ପାରାଦୀପ, ୧ା୧୦(ସ୍ବ.ପ୍ର.): ପାରାଦୀପର ମହାନଦୀ ମୁହାଣରେ ଶୁକ୍ରବାର ପ୍ରଥମକରି ଜଣେ ଜାତୀୟ ଖେଳାଳି ନାରାୟଣ ମୁଣ୍ଡା ୱିଣ୍ଡ ସର୍ଫିଂ ଅଭ୍ୟାସ କରିଛନ୍ତି। ଏପରି ଅଭ୍ୟାସ ସେ ସପ୍ତାହେ ପର୍ଯ୍ୟନ୍ତ କରିବେ। ଅକ୍ଟୋବର ୧୩ ରୁ ୨୧ ପର୍ଯ୍ୟନ୍ତ ମହାରାଷ୍ଟ୍ରରେ ଆୟୋଜିତ ଜାତୀୟ ସେଲିଂ ଚାମ୍ପିୟାନଶିପରେ ସେ ଭାଗ ନେବେ ବୋଲି ତାଙ୍କ ପ୍ରଶିକ୍ଷକ ଆନ୍ତର୍ଜାତିକ ସ୍କୁବା ଡାଇଭର ସବିର ବକ୍ସ ସୂଚନା ଦେଇଛନ୍ତି। ଏହାକୁ ରାଜ୍ୟ ସରକାରଙ୍କ ସ୍ପୋର୍ଟସ ବିଭାଗ ପକ୍ଷରୁ ସଚିବ ଭିନିଲ କ୍ରିଷ୍ଣା ସ୍ବୀକୃତି ଦେଇଛନ୍ତି। ମୁଣ୍ଡାଙ୍କ (୧୭) ଘର ରାଉରକେଲାର ପାନପୋଷସ୍ଥିତ ବାଲୁଆଘାଟ ବସ୍ତିରେ। ପିଲାଦିନରୁ ସେ ବାପାଙ୍କୁ ହରାଇଛନ୍ତି। ମା’ ଏବେ ମାନସିକବିକାରଗସ୍ତ। ଦାରିଦ୍ରତା ମଧ୍ୟରେ ସେ ବାଲୁଆଘାଟ ସ୍କୁଲରେ ଏକାଦଶ ପର୍ଯ୍ୟନ୍ତ ପାଠ ପଢିଛନ୍ତି। ଏବେ ଏକ ଠିକାସଂସ୍ଥାରେ କାମ କରୁଛନ୍ତି। ୨୦୧୪ ରେ କଟକରେ ଆୟୋଜିତ ସର୍ଫିଂରେ ସେ ସଫଳତା ପାଇଥିଲେ। ପରେ ଅଭାବ ଯୋଗୁ ଅଭ୍ୟାସ କରି ପାରୁ ନ ଥିଲେ। ଏହାସତ୍ତ୍ୱେ ୨୦୨୧ରେ ମହିଶୁରଠାରେ ଆୟୋଜିତ ଟୁର୍ନାମେଣ୍ଟରେ ଭାଗ ନେଇ ତୃତୀୟ ସ୍ଥାନ ପାଇବା ସହ କାଂସ୍ୟ ପଦକ ହାସଲ କରିଥିଲେ। ଓଡ଼ିଶାର ଏକମାତ୍ର ଖେଳାଳିଭାବେ ଏପରି ସଫଳତା ହାସଲ କରିଥିବାରୁ ରାଜ୍ୟ ସ୍ପୋର୍ଟସ ବିଭାଗ ସଚିବ ତାଙ୍କୁ ସହାୟତା କରୁଛନ୍ତି ବୋଲି ମୁଣ୍ଡା କହିଛନ୍ତି। ଆସନ୍ତା ଅଲମ୍ପିକ କ୍ରୀଡ଼ାରେ ଭାଗ ନେବା ପାଇଁ ଏବେଠାରୁ ରାଜ୍ୟର ବିଭିନ୍ନ ସ୍ଥାନରେ ସେ ଅଭ୍ୟାସ କରୁଛନ୍ତି। ମହାନଦୀ ମୁହାଣ ଅତ୍ୟନ୍ତ ପ୍ରଖର ବୋଲି ସେ କୁହନ୍ତି। ଏଠାରେ ଅଭ୍ୟାସ କଲେ ବିଶ୍ୱର ଯେକୌଣସି ସ୍ଥାନରେ ଖେଳି ହେବ। ଏହାପରେ ଆବୁଧାବି, ସିଙ୍ଗାପୁରଠାରେ ଆୟୋଜିତ ସେଲିଂ ଚାମ୍ପିୟାନଶିିପରେ ସେ ଭାଗ ନେବେ। ଏନେଇ ପ୍ରସ୍ତୁତି ଚୂଡାନ୍ତସ୍ତରରେ ପହଞ୍ଚତ୍ଛି ବୋଲି ମୁଣ୍ଡାଙ୍କ ପ୍ରଶିକ୍ଷକ କହିଛନ୍ତି।