ଚଣ୍ଡିଖୋଲ,୧୪।୨(ପ୍ରଦୀପ୍ତ କୁମାର ପୃଷ୍ଟି): ଚାରବାଟିଆ ପୂର୍ତ୍ତ ବିଭାଗ ଡିଭିଜନର ବଡ଼ଚଣା ଉପଖଣ୍ଡରେ ରହିଛି ବଡ଼ଚଣା-ବାଲିଚନ୍ଦ୍ରପୁର ରାସ୍ତା। ଏହି ରାସ୍ତା ନବୀକରଣ ଓ ପ୍ରଶସ୍ତୀକରଣ କାର୍ଯ୍ୟ ଚାଲୁ ରହିଛି। ବିଭାଗ ପକ୍ଷରୁ ରାସ୍ତାରୁ ବିଦ୍ୟୁତ୍ ଖୁଣ୍ଟ ଓ ଗଛ ହଟାଇ ରାସ୍ତା ପ୍ରଶସ୍ତୀକରଣ କାର୍ଯ୍ୟ ହେବାର ନିୟମ ରହିଛି। ହେଲେ ଏହା ନ କରି ରାସ୍ତା ମଝିରେ ବିଦ୍ୟୁତ୍ ଖୁଣ୍ଟ ଓ ଗଛ ଥାଇ ଚାଲିଛି କାମ। ଠିକା ସଂସ୍ଥା ରାସ୍ତା ମଝିରେ ଖୁଣ୍ଟ ଥାଇ ଢଳେଇ ପକାଇବା ଦ୍ୱାରା ଆଗାମୀ ଦିନରେ ଦୁର୍ଘଟଣା ଘଟି ଧନ ଜୀବନ କ୍ଷତି ହେବା ସମ୍ଭାବନା ସୃଷ୍ଟି ହୋଇଛି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ବିରୋଧର ସ୍ବର ଦେଖାଦେଇଛି।
ସୂଚନା ଅନୁଯାୟୀ ବଡ଼ଚଣା-ବାଲିଚନ୍ଦ୍ରପୁର ପୂର୍ତ୍ତ ବିଭାଗ ରାସ୍ତାର ଲମ୍ବ ୧୨.୫୦୦ କିଲୋମିଟର। ଏହାକୁ ଦୁଇ ଭାଗରେ ବିଭକ୍ତ କରାଯାଇ ଟେଣ୍ଡର କରାଯାଇଛି। ଜଣେ ବଡ଼ଚଣାଠାରୁ ଭାକୁଡ ପର୍ଯ୍ୟନ୍ତ ଓ ଅନ୍ୟ ଜଣେ ଭାକୁଡ଼ଠାରୁ ବାଲିଚନ୍ଦ୍ରପୁର ପର୍ଯ୍ୟନ୍ତ ୨ ଠିକା ସଂସ୍ଥା କାମ ନେଇଛନ୍ତି। ୧୪ କୋଟି ଟଙ୍କା ବ୍ୟୟରେ ଏହି ରାସ୍ତା ପ୍ରଶସ୍ତୀକରଣ ହେଉଛି। ପୂର୍ବରୁ ରାସ୍ତାର ଓସାର ୫.୫ ମିଟରଥିବାବେଳେ ଏବେ ଏହାର ଓସାର ୭ ମିଟର କରାଯିବ।
ବିଦ୍ୟୁତ୍ ବିଭାଗକୁ ପୂର୍ତ୍ତ ବିଭାଗ ପକ୍ଷରୁ ଖୁଣ୍ଟ ଉଠାଇବା ପାଇଁ ଚିଠି କରାଯିବା କଥା। ସେମାନେ ରାସ୍ତା ପରିଦର୍ଶନ କରି କେତେ ଖୁଣ୍ଟ ଉଠିବ ତାହା ତଦାରଖ କରି ଏଷ୍ଟିମେଟ ପୂର୍ତ୍ତ ବିଭାଗକୁ ଦେବେ। ଆବଶ୍ୟକ ଟଙ୍କା ପୂର୍ତ୍ତ ବିଭାଗ ପକ୍ଷରୁ ଜମା କରାଯିବା ପରେ ବିଦ୍ୟୁତ୍ ବିଭାଗ ଠିକାଦାର ଖୁଣ୍ଟ ଉଠାଇବେ। ସେହିପରି କେତେ ଗଛ କଟାଯିବ ସେ ନେଇ ବନ ଉନ୍ନୟନ ନିଗମକୁ ମଧ୍ୟ ଚିଠି କରାଯିବା କଥା। ଆବଶ୍ୟକ ସଂଖ୍ୟକ ଟଙ୍କା ବନ ଉନ୍ନୟନ ନିଗମ ନିକଟରେ ଜମା କଲେ ସେମାନେ ଗଛ କାଟିବେ। ତେବେ ଦୀର୍ଘ ୬ ମାସ ତଳୁ ରାସ୍ତା ଟେଣ୍ଡର ସରି ଠିକା ସଂସ୍ଥା ସେମାନଙ୍କ କାର୍ଯ୍ୟ ଆରମ୍ଭ କଲେଣି। କିନ୍ତୁ ଅଦ୍ୟାବଧି ଗଛ କଟାଯାଇନି କି ବିଦ୍ୟୁତ୍ ଖୁଣ୍ଟ ଉଠି ପାରିନାହିଁ।
ଏ ସମ୍ପର୍କରେ ପୂର୍ତ୍ତ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ତପନ କୁମାର ସେଠୀଙ୍କୁ ପଚାରିବାରେ ସେ କହିଛନ୍ତି, ଗଛ କାଟିବା ପାଇଁ ଆମେ ବନ ଉନ୍ନୟନ ନିଗମକୁ ପତ୍ର ଲେଖି ଜଣାଇଛୁ। ସେମାନେ ଆସି ତଦାରଖ କରି ଯାଇଛନ୍ତି। ଖୁବ୍ଶୀଘ୍ର ଗଛ କଟାଯିବ। ସେହିଭଳି ବିଦ୍ୟୁତ୍ ବିଭାଗ ଠିକାଦାରଙ୍କୁ କହିଛୁ ସେ ଖୁଣ୍ଟ ୧୫ ଦିନ ମଧ୍ୟରେ ଉଠାଇବେ ବୋଲି ଯନ୍ତ୍ରୀ ପ୍ରକାଶ କରିଛନ୍ତି। ତେବେ ବିଦ୍ୟୁତ୍ ଖୁଣ୍ଟର ମୂଳକୁ ଠିକା ସଂସ୍ଥା ପ୍ରାୟ ୧ ଫୁଟର କଂକ୍ରିଟ ଢଳେଇ ପକାଇବା ପରେ କିପରି ଖୁଣ୍ଟ ଉଠିବ ସେଥିନେଇ ସଂଶୟ ପ୍ରକାଶ ପାଇଛି।