ଭୁବନେଶ୍ୱର: ଓଡ଼ିଶା କ୍ରିକେଟ ଆସୋସିଏଶନ(ଓସିଏ)ର ସମ୍ବିଧାନ ଅନୁସାରେ ଏହାର ପରାମର୍ଶଦାତା କମିଟି ରାଜ୍ୟ ସିନିୟର କ୍ରିକେଟ ପାଇଁ ଗୁରୁବାର ଚୟନ କମିଟି ଗଠନ କରିଛି। ୮୮ଟି ପ୍ରଥମଶ୍ରେଣୀ ମ୍ୟାଚ ଖେଳିଥିବା ପୂର୍ବତନ ରଣଜୀ ଟ୍ରଫି ଅଧିନାୟକ ପ୍ରଭଞ୍ଜନ ମଲିକଙ୍କୁ ଚୟନ କମିଟିର ଅଧ୍ୟକ୍ଷ ମନୋନୟନ କରାଯାଇଛି। କମିଟିରେ ସ୍ଥାନ ପାଇଥିବା ଅନ୍ୟ ପୂର୍ବତନ ଖେଳାଳିମାନେ ହେଲେ ସୋମନାଥ ସାହୁ (୩୩ ମ୍ୟାଚ), ରବି ନାରାୟଣ ପଣ୍ଡା (୩୦), ବିଷ୍ଣୁଦେବ ମହାନ୍ତି (୨୯) ଓ ସୌରଜିତ ମହାପାତ୍ର (୨୮)। ଓସିଏ ସଭାପତି ପଙ୍କଜ ଲୋଚନ ମହାନ୍ତି ଓ ସମ୍ପାଦକ ସଞ୍ଜୟ ବେହେରା ଚୟନ କମିଟିକୁ ଶୁଭେଚ୍ଛା ଜଣାଇଛନ୍ତି। ସୂଚନାଯୋଗ୍ୟ ବୁଧବାର ପୂର୍ବତନ କ୍ରିକେଟର ତଥା ବିସିସିଆଇ ଲେଭଲ-୩ କୋଚ୍ ଆର. ଶ୍ରୀକାନ୍ତ ଓସିଏର ବୈଷୟିକ ନିର୍ଦ୍ଦେଶକ ଏବଂ କ୍ରିକେଟ ପରିଚାଳନା ମୁଖ୍ୟ ନିଯୁକ୍ତ ହୋଇଥିଲେ। ଏହା ବ୍ୟତୀତ ବିସିସିଆଇ ସ୍ବୀକୃତିପ୍ରାପ୍ତ ଭିଡିଓ ବିଶ୍ଳେଷକ ଗଣେଶ କରଙ୍କୁ ଓସିଏର ଡାଟା ଆନାଲିଟିକ୍ସ ଓ ପରଫରମାନ୍ସ ମ୍ୟାନେଜମେଣ୍ଟ ମୁଖ୍ୟ ଏବଂ ବିସିସିଆଇ ଲେଭଲ-୧ ଟ୍ରେନର ଅମିୟ କୁମାର ମହାନ୍ତିଙ୍କୁ ଷ୍ଟ୍ରେନ୍ଥ ଆଣ୍ଡ କଣ୍ଡିଶନିଂ ପ୍ରଶିକ୍ଷଣ ମୁଖ୍ୟଭାବେ ନିଯୁକ୍ତି ଦିଆଯାଇଥିଲା।