କଟକ ଅଫିସ,୨୫।୯: କଟକ ମୁଣ୍ଡଳି ଜଳ ସ୍ରୋତରେ ଫସି ରହିଥିବା ହାତୀକୁ ଉଦ୍ଧାର କରିବାକୁ ଯାଇଥିବା ଓଡ୍ରାଫ ଟିମ୍ଙ୍କ ସହିତ ଖବର ସଂଗ୍ରହ ପାଇଁ ଓଟିଭି ରିପୋଟର ଅରିନ୍ଦମ ଦାସ ଓ ତାଙ୍କ ସହଯୋଗୀ କ୍ୟାମେରା ମ୍ୟାନ୍ ପ୍ରଭାତ ସିହ୍ନା ଯାଇଥିଲେ। ବୋଟ୍ଟି ଓଲଟି ପଡ଼ିବାରୁ ଦୁର୍ଘଟଣାରେ ଅରିନ୍ଦମଙ୍କ ଜୀବନ ଚାଲିଯାଇଥିବା ବେଳେ ପ୍ରଭାତ ଗୁରୁତର ହୋଇ ଏବେ କଟକ ବଡ଼ ମେଡିକାଲରେ ଆଇସିୟୁର ୧୩ ନଂ. ବେଡ୍ରେ ଚିକିତ୍ସିତ ହେଉଛନ୍ତି। ଗୁରୁତର ଅବସ୍ଥାରେ ପ୍ରଭାତଙ୍କୁ କାଜୁଆଲ୍ଟିରୁ ଆଇସିୟୁକୁ ସ୍ଥାନାନ୍ତର କରାଯିବା ପରେ ସେ ସାମାନ୍ୟ ସୁସ୍ଥ ଅନୁଭବ କରିଥିଲେ । ପରେ ସେ ଖୋଜୁଥିଲେ ସାଥୀ ସାମ୍ବାଦିକ ଅରିନ୍ଦମଙ୍କୁ ସନ୍ଧ୍ୟାରେ ତାଙ୍କ ପାଖକୁ ଦେଖା କରିବାକୁ ଯାଇଥିବା କେତେ ଜଣ ସାମ୍ବାଦିକଙ୍କୁ ସେ କହିଥିଲେ, ମୋର ଆଉ କୌଣସି ଅସୁବିଧା ନାହିଁ। ମୁଁ ଭଲ ଭାବେ ନିଃଶ୍ୱାସ ପ୍ରଶ୍ୱାସ ନେଇ ପାରୁଛି। ହେଲେ ଅରିନ୍ଦମ ଭାଇ ଅବସ୍ଥା କିପରି ଅଛି ବୋଲି ସେ ପଚାରିଥିଲେ। ଆଉ ଏମିତି ଏକ ପ୍ରଶ୍ନର ଉତ୍ତର କାହା ପାଖେ ନ ଥିଲା। ସେ ଜାଣିନାହାନ୍ତି ଯେ ତାଙ୍କ ସହିତ ରିପୋର୍ଟିଂ କରୁଥିବା ସାଥୀ ଅରିନ୍ଦମ ଆଉ ନାହାନ୍ତି। ଯିଏ କହିବ ଆସ ଭାଇ ରିପୋର୍ଟିଂ ରେ ଯିବା ସେ ହାତୀ ଉଠି ଲାଣି କି ନାହିଁ ଖବର ସଂଗ୍ରହ କରିବା।