ଢେଙ୍କାନାଳ ଅଫିସ,୧୨।୯: ଢେଙ୍କାନାଳ ଜିଲାର ବିଭିନ୍ନ ବ୍ଲକର ଶତାଧିକ କୁକୁଡ଼ାଚାଷୀ ସୋମବାର ଟାଉନ ଥାନା ଘେରାଉ କରିଥିଲେ । ଚାଷୀମାନଙ୍କୁ କୁକୁଡ଼ା ଚିଆଁ ଓ ଖାଦ୍ୟ ପ୍ରଦାନ କରୁଥିବା ଏକ ସଂସ୍ଥା ଧମକଚମକ ଦେଉଥିବା ପ୍ରତିବାଦରେ ଏହି ଘେରାଉ ହୋଇଥିଲା। ଏ ସଂକ୍ରାନ୍ତରେ ଚାଷୀମାନଙ୍କ ପକ୍ଷରୁ ସମ୍ପୃକ୍ତ ସଂସ୍ଥା ବିରୋଧରେ ଥାନାରେ ଅଭିଯୋଗ ହୋଇଛି । ଖବର ପାଇ ସଦର ଏସ୍ଡିପିଓ ବିକାଶ ବେଭରା, ଅତିରିକ୍ତ ଥାନା ଅଧିକାରୀ କଳ୍ପନା ବେହେରା ପ୍ରମୁଖ ଘଟଣାସ୍ଥଳରେ ପହଞ୍ଚି ଚାଷୀଙ୍କୁ ବୁଝାଇଥିଲେ। ଏପରିକି ଅଭିଯୋଗକୁ ଭିତ୍ତିକରି ମାମଲା ରୁଜୁହୋଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ପରେ ଘେରାଉ ପ୍ରତ୍ୟାହୃତ ହୋଇଥିଲା।