ଦାରିଙ୍ଗବାଡ଼ି,୧୩ା୧୧(ଅରୁଣ ସାହୁ): ସବୁ କଚ୍ଚା ଘରକୁ ସରକାର ପକ୍କା କରିବେ। ଏଥିପାଇଁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ଯୋଗାଇ ଦେଉଛନ୍ତି। ହେଲେ ଏଥିରେ ସରକାରୀ କର୍ମଚାରୀମାନେ ହିତାଧିକାରୀଙ୍କ ପ୍ରାପ୍ୟକୁ ହଡ଼ପ କରିବା ପାଇଁ ବିଭିନ୍ନ ଚଞ୍ଚକତା ଅବଲମ୍ବନ କରୁଛନ୍ତି। ବିଶେଷକରି ଶିକ୍ଷାଗତ ଯୋଗ୍ୟତା କମ୍ ରହିଥିବା ହିତାଧିକାରୀଙ୍କୁ ଅଧିକ ଚଞ୍ଚକତା କରୁଥିବା ଅଭିଯୋଗ ହୋଇଛି।
ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ସିମନବାଡ଼ି ପଞ୍ଚାୟତର କାଥ୍ରିନା ଦିଗାଲଙ୍କ କ୍ଷେତ୍ରରେ। ସେ ଗତ ୨୦୨୧/୨୨ ଆର୍ଥିକ ବର୍ଷରେ ଏହି ଯୋଜନାରେ ଗୃହ ପାଇଁ ବ୍ଲକ ପ୍ରଶାସନ ନିକଟରୁ ଓ୍ବାର୍କଅର୍ଡର ପାଇଥିଲେ ଓ ପ୍ରଥମ କିସ୍ତିରେ ଗୃହ କାର୍ଯ୍ୟ ଆରମ୍ଭ କରିବା ପାଇଁ ୪୦ ହଜାର ଅର୍ଥ ମଞ୍ଜୁର ହୋଇଥିଲା। ହେଲେ କାଥ୍ରିନାଙ୍କ ବ୍ୟାଙ୍କ ଆକାଉଣ୍ଟକୁ ଉକ୍ତ ଅର୍ଥ ଆସିବା ବଦଳରେ ଅନ୍ୟ ଜଣଙ୍କ ଆକାଉଣ୍ଟକୁ ଉକ୍ତ ପ୍ରାପ୍ୟ ଦିଆଯାଇଥିଲା। ଏହା କାଥ୍ରିନା ଜାଣିବା ପରେ ସେହି ସମୟରେ ଦାରିଙ୍ଗବାଡ଼ି ବିଡିଓଙ୍କୁ ଅବଗତ କରିଥିଲେ ଓ ସେହି ସମୟରେ ଉକ୍ତ ତୃତୀୟ ବ୍ୟକ୍ତିଙ୍କ ଆକାଉଣ୍ଟକୁ ହୋଲ୍ଡ କରି ପୁଣି କାଥ୍ରିନାଙ୍କ ଆକାଉଣ୍ଟକୁ ଉକ୍ତ ପ୍ରାପ୍ୟ ଫେରାଇ ଦିଆଯାଇଥିଲା। ଏହି ପରି କାଥ୍ରିନାଙ୍କ ଦିତୀୟ କିସ୍ତିର ୬୫ ହଜାର ମଧ୍ୟ ସମାନ ସମସ୍ୟା ହୋଇଥିଲା ଓ ସେ ଅଭିଯୋଗ କଲା ପରେ ତାଙ୍କ ପ୍ରାପ୍ୟ ଫେରି ପାଇଥିଲେ। ହେଲେ ଏବେ ସେ ଗୃହ କାର୍ଯ୍ୟ ସମ୍ପୂର୍ଣ୍ଣ କରିଦେଇଥିଲେ ସୁଦ୍ଧା ପୁଣି ଫାଇନାଲ ବିଲ୍ର ୨୫ ହଜାର ସେଭଳି ତୃତୀୟ ବ୍ୟକ୍ତିଙ୍କ ଆକାଉଣ୍ଟକୁ ଯାଇଛି। କାର୍ଯ୍ୟ ସମ୍ପୂର୍ଣ୍ଣ କରିଥିବା କାଥ୍ରିନା ଶେଷ ବିଲ୍ ପାଇବା ପାଇଁ ପଞ୍ଚାୟତ କାର୍ଯ୍ୟାଳୟ ଓ ବ୍ଲକ କାର୍ଯ୍ୟାଳୟକୁ ବାରମ୍ବାର ଦୌଡ଼ି ନୟାନ୍ତ ହୋଇସାରିଲେଣି। ହେଲେ ତାଙ୍କ ଗୁହାରି କେହି ଶୁଣୁ ନ ଥିବା କାଥ୍ରିନା କହିବା ସହ ଦୁଃଖରେ ଭାଙ୍ଗି ପଡ଼ିଛନ୍ତି। ଉକ୍ତ ପଞ୍ଚାୟତ ଅଞ୍ଚଳରେ ଅନେକ ହିତାଧିକାରୀ ପ୍ରଧାନମନ୍ତ୍ରୀ ଆବାସ ଯୋଜନାର ଗୃହ କାର୍ଯ୍ୟ ଆରମ୍ଭ ନ କରି ବିଲ୍ ପାଉଥିବା ବେଳେ କାହିଁକି ଏଭଳି ଜଣେ ମହିଳାଙ୍କୁ ହଇରାଣ କରାଯାଉଛି। ମୋ’ ଗୃହ ବିଲ୍ ଶୀଘ୍ର ପ୍ରଦାନ କରାଯାଉ ବୋଲି ସେ ଦୁଃଖରେ ପ୍ରକାଶ କରିଛନ୍ତି।
ତେବେ ଏଠି ପ୍ରଶ୍ନ ଉଠୁଛି ଦୁଇ ଦୁଇଥର ତାଙ୍କୁ ଏଭଳି ବିଲ୍ ପ୍ରଦାନ କରାଯାଇଥିବା ବେଳେ ଯଦି ଆକାଉଣ୍ଟରେ କିଛି ତ୍ରୁଟି ରହିଛି ତାକୁ ସଜଡ଼ା ଯାଇନାହିଁ ଓ ଏଭଳି କାଥ୍ରିନାଙ୍କୁ ହଇରାଣ ଭୋଗିବାକୁ ପଡୁଛି। ଏନେଇ ନୂତନ ଭାବେ କାର୍ଯ୍ୟରେ ଯୋଗଦେଇଥିବା ବିଡିଓ ପ୍ରୀତିରଞ୍ଜନ ରଥଙ୍କ ସହ ଯୋଗାଯୋଗ କରାଯିବାରୁ ସେ ଏଥିରେ ତାଙ୍କ ଆକାଉଣ୍ଟ ନମ୍ବର ଭୁଲ ହୋଇଥିବ। ତେଣୁ ବାରମ୍ବାର ସମସ୍ୟା ହୋଇଛି ବୋଲି ସେ କହିବା ସହ ଏହାର ଖୁବ୍ଶୀଘ୍ର ସମାଧାନ କରାଯିବ ବୋଲି କହିଛନ୍ତି।