ଫୁଲନଖରା,୨୩।୯(ଡି.ଏନ୍.ଏ): କଟକ ସଦର ଥାନା ଅଧୀନ କୋରକୋରାଠାରେ ସଦର ବ୍ଲକ କୁକୁଡ଼ା ଚାଷୀଙ୍କ ପକ୍ଷରୁ ଏକ ସାଧାରଣ ସଭା ଅନୁଷ୍ଠିତ ହୋଇଯାଇଛି। ଓଡ଼ିଶା କୁକ୍କୁଟ ମହାସଂଘ ଉପସଭାପତି ନାରାୟଣ ସାହୁଙ୍କ ସଭାପତିତ୍ୱରେ ଆୟୋଜିତ କାର୍ଯ୍ୟକ୍ରମରେ ରାଜ୍ୟ କୁକ୍କୁଟ ମହାସଂଘର ସଭ୍ୟ ରାମଚନ୍ଦ୍ର ରାଉତ, କଟକ ସଦର ବ୍ଲକ ସଭାପତି ଭୁବନାନନ୍ଦ ଦାସ, ଉପସଭାପତି ଅଶୋକ କୁମାର ପତି, ସମ୍ପାଦକ ଅମର ନାୟକ, କୋଷାଧ୍ୟକ୍ଷ ବିଶ୍ବରଞ୍ଜନ ଜେନା, ଜଗତ୍ସିଂହପୁର ଜିଲା ସଭାପତି ରତିକାନ୍ତ ପାଲ ପ୍ରମୁଖ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ଚାଷୀମାନେ ସରକାରଙ୍କ ନିକଟରେ ୧୦ ଦଫା ଦାବି ଉପସ୍ଥାପନ କରିଛନ୍ତି।
ଦାବିଗୁଡିକ ହେଲା ପୁରୁଣା ଗ୍ରୋଇଙ୍ଗ ଚାର୍ଜ ପରିବର୍ତ୍ତନ କରି ସର୍ବନିମ୍ନ କିଗ୍ରା ପ୍ରତି ୧୪ ଟଙ୍କା ବୃଦ୍ଧି, ଏମ୍ଏସ୍ପି ମୂଲ୍ୟ ୮ ଟଙ୍କାକୁ ବୃଦ୍ଧି, ଚଷୁ ଏବଂ ଔଷଧ ଖର୍ଚ୍ଚ କମ୍ପାନୀ ଭରଣ କରିବାକୁ ଦାବି କରାଯାଇଛି। ଏପରି କି ଦାନା ଓ ଉନ୍ନତମାନର କୁକୁଡ଼ା ଛୁଆ ଯୋଗାଇ ଦେବା ସହ କୁକୁଡ଼ା ବିକ୍ରୟର ଶତକଡା ୫୦ ଭାଗ ବୋନସ ଆକାରରେ ଚାଷୀଙ୍କୁ ପ୍ରଦାନ, ସଂଘର ବିନା ନିର୍ଦ୍ଦେଶରେ କୁକୁଡ଼ା ଛୁଆ ଓ ଦାନାର ମୂଲ୍ୟ ବୃଦ୍ଧି ନ କରିବା, କମ୍ପାନୀ ଅଭିଜ୍ଞ ଡାକ୍ତରଙ୍କୁ ନିଯୁକ୍ତି କରି ୨୪ ଘଣ୍ଟିଆ ସେବା ଯୋଗାଇ ଦେବାକୁ ଚାଷୀମାନେ ଦାବି କରିଛନ୍ତି। ସରକାର ଯଦି କୁକୁଡ଼ା ଚାଷୀଙ୍କ କଥା ନ ଶୁଣନ୍ତି ଆଗାମୀ ଦିନରେ ଚାଷୀମାନେ ରାଜରାସ୍ତାକୁ ଓହ୍ଲାଇ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।