ଇସଲାମାବାଦ,୧୦।୧: ପ୍ରଧାନମନ୍ତ୍ରୀ ଇମ୍ରାନ ଖାନ ନିର୍ବାଚନରେ ଏକ ‘ନୂତନ ପାକିସ୍ତାନ’ ଗଢିବାକୁ ପ୍ରତିଶ୍ରୁତି ଦେଇ କ୍ଷମତାକୁ ଆସିଥିଲେ। କିନ୍ତୁ ଏବେ ଦେଶ ଆର୍ଥିକ ଦେବାଳିଆ ହେବା ସହ ଶନିବାର ବିଳମ୍ବିତ ରାତିରେ ହଠାତ୍ ସମଗ୍ର ଦେଶ ଅନ୍ଧାରରେ ବୁଡି ଯାଇଥିବା ଦେଖିବାକୁ ମିଳିଛି। ଏହି କାରଣରୁ ପାକିସ୍ତାନର ସମସ୍ତ ପ୍ରମୁଖ ସହର ଏବଂ ପ୍ରଦେଶ, କରାଚି, ଲାହୋର, ପେଶୱାର, ଇସଲାମାବାଦ, ମୁଲତାନ ଏବଂ ରାୱଲପିଣ୍ଡି ସମ୍ପୂର୍ଣ୍ଣ ଅନ୍ଧକାରରେ ବୁଡି ଯାଇଥିଲା। ସବୁଥର ପରି ପାକିସ୍ତାନ ମଧ୍ୟ ଏଥିପାଇଁ ଭାରତକୁ ଦାୟୀ କରିଛି। ଇମ୍ରାନ ସରକାରଙ୍କ ମନ୍ତ୍ରୀ ଶେଖ ରସିଦ ଏହା ଭାରତର ଷଡଯନ୍ତ୍ର ବୋଲି କହିଥିଲେ। ଶେଖ ରସିଦ କହିଛନ୍ତି ଯେ, ଭାରତ ପାକିସ୍ତାନର ବିଦ୍ୟୁତ କାଟି ଦେଇଛି ଯାହା ଦ୍ୱାରା ସେଠାରେ ଘଟୁଥିବା କୃଷକ ଆନ୍ଦୋଳନରୁ ବିଶ୍ୱର ଦୃଷ୍ଟି ଆକର୍ଷଣ କରାଯାଇପାରିବ। ସୂଚନାଯୋଗ୍ୟ, ଜାତୀୟ ବିଦ୍ୟୁତ ବିତରଣ ବ୍ୟବସ୍ଥାରେ ଟ୍ରିପିଙ୍ଗ ହେତୁ ଏହି ବ୍ଲାକଆଉଟ ଘଟିଛି। ପାକିସ୍ତାନର ଶକ୍ତି ମନ୍ତ୍ରୀ କହିଛନ୍ତି ଯେ ଏହାର ଅନୁସନ୍ଧାନ କରାଯାଉଛି ଏବଂ ବର୍ତ୍ତମାନ ତରବେଲା ପାୱାର ଷ୍ଟେସନ ମାଧ୍ୟମରେ ବିଦ୍ୟୁତ ଯୋଗାଣ ପାଇଁ ଉଦ୍ୟମ କରାଯାଉଛି। ତେଣୁ ଲୋକଙ୍କୁ ଧୈର୍ଯ୍ୟ ବଜାୟ ରଖିବା ପାଇଁ ପାକିସ୍ତାନ ଶକ୍ତି ମନ୍ତ୍ରୀ ନିବେଦନ କରିଛନ୍ତି ।
