କଟକ,୨୨ା୧୦: କଟକ କେନ୍ଦ୍ର ସମବାୟ ବ୍ୟାଙ୍କ (ସିସିସିବି)ର ନବନିର୍ବାଚିତ ସଭାପତି ପ୍ରଭାତ ଚନ୍ଦ୍ର କାନୁନ୍ଗୋ ଶୁକ୍ରବାର ଦାୟିତ୍ୱ ଭାର ଗ୍ରହଣ କରିଛନ୍ତି। ସେ ଆସନ୍ତା ୫ବର୍ଷ ପାଇଁ ଉକ୍ତ ପଦବୀରେ ରହି କାର୍ଯ୍ୟ କରିବେ ବୋଲି ଜଣାପଡ଼ିଛି। ଏହା ପୂର୍ବରୁ ପ୍ରଭାତ ବ୍ୟାଙ୍କର ଗତ ପରିଚାଳନା ପରିଷଦର ସଦସ୍ୟ ଭାବେ ମଧ୍ୟ କାର୍ଯ୍ୟ ସମ୍ପାଦନ କରିଛନ୍ତି। ସେ କଟକ ଜିଲାର ସମସରପୁର କୃଷି ସେବା ସମବାୟ ସମିତିର ସଭାପତି ଭାବେ ମଧ୍ୟ ଦାୟିତ୍ୱ ତୁଲାଉଛନ୍ତି। ସେ ଜଣେ ମିଷ୍ଟଭାଷୀ, ଯୁବ ପ୍ରତିଭାବାନ୍ ସମବାୟବିତ୍ ଏବଂ ଦାୟିତ୍ୱସମ୍ପନ୍ନ ବ୍ୟକ୍ତି । ଏହି ପରିପ୍ରେକ୍ଷୀରେ ବ୍ୟାଙ୍କର ସିଇଓଙ୍କ ସମେତ ବହୁ ବରିଷ୍ଠ ଅଧିକାରୀ ଓ କର୍ମଚାରୀମାନେ ପରିଚାଳନା ପରିଷଦର ନୂତନ ସଭାପତି ଓ ଅନ୍ୟ ସଦସ୍ୟମାନଙ୍କୁ ସମ୍ବର୍ଦ୍ଧନା ସହ ପୁଷ୍ପଗୁଚ୍ଛ ଦେଇ ଶୁଭେଚ୍ଛା ଜଣାଇଛନ୍ତି। ଏପରିକି ବ୍ୟାଙ୍କ ପରିଚାଳନା ପରିଷଦର ଅନ୍ୟ ୧୪ ଜଣ ନବନିର୍ବାଚିତ ସଦସ୍ୟ ମଧ୍ୟ ଦାୟିତ୍ୱ ଗ୍ରହଣ କରିଛନ୍ତି।
ଉଲ୍ଲେଖଯୋଗ୍ୟ, ରାଜ୍ୟର ପ୍ରମୁଖ ସମବାୟ ବ୍ୟାଙ୍କ ଭାବେ ସିସିସିବି ଓଡ଼ିଶାରେ ବେଶ୍ ପରିଚିତ। ୧୯୫୬ରୁ ବ୍ୟାଙ୍କ କଟକ, ଜଗତ୍ସିଂହପୁର, ଯାଜପୁର ଓ କେନ୍ଦ୍ରାପଡ଼ା ଭଳି ଜିଲାରେ କାର୍ଯ୍ୟ କରୁଛି। ଏପରିକି ବ୍ୟାଙ୍କର ୩୮ଗୋଟି ଶାଖା ୪୬୮ଗୋଟି ପ୍ରାଥମିକ କୃଷି ସମବାୟ ସମିତି ଜରିଆରେ ପରିଚାଳିତ ହେଉଛି। ବିଶେଷକରି ଉପରୋକ୍ତ ଶାଖା ଓ ସମିତି ଜରିଆରେ ବ୍ୟାଙ୍କ କୃଷକ, ବୁଣାକାର, କାରିଗର, ଅଣକୃଷି କାର୍ଯ୍ୟ ପାଇଁ ଆର୍ଥିକ ସହାୟତା ପ୍ରଦାନ କରି ଆସୁଛି।
