ମହାକାଳପଡ଼ା, ୨୭ା୧୧(ପ୍ରତାପ ଚନ୍ଦ୍ର ସ୍ବାଇଁ):ରାଜ୍ୟ ସରକାର ଗ୍ରାମାଞ୍ଚଳରେ ଥିବା ଚାଷୀମାନଙ୍କୁ ଆଳୁଚାଷ ନିମନ୍ତେ ପ୍ରୋତ୍ସାହିତ କରୁଛନ୍ତି। ବଜାରରେ ଆଳୁ ସଙ୍କଟ ଥିବା ସମୟରେ ଯେପରି ଚାଷୀଟିଏ ନିଜ ହାତ ପାହାନ୍ତରେ ଆଳୁ ପାଇପାରିବ ସେ ଲକ୍ଷ୍ୟ ନେଇ ସରକାର ଉଦ୍ୟାନ କୃଷି ଯୋଜନାରେ ଆଳୁ ବିହନ ଯୋଗାଇ ଦେବାର ସ୍ବତନ୍ତ୍ର ଭାବେ ବ୍ୟବସ୍ଥା କରିଛନ୍ତି। ଆଳୁଚାଷ ନିମନ୍ତେ ସାର, କୀଟ ନାଶକ, ଯନ୍ତ୍ରପାତି ଆଦି ରିହାତି ଦରରେ ଯୋଗାଇ ଦେଉଛନ୍ତି। ମାତ୍ର ସରକାରଙ୍କ ଜନହିତକାରୀ ଯୋଜନାର ସୁଫଳ ଚାଷୀ ପାଇପାରୁନାହାନ୍ତି। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ଚାଷୀ ଆଳୁଚାଷ କରିବାକୁ ଇଚ୍ଛୁକ ଥିବା ବେଳେ ସେମାନଙ୍କୁ ବିହନ ମିଳୁନାହିଁ, ଫଳରେ ସେମାନେ ବଜାରରୁ ଚଢ଼ା ଦରରେ ବିହନ କିଣି କ୍ଷେତ ପ୍ରସ୍ତୁତି କରି ଲଗାଉଛନ୍ତି। ବିଗତ ବର୍ଷଗୁଡ଼ିକରେ ଓଡ଼ିଶାରେ ଆଳୁ ସଙ୍କଟ ଥିବାରୁ ପଶ୍ଚିମବଙ୍ଗ ଉପରେ ସମ୍ପୂର୍ଣ୍ଣ ନିର୍ଭର କରିବାକୁ ପଡୁଛି। ଚଳିତବର୍ଷ ଖାଉଟିମାନଙ୍କ ହାଣ୍ଡି ଶାଳରେ ଆଳୁ ଉଭାନ ହୋଇଯିବା ଓ ପରେ ପଶ୍ଚିମବଙ୍ଗର ସରକାର ଓଡ଼ିଶାକୁ ଆଳୁ ଯୋଗାଣ ବନ୍ଦ କରିଥିଲେ। ସରକାର ବାଧ୍ୟ ହୋଇ ଖାଉଟିମାନଙ୍କ ଆଳୁ ଆବଶ୍ୟକତା ଦୃଷ୍ଟିରେ ରଖି ଉତ୍ତରପ୍ରଦେଶ, ପଞ୍ଜାବ, ବିହାର ରାଜ୍ୟରୁ ଆମଦାନୀ କରି ସଙ୍କଟ ଦୂର କରିଥିଲେ। ପରେ ପଶ୍ଚିମବଙ୍ଗ ସହିତ ରାଜ୍ୟ ସରକାରଙ୍କ ବୁଝାମଣା ପରେ ଓଡ଼ିଶାକୁ ଆଳୁ ଆସିଥିଲା। ରାଜ୍ୟ ସରକାର କ୍ଷେତରେ ଅମଳ ହୋଇଥିବା ଆଳୁକୁ ଗଚ୍ଛିତ ରଖିବା ପାଇଁ ପ୍ରତି ବ୍ଲକରେ ଶୀତଳଭଣ୍ଡାର ନିର୍ମାଣ କରିବାକୁ ଉଦ୍ୟମ ଆରମ୍ଭ କରିଛନ୍ତି।
ବ୍ଲକର ବରକନ୍ଧା ପଞ୍ଚାୟତର ଗୋଖାଖଟି ଗ୍ରାମର ଆଳୁଚାଷୀ ଅଧିକାରୀ ସ୍ବାଇଁଙ୍କ କହିବା କଥା ବିଭାଗ ପକ୍ଷରୁ ଆଳୁ ବିହନ ମିଳିଲା ନାହିଁ। ଆମେ ବାଧ୍ୟ ହୋଇ ଚଢ଼ା ଦରରେ ଖୋଲା ବଜାରରୁ କିଣି ଚାଷ କରିଛୁ। ପ୍ରକୃତ ଚାଷୀମାନଙ୍କ ନିକଟରେ ଆଳୁ ବିହନ ପହଞ୍ଚତ୍ପାରୁନି ବୋଲି ବହୁଚାଷୀ ଅଭିଯୋଗ କରିଛନ୍ତି। ବ୍ଲକର ୧୨ ପଞ୍ଚାୟତରେ ୨୭୩ ବସ୍ତା ବିହନ (ପ୍ରତି ବସ୍ତା ୫୦ କିଲୋ) ୯୧ ଚାଷୀଙ୍କୁ ଆଳୁ ବିହନ ଯୋଗାଇ ଦିଆଯାଇଛି। ବ୍ଲକର ସୁନିତି, ବଡିଢ଼ି, କେବି ଦାଣ୍ଡୁଆ, ଦେଉଳପଡ଼ା, ରଜଗଡ଼, ବରକନ୍ଧା, କରଞ୍ଜ, ବଡ଼କୂଳ, ଅମେଇପାଳ, ମହାକାଳପଡ଼ା, ରାମନଗର, ଅଳାଇଲୋ ପଞ୍ଚାୟତରେ ଚାଷୀମାନଙ୍କୁ ଯୋଗାଇ ଦିଆଯାଇଛି ବୋଲି ଉଦ୍ୟାନ କୃଷି ବିଭାଗ ପକ୍ଷରୁ ସୂଚନା ମିଳିଛି। ଏ ସଂକ୍ରାନ୍ତରେ ବ୍ଲକ ଉଦ୍ୟାନ କୃଷି ଅଧିକାରୀ ସୌରଭ ମହାପାତ୍ରଙ୍କୁ ପଚାରିବାରେ ପ୍ରଥମ ପର୍ଯ୍ୟାୟରେ ୨୭୩ବସ୍ତା ଆଳୁ ବିହନ ଯୋଗାଣ ହୋଇଛି। ଯାହା ବିହନ ଆସିଥିଲା ଚାଷୀଙ୍କୁ ଯୋଗାଇ ଦେଉଛୁ। ପରେ ୨ ଶହ ବସ୍ତା ଆବଶ୍ୟକତା ରହିଛି। ଦ୍ୱିତୀୟ ପର୍ଯ୍ୟାୟରେ ବିହନ ଆସିଲେ ଚାଷୀଙ୍କୁ ଯୋଗାଇ ଦିଆଯିବ ବୋଲି ସେ କହିଛନ୍ତି।