ନୟାଗଡ ଅଫିସ,୨୮ା୬: ଆଧୁନିକ ସଙ୍ଗୀତର ବାଦ୍ଶାହା ଅକ୍ଷୟ ମହାନ୍ତି ସିନା ଏ ଦୁନିଆରେ ନାହାନ୍ତି, ହେଲେ ତାଙ୍କର ପ୍ରତ୍ୟେକଟି ଗୀତ ଆଜିବି ଶ୍ରୋତାଙ୍କ ମନରେ ଗୁଞ୍ଜରଣ ସୃଷ୍ଟି କରୁଛି। ଅନେକ କଣ୍ଠଶିଳ୍ପୀ, ଗୀତିକାର ଅକ୍ଷୟଙ୍କ ପଦାଙ୍କ ଅନୁସରଣ କରିଛନ୍ତି ସତ ହେଲେ ତାଙ୍କ ପରି ଅବିକଳ ସ୍ବରରେ ଗୀତ ଗାଉଥିବା କଣ୍ଠଶିଳ୍ପୀ ମିଳିନାହାନ୍ତି। କିନ୍ତୁ ନୟାଗଡ଼ ଜିଲା ରଣପୁର ବ୍ଲକ ରାଜସୁନାଖଳା ପଞ୍ଚାୟତ ନୃସିଂହପୁର ଶାସନରେ ଏପରି ଜଣେ କଣ୍ଠଶିଳ୍ପୀଙ୍କୁ ଦେଖିବାକୁ ମିଳିଛି, ଯିଏ ଅକ୍ଷୟଙ୍କ କଣ୍ଠକୁ ଅବିକଳ ନକଲ କରି ପ୍ରେରଣାର ଉତ୍ସ ପାଲଟିଛନ୍ତି। ସେ ହେଲେ ପ୍ରଦୀପ ମହାପାତ୍ର। ରବି ଭାଇନା ନଁାରେ ସେ ବେଶ୍ ପରିଚିତ।
ପ୍ରଦୀପ ଅକ୍ଷୟଙ୍କ ଗୀତ ଗାଇଲେ ଅଜଣା ଲୋକ ଚକିତ ହୋଇପଡ଼ନ୍ତି। ମଞ୍ଚରେ ଗାଉଥିବା ଶିଳ୍ପୀର କଣ୍ଠସ୍ବର ଶୁଣିବା ପରେ ଦର୍ଶକ ନିଜ ଆଖିକୁ ବିଶ୍ୱାସ କରି ପାରନ୍ତିନି। ୧୯୮୦ରୁ ସେ ପ୍ରାୟ ୧୨୦୦ ମଞ୍ଚରେ ଗୀତ ଗାଇ ସାରିଲେଣି। ତେବେ ବଣମଲ୍ଲୀ ବଣରେ ଫୁଟି ମଉଳିବା ପରି ତାଙ୍କର ପ୍ରତିଭା ଲୁଚିଯାଇଛି। କାରଣ ସଙ୍ଗୀତ ମଞ୍ଚକୁ ଛାଡିଦେଲେ ଟିଭି ପରଦା କିମ୍ବା ଅନ୍ୟ ପ୍ଲାଟଫର୍ମରେ ତାଙ୍କୁ ଦେଖିବାକୁ ମିଳେନା। କିନ୍ତୁ ତାଙ୍କ ପ୍ରତିଭାକୁ ଅନୁଧ୍ୟାନ କଲେ ଏଭଳିଆ ବ୍ୟକ୍ତିତ୍ୱ ଅଣଦେଖା ହୋଇ ରହି ଯାଉଥିବା କଥାକୁ ବିଶ୍ୱାସ କରି ହେବନି। ଦିନେ ନୁହେଁକି ମାସେ ନୁହେଁ ପ୍ରାୟ ୪୦ ବର୍ଷ ହେଲା ଗୀତ ଗାଇ ଆସୁଛନ୍ତି ପ୍ରଦୀପ। ତେବେ ଧୀରେଧୀରେ ତାଙ୍କ କଣ୍ଠରୁ ଶୁଭୁଥିବା ଅକ୍ଷୟଙ୍କ ସଙ୍ଗୀତ ଦର୍ଶକଙ୍କ ମନକୁ ଛଇଁପାରିଛି। ଅକ୍ଷୟଙ୍କ ସବୁ ଗୀତକୁ ପ୍ରାୟ ଗାଇ ସାରିଲେଣି ପ୍ରଦୀପ। ମଞ୍ଚରେ ଗୀତ ଗାଇବା ବେଳେ ଦର୍ଶକ କେବଳ ଅକ୍ଷୟଙ୍କ ସଙ୍ଗୀତକୁ ଗାଇବାକୁ ତାଙ୍କୁ ଅନୁରୋଧ କରିଥାନ୍ତି। ଏପର କି ଘରେ ଥିବାବେଳେ ସକାଳୁ ସଞ୍ଜ ପର୍ଯ୍ୟନ୍ତ ପ୍ରଦୀପଙ୍କ ଘରୁ ଶୁଭେ ଅକ୍ଷୟ ସଙ୍ଗୀତର ମୂର୍ଚ୍ଛନା। ବିଏ ପଢ଼ିଥିବା ପ୍ରଦୀପ ବଡ଼ହେଲେ କଣ୍ଠଶିଳ୍ପୀ ହେବେ ବୋଲି ପିଲାଟି ଦିନରୁ ବାରି ହୋଇ ପଡୁଥିଲେ। ଛାତ୍ରାବସ୍ଥାରେ କଣ୍ଠଦାନ କରି ସେ ଅନେକ ପୁରସ୍କାର ଜିତିଥିଲେ। ଏ ସମ୍ପର୍କରେ, ପ୍ରଦୀପ କୁହନ୍ତି, ପୂର୍ବରୁ ମା’ବାପା ମୋତେ ଆଗକୁ ବଢ଼ାଇବାରେ ସହଯୋଗ କରିଥିଲେ। ଏବେ ମୋ ମା’, ସ୍ତ୍ରୀ, ଦୁଇ ଝିଅ ଓ ପୁଅ ସବୁବେଳେ ପ୍ରେରଣା ଯୋଗାଇ ଆସୁଛନ୍ତି। ଗଁା ଲୋକଙ୍କ ପ୍ରେରଣା ମଧ୍ୟ ମୋ ସାଥିରେ ରହିଛି। ଭଗବାନଙ୍କ ସାନ୍ନିଧ୍ୟ ମୋ ସହ ଥିବାରୁ ମୁଁ ପିଲାଟି ଦିନରୁ ଏହି ଯାତ୍ରା ଜାରି ରଖିଛି। ଯେତେ ବାଧାବିଘ୍ନ ଆସିଲେ ବି ପଛକୁ ଫେରି ଚାହିଁନାହିଁ। ଅଭାବ ଅସୁବିଧା ମୋ କଣ୍ଠଦାନରେ ବାଧକ ସାଜି ପାରିନି।