମ୍ମାନ ଉପରାଷ୍ଟ୍ରପତିଙ୍କ ଦ୍ୱାରା ପ୍ରଦାନ କରାଯାଇଥିଲା। ଶିକ୍ଷା ମାଧ୍ୟମରେ ଉନ୍ନତ ଦେଶ ଗଠନ କରିବା ବିଷୟବସ୍ତୁକୁ ନେଇ ବିଜୟ ସାହୁଙ୍କ ଜୀବନୀ ଉପରେ ଆଇଆଇଏମ୍ କୋଲକାତା ଦ୍ୱାରା ଏକ କେସ୍ ଷ୍ଟଡି ପ୍ରକାଶିତ କରାଯାଇଛି। ସାଇ ଇଣ୍ଟରନ୍ୟାଶନାଲ୍ ସ୍କୁଲ୍ ୨୦୨୨-୨୩ ବର୍ଷ ପାଇଁ ଦେଶର ଏକ ନମ୍ବର ସ୍କୁଲର ମାନ୍ୟତା ପାଇଥିବାବେଳେ ଆବାସିକ ଶିକ୍ଷା କ୍ଷେତ୍ରରେ ସାଇ ଇଣ୍ଟରନ୍ୟାଶନାଲ୍ ରେସିଡେନ୍ନ୍ସିଆଲ ସ୍କୁଲ ରାଜ୍ୟରେ ଶ୍ରେଷ୍ଠ ସ୍କୁଲର ମାନ୍ୟତା ପାଇଛି। ସ୍ବର୍ଗତ ବିଜୟ କୁମାର ସାହୁ ଓଡ଼ିଶାର ସ୍କୁଲ ଶିକ୍ଷାକୁ ଅନ୍ତର୍ଜାତୀୟ ସ୍ତରରେ ପହଞ୍ଚାଇବାର ଯେଉଁ ସ୍ବପ୍ନ ଦେଖିଥିଲେ ତାହା ଆଜି ସଫଳତାର ଶିଖର ଛୁଇଁପାରିଛି ଏବଂ ଆଗାମୀ ଦିନରେ ଏହା ଜାରି ରହିବ ବୋଲି ସାଇ ଇଣ୍ଟରନ୍ୟାଶନାଲ୍ର ଚେୟାରପର୍ସନ ଡ. ଶିଳ୍ପୀ ସାହୁ କହିଛନ୍ତି।