ଭୋଗରାଇ,୨୧ା୩(ପ୍ରଦୀପ ଦାସ): ୨୦୦୮ ନଭେମ୍ବର ୧୧ରେ ମୁମ୍ବାଇରେ ସନ୍ତ୍ରାସବାଦୀ ଆକ୍ରମଣ, ୨୦୧୯ ଫେବୃଆରୀ ୧୪ ପୁଲଓ୍ବାମା ସୈନିକ ଗାଡ଼ିରେ ବିସ୍ଫୋରଣ ପରେ ଭାରତ ସରକାର ପ୍ରତିରକ୍ଷା ବାହିନୀକୁ ଜଳପଥରେ ବିଶେଷ ଭାବେ ନଜର କଡ଼ାକଡ଼ି କରିଛନ୍ତି। ବିଗତ ବର୍ଷପରି ତଟରକ୍ଷୀ ବାହିନୀ, ମେରାଇନ ଥାନା ଓ ମତ୍ସଜୀବୀଙ୍କ ମିଳିତ ସହଯୋଗରେ ସନ୍ତ୍ରାସବାଦୀ ଗତିବିଧିକୁ ନଜର ରଖିବା ଓ ସେମାନଙ୍କୁ କିପରି ଆକସ୍ମିକ ଭାବେ ଜଳପଥରେ କାବୁ କରାଯାଇପାରିବ ସେଥିପାଇଁ ଦୁଇଦିନିଆ ସମୁଦ୍ରକୂଳରେ ସମରାଭ୍ୟାସ କରାଯାଇଛି। ଏହିସମରାଭ୍ୟାସ ବାଲେଶ୍ୱର ଜିଲା ତାଳସାରୀ, ବାହାବଳପୁର, ବଳରାମଗଡ଼ି ମେରାଇନ ଥାନା ପକ୍ଷରୁ ବୁଧବାର ଓ ଗୁରୁବାର ସକାଳ ୬ ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଜିଲା ଆରକ୍ଷୀ ଅଧିକାରିଣୀ ସାଗରିକା ନାଥଙ୍କ ନିର୍ଦ୍ଦେଶରେ ସମସ୍ତ ମେରାଇନ ଥାନାର କର୍ମଚାରୀମାନେ ସମରାଭ୍ୟାସ କୌଶଳ ପ୍ରଦର୍ଶନ କରିଥିଲେ। ଜିଲା ପ୍ରଶାସନିକ ଅଧିକାରୀ ଏବଂ ତାଳସାରୀ ଆଇ ଆଇସି ଚମ୍ପାବତୀ ସୋରେନ, ବାହାବଳପୁର ଆଇଆଇସି ପ୍ରଶାନ୍ତ କୁମାର ପାଣି, ବଳରାମଗଡ଼ିର ଆଇଆଇସି ଜୟନ୍ତୀ ମଲ୍ଲିକଙ୍କ ସମେତ ଭୋଗରାଇ ଥାନାର ହୃଷୀକେଶ ବିଶ୍ୱାଳଙ୍କ ନେତୃତ୍ୱରେ ବାଲେଶ୍ୱର ଓ ବିଭିନ୍ନ ଥାନାର ପୋଲିସ କର୍ମଚାରୀମାନେ ଏବଂ ମତ୍ସ୍ୟ ଓ ବନ ବିଭାଗ କର୍ମଚାରୀମାନେ ସମରାଭ୍ୟାସରେ ସାମିଲ ଥିଲେ। ଓଡ଼ିଶା ସୀମାନ୍ତ ବାଲେଶ୍ୱର ଜିଲା ଉଦୟପୁରଠାରୁ ଗଞ୍ଜାମର ୪୮୧ କିମି ବ୍ୟାପ୍ତ ଉପକୂଳ ମୁକୁଳା ପଡ଼ିଥିବାରୁ ୬ଟି ଉପକୂଳ ଜିଲାରେ ୧୮ଟି ମେରାଇନ ଥାନା ରହିଥିବାର ସୂଚନା ମିଳିଛି। ହେଲେ ଏ ସମସ୍ତ ମେରାଇନ ଥାନାରେ ଆବଶ୍ୟକୀୟ କର୍ମଚାରୀ, ଆଧୁନିକ ଅସ୍ତ୍ରଶସ୍ତ୍ର, ଆକସ୍ମିକ ବିପଦକୁ ସୁରକ୍ଷା ଦେବାରେ ସ୍ପିଡିବୋଟ ନ ଥିବାରୁ ସୁରକ୍ଷା ବ୍ୟବସ୍ଥା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ସମୁଦ୍ରକୂଳ ମୁକୁଳା ପଡ଼ିଥିବାରୁ ବାଂଲାଦେଶୀ ଅନୁପ୍ରବେଶକାରୀମାନେ ପ୍ରବେଶ କରି ଉପକୂଳ ସ୍ଥାନରେ ବାସସ୍ଥାନ କରି ନିଶା ଓ ଦେହଜୀବୀଙ୍କ ସାମ୍ରାଜ୍ୟ କାୟାବିସ୍ତାର କରୁଥିବାରୁ ସବୁଦିନିଆ ପାଟ୍ରୋଲିଂ କରାଯାଇ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବାକୁ ବହୁ ବୁଦ୍ଧିଜୀବୀ ଓ ମତ୍ସଜୀବୀମାନେ ଦାବି କରିଛନ୍ତି।