ଭଦ୍ରକ(ସନାତନ ରାଉତ)/ବନ୍ତ(ହରି ନାରାୟଣ ମହାନ୍ତି),୨୮ା୩ବୁଧବାର ବିଜେଡ଼ିର ପ୍ରାର୍ଥୀ ତାଲିକା ପ୍ରକାଶ ପାଇଛି। ତେବେ ଜିଲାର ଭଦ୍ରକ ଓ ଭଣ୍ଡାରିପୋଖରୀରେ ବିଧାୟକଙ୍କ ଅଦଳ ବଦଳକୁ ନେଇ ଚର୍ଚ୍ଚା ଜୋର ଧରିଛି। ଭଣ୍ଡାରିପୋଖରୀର ବରିଷ୍ଠ ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲଙ୍କୁ ଭଦ୍ରକ ବିଧାନସଭା ଓ ଭଦ୍ରକ ବିଧାୟକ ସଞ୍ଜୀବ ମଲ୍ଲିକଙ୍କୁ ଭଣ୍ଡାରିପୋଖରୀ ବିଧାନସଭା ପ୍ରାର୍ଥୀ ଘୋଷଣା କରାଯାଇଛି। ଅପରପକ୍ଷେ ଭଣ୍ଡାରିପୋଖରୀରୁ ପ୍ରଫୁଲ୍ଲଙ୍କ ପୁଅ ପ୍ରୟାସକାନ୍ତି ପ୍ରତିଦ୍ୱନ୍ଦ୍ୱିତା କରିବାକୁ ନେଇ ହେଉଥିବା ଚର୍ଚ୍ଚାରେ ପୂର୍ଣ୍ଣଚ୍ଛେଦ ପଡ଼ିଛି। ଭଦ୍ରକରେ ବିଧାୟକ ସଞ୍ଜୀବ ମଲ୍ଲିକଙ୍କୁ ଗୋଟିଏ ଗୋଷ୍ଠୀ ବାରମ୍ବାର ବିରୋଧ କରି ଆସୁଥିବା ବେଳେ ତାଙ୍କୁ ଟିକେଟ ନ ଦେବାକୁ ମଧ୍ୟ ଦାବି କରି ଆସୁଥିଲେ। ସେହି କାରଣରୁ ସଞ୍ଜୀବଙ୍କୁ ଭଦ୍ରକ ବଦଳରେ ଭଣ୍ଡାରିପୋଖରୀ ଏବଂ ପ୍ରଫୁଲ୍ଲଙ୍କୁ ଭଦ୍ରକ ଆସନରେ ପ୍ରାର୍ଥୀ କରାଯାଇଥିବା ଚର୍ଚ୍ଚା ହେଉଛି। ପ୍ରଫୁଲ୍ଲଙ୍କ ପ୍ରାର୍ଥୀତ୍ୱ ପରେ ଭଦ୍ରକରେ ଥିବା ଗୋଷ୍ଠୀ କନ୍ଦଳ କେତେ ପରିମାଣରେ ହ୍ରାସ ପାଇବ ତାହା ନିର୍ବାଚନର ଫଳାଫଳ ପରେ ଜଣାପଡ଼ିବ। ସୂଚନାଯୋଗ୍ୟ ଭଣ୍ଡାରିପୋଖରୀ ପୂର୍ବରୁ ପ୍ରଫୁଲ୍ଲ ଭଦ୍ରକ ନିର୍ବାଚନ ମଣ୍ଡଳୀରେ ୧୯୯୦ ଓ ୧୯୯୫ରେ ବିଧାୟକ ଥିଲେ।
