ଯାଜପୁର ଅଫିସ,୧୭ା୫
ରାଜ୍ୟରେ ପ୍ରମୁଖ ସହର ଓ ଶିଳ୍ପାଞ୍ଚଳଗୁଡ଼ିକରେ ବାୟୁ ଓ ଜଳ ପ୍ରଦୂଷଣ ଅଣାୟତ୍ତ ହେଉଛି। ଫଳରେ ଜଳବାୟୁ ପରିବର୍ତ୍ତନଜନିତ ସଙ୍କଟରେ ଓଡ଼ିଶାବାସୀ ହନ୍ତସନ୍ତ ହେଉଛନ୍ତି। ଏହାର ମୁକାବିଲା ଓ ପରିଚାଳନା କରିବାକୁ ସରକାରଙ୍କ ପକ୍ଷରୁ ଗ୍ରୀନ୍ ହାଉସ ନିରାକରଣ, କାର୍ବନ ଫୁଟ୍ପ୍ରିଣ୍ଟ ଭଳି ଅନେକ ପଦକ୍ଷେପ ଗ୍ରହଣ କରାଯାଉଛିି। ଏହି କ୍ରମରେ ୧୦ା୧୨ା୨୦୨୧ରେ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ(ଏନ୍ଜିଟି) ଏକ ମାମଲା (ଓଏ ନମ୍ବର ୩୨୦/୨୦୨୧)ର ବିଚାର କରି ଯେଉଁ ରାୟ ଦେଇଛନ୍ତି ସେଥିରୁ ଗୋଟିଏ ସ୍ଥାନରେ ୫ ହଜାର କୁୁକୁଡ଼ା ପାଳନ ହେଉଥିବା ଏକକ ଫାର୍ମଗୁଡ଼ିକ ମଧ୍ୟ ପ୍ରଦୂଷଣ ନିୟନ୍ତ୍ରଣ ଆଇନ ପରିସରଭୁକ୍ତ ହେବ ବୋଲି ଜଣାପଡ଼ିଛି। ଫଳରେ ଏହି ଛୋଟ କୁକୁଡ଼ା ଫାର୍ମଗୁଡ଼ିକର ପ୍ରତିଷ୍ଠା ଓ ପରିଚାଳନା ପାଇଁ ଜଳ ଆଇନ ୧୯୭୪ ଏବଂ ବାୟୁ ଆଇନ ୧୯୮୧ ଅନୁଯାୟୀ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଏସ୍ପିସିବି)ଠାରୁ ଅନୁମତି ଦରକାର। ଏହି ବ୍ୟବସ୍ଥା ୧ ଜାନୁୟାରୀ ୨୦୨୩ରୁ ଲାଗୁ ହେବ। ସେହି ତାରିଖ ପର୍ଯ୍ୟନ୍ତ ଏହି ନିୟମ ୨୫ ହଜାର କୁକୁଡ଼ା ପାଳନ ହେଉଥିବା ଏକକ ଫାର୍ମଗୁଡ଼ିକ ପାଇଁ ଲାଗୁ ହୋଇଥିବା ଏସ୍ପିସିବିର ଅଫିସ୍ ଅର୍ଡର (୩୩୯୫/୪ା୩ା୨୦୨୨)ରୁ ଜଣାପଡ଼ିଛି। ହେଲେ ଏହି ନିର୍ଦ୍ଦେଶର ୨ ମାସ ଅତିକ୍ରାନ୍ତ ହୋଇ ସାରିଥିଲେ ହେଁ ଗୋଟିଏ ବି କୁକୁଡା ଫାର୍ମ ଉପରେ ତାହାକୁ ଲାଗୁ କରାଯାଇ ନ ଥିବା ସୂଚନା ମିଳିଛି।
ମତ୍ସ୍ୟ, ପ୍ରାଣୀ ପାଳନ ଓ ଦୁଗ୍ଧ ଉପତ୍ାଦନ ମନ୍ତ୍ରଣାଳୟରୁ ମିଳିଥିବା ତଥ୍ୟ ଅନୁସାରେ ୨୦ତମ ପ୍ରାଣୀ ସମ୍ପଦ ଗଣନାରେ ଦେଶରେ ୮୫୧.୮୦୯ ମିଲିୟନ କୁକୁଡ଼ା ରହିଛନ୍ତି। ସେଥିମଧ୍ୟରୁ ଓଡ଼ିଶାରେ ୨୭.୪୩୯ ମିଲିୟନ କୁକୁଡା ରହିଛନ୍ତି। ୨୦୧୫ରେ ୧ ଲକ୍ଷରୁ ଊର୍ଦ୍ଧ୍ୱ ଥିବା କୁକୁଡ଼ା ଫାର୍ମର ପ୍ରତିଷ୍ଠା ଓ ପରିଚାଳନା ନିମନ୍ତେ ସିପିସିବି ପକ୍ଷରୁ ଗାଇଡ୍ଲାଇନ୍ ପ୍ରସ୍ତୁତ ହୋଇଥିଲା। ଏହି ଫାର୍ମ ପ୍ରଦୂଷଣ କ୍ଷେତ୍ରରେ ସବୁଜ ବର୍ଗର ବୋଲି ଚିହ୍ନଟ ହୋଇଥିଲା। କୁକୁଡ଼ା ଫାର୍ମକୁ ୩ଟି ପର୍ଯ୍ୟାୟରେ ବିଭକ୍ତ କରାଯାଇଛି। ଏଥିରେ ୫ ହଜାରରୁ ୨୫ ହଜାର ପର୍ଯ୍ୟନ୍ତ କୁକୁଡା ରହୁଥିବା ଫାର୍ମକୁ ଛୋଟ, ୨୫ ହଜାରରୁ ୧ ଲକ୍ଷ ପର୍ଯ୍ୟନ୍ତ ମଧ୍ୟମ ଏବଂ ୧ ଲକ୍ଷରୁ ଊର୍ଦ୍ଧ୍ୱ କୁକୁଡା ଫାର୍ମକୁ ବଡ଼ ପର୍ଯ୍ୟାୟଭୁକ୍ତ କରାଯାଇଛି। ତେବେ କୁକୁଡା ଫାର୍ମରୁ ନିର୍ଗତ ରାସାୟନିକ ଦ୍ରବ୍ୟ ଏମୋନିଆ ଏବଂ ହାଇଡ୍ରୋଜେନ ବାୟୁ ପରିବେଶକୁ ଦୁର୍ଗନ୍ଧମୟ କରିଥାଏ। ଏହାବାଦ୍ କୁକୁଡ଼ାଙ୍କ ଖାଦ୍ୟ ଉପାଦାନ ଗ୍ରାଇଡିଂ ଏବଂ ମଳ ସଂଗ୍ରହ ସମୟରେ ବାୟୁ ପ୍ରଦୂଷଣ ସୃଷ୍ଟି ହୋଇଥାଏ। ଫାର୍ମରେ କୁକୁଡ଼ା ମୃତ୍ୟୁ ସାଧାରଣ କଥା। ଏଥିଯୋଗୁ ଆଖପାଖ ଅଞ୍ଚଳ ଅତି ପ୍ରଦୂଷଣ ସହ ଲୋକଙ୍କୁ ବିଭିନ୍ନ ରୋଗ ହେବା ଆଶଙ୍କା ରହିଥାଏ। ଏହିସବୁ କାରଣରୁ କୁକୁଡା ଫାର୍ମ କରିବା ପୂର୍ବରୁ ଏବେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସପିସିବି)ର ଅନୁମତି ନିହାତି ଆବଶ୍ୟକ ବୋଲି ଏନଜିଟି ପକ୍ଷରୁ ରାୟ ପ୍ରକାଶ ପାଇଛି। ଗ୍ରାମାଞ୍ଚଳରେ କୁକୁଡା ଫାର୍ମଗୁଡ଼ିକୁ ଆଖପାଖ ଲୋକେ ବିରୋଧ କରି ଆସୁଛନ୍ତି। ତେଣୁ ଜନବସତି ନିକଟ ଅଞ୍ଚଳରେ କୁକୁଡା ଫାର୍ମକୁ ଅନୁମତି ନ ଦେବାକୁ ସାଧାରଣରେ ଦାବି ହେଉଛି। ଏନ୍ଜିଟି ରାୟ ଏବଂ ସିପିସିବିର ନୂତନ ଗାଇଡଲାଇନକୁ ଉପଯୁକ୍ତ ଭାବେ କାର୍ଯ୍ୟକାରୀ କରାଗଲେ କୁକୁଡା ଫାର୍ମ ପ୍ରଦୂଷଣରୁ ଲୋକେ ମୁକ୍ତି ପାଇପାରିବେ ବୋଲି ମତପ୍ରକାଶ ପାଇଛି।