କାଠମାଣ୍ଡୁ,୨୫।୧୨: ପୁଷ୍ପ କମଲ ଦହଲ ଓରଫ ପ୍ରଚଣ୍ଡ ନେପାଳର ପ୍ରଧାନମନ୍ତ୍ରୀ ଭାବେ ନିଯୁକ୍ତ ହୋଇଛନ୍ତି। କରିଛନ୍ତି। ସୋମବାର ଅପରାହ୍ନ ୪ଠାରେ ତୃତୀୟଥର ପାଇଁ ପ୍ରଧାନମନ୍ତ୍ରୀ ଭାବେ ପ୍ରଚଣ୍ଡ ଶପଥ ନେବେ ବୋଲି ଜଣାପଡିଛି। ନେପାଳର ରାଷ୍ଟ୍ରପତିଙ୍କ କାର୍ଯ୍ୟାଳୟ ଟୁଇଟ କରି ଏହି ସୂଚନା ଦେଇଛନ୍ତି।
ନେପାଳରେ ଅନୁଷ୍ଠିତ ସାଧାରଣ ନିର୍ବାଚନ ପରେ କୌଣସି ରାଜନୈତିକ ଦଳ ସଂଖ୍ୟାଗରିଷ୍ଠତା ହାସଲ କରି ନ ଥିଲେ। କିନ୍ତୁ ଏକ ନାଟକୀୟ ଘଟଣା କ୍ରମେ ବିରୋଧୀ ସିପିଏନ୍-ୟୁଏମ୍ଏଲ୍ଏବଂ ଅନ୍ୟାନ୍ୟ ଛୋଟ ଦଳ ରବିବାର ପ୍ରଚଣ୍ଡକୁ ସମର୍ଥନ ଦେବାକୁ ରାଜି ହୋଇଥିଲେ।
ନେପାଳର ରାଷ୍ଟ୍ରପତି ବିଦ୍ୟା ଦେବୀ ଭଣ୍ଡାରୀଙ୍କୁ ଲେଖିଥିବା ପତ୍ରରେ ପ୍ରଚଣ୍ଡ କହିଛନ୍ତି, ପ୍ରଧାନମନ୍ତ୍ରୀ ପଦ ପାଇଁ ସେ ସ୍ବାଧୀନ ସାଂସଦଙ୍କ ସମେତ ୧୬୯ ସାଂସଦଙ୍କ ସମର୍ଥନ ପାଇଛନ୍ତି। ଏହା ପରେ ରାଷ୍ଟ୍ରପତି ତାଙ୍କୁ ନେପାଳର ପ୍ରଧାନମନ୍ତ୍ରୀ ଭାବରେ ନିଯୁକ୍ତ କରିଛନ୍ତି। ସେ ଆସନ୍ତାକାଲି ଶପଥ ଗ୍ରହଣ କରିବେ।
ପ୍ରଚଣ୍ଡଙ୍କୁ ପ୍ରଧାନମନ୍ତ୍ରୀ ଭାବେ ନିଯୁକ୍ତି ଦେବା ଲାଗି ସିପିଏନ୍-ୟୁଏଲ୍ଏଲ୍ ଅଧ୍ୟକ୍ଷ କେ.ପି. ଶର୍ମା ଓଲି, ରାଷ୍ଟ୍ରୀୟ ସ୍ବତନ୍ତ୍ର ପାର୍ଟି ଅଧ୍ୟକ୍ଷ ରବି ଲାମିଛୋନେ, ରାଷ୍ଟ୍ରୀୟ ପ୍ରଜାତନ୍ତ୍ର ପାର୍ଟି ମୁଖ୍ୟ ରାଜେନ୍ଦ୍ର ଲିଙ୍ଗ୍ଡେନ ଓ ଅନ୍ୟ ନେତାମାନେ ରାଷ୍ଟ୍ରପତିଙ୍କୁ ପ୍ରସ୍ତାବ ଦେଇଥିଲେ। ୨୭୫ ସଦସ୍ୟ ବିଶିଷ୍ଟ ନେପାଳ ପ୍ରତିନିଧି ସଭାରେ ପ୍ରଚଣ୍ଡଙ୍କ ପଛରେ ୧୬୫ଜଣଙ୍କ ସମର୍ଥନ ରହିଛି। ସମର୍ଥନ ଦେଇଥିବା ଦଳ ମଧ୍ୟରେ ସିପିଏନ୍-ୟୁଏମ୍ଏଲ୍ର ୭୮ ସଦସ୍ୟ ଥିବାବେଳେ ସିପିଏନ୍-ଏମ୍ସିର ୩୨, ଆର୍ଏସ୍ପିର ୨୦, ଆର୍ପିପିର ୧୪, ଜେଏସ୍ପିର ୧୨, ଜନମତର ୬ ଏବଂ ନାଗରିକ ଉନ୍ମୁକ୍ତି ପାର୍ଟିର ୩ ସଦସ୍ୟ ଅଛନ୍ତି।