ଦାରିଙ୍ଗବାଡ଼ି/ବ୍ରାହ୍ମଣୀଗାଁ,୨୩ା୭ (ଅରୁଣ ସାହୁ /ମନୋରଞ୍ଜନ ରଣା )ରିଙ୍ଗବାଡ଼ି ବ୍ଲକର ଦୁର୍ଗମ ସରାମୂଳି ପଞ୍ଚାୟତ ପକାଲମାହା କ୍ଲଷ୍ଟର ପ୍ରାହେଟପଙ୍କା ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟ କୋଠା ନିର୍ମାଣର ମାତ୍ର ୧୦ ବର୍ଷରେ ମଙ୍ଗଳବାର ଭୁଶୁଡ଼ି ପଡିଛି। ଲଘୁଚାପଜନିତ ଲଗାଣ ବର୍ଷାରେ ଏଭଳି ଘଟଣା ଘଟିଥିଲେ ସୁଦ୍ଧା କୌଣସି ଛାତ୍ରୀଛାତ୍ରଙ୍କ କ୍ଷତି ହୋଇନି। କିନ୍ତୁ ଭୁଶୁଡିଥିବା କାନ୍ଥକୁ ଲାଗି ରହିଛି ବିପଦପୂର୍ଣ୍ଣ କୋଠା। ଯେଉଁଠି ଛାତରୁ ପାଣି ଗଳୁଛି ସେଠି ପ୍ରଥମରୁ ଅଷ୍ଟମ ୫୫ ଛାତ୍ରୀଛାତ୍ର ପଢୁଛନ୍ତି। ଛାତ ଭୁଶୁଡିବା ଦିନରୁ ଭୟଭୀତ ହୋଇ ପ୍ରାୟ ଅଧା ଛାତ୍ରୀଛାତ୍ର ଆଉ ବିଦ୍ୟାଳୟ ପିଣ୍ଡା ମାଡୁ ନଥିବା ସହକାରୀ ଶିକ୍ଷକ ତ୍ରିନାଥ ସିଂ କହିଛନ୍ତି। ବିଦ୍ୟାଳୟ ଶ୍ରେଣୀକୋଠା ଭୁଶୁଡ଼ିବାର ୫ ଦିନ ବିତିଯାଇଥିଲେ ସୁଦ୍ଧା ଶିକ୍ଷା ବିଭାଗର ସିଆର୍ସିସି, ବିଇଓ ରସାନନ୍ଦ କର ପ୍ରମୁଖ ଘଟଣାସ୍ଥଳରେ ପହଞ୍ଚତ୍ ନଥିବା ବେଳେ କୌଣସି ଦୁର୍ଘଟଣା ଘଟିଲେ କିଏ ଦାୟୀ ରହିଥାଆନ୍ତେ ବୋଲି ଅଭିଭାବକମାନେ କହିଛନ୍ତି। ସରକାର ନୂତନ ଶ୍ରେଣୀକୋଠା ପାଇଁ ଦେଇଥିବା ଅନୁଦାନକୁ ନିମ୍ନ ମାନର କାର୍ଯ୍ୟ କରି ଅର୍ଥ ତୋସରପାତ କରାଯାଇଥିବା ଅଭିଯୋଗ ହୋଇଛି। ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଏବେ ମଧ୍ୟ ଯେଉଁ ଶ୍ରେଣୀକୋଠା ଅଛି, ତାହା କେତେ ବିପଦମୁକ୍ତ ତାହା ଯାଞ୍ଚ ହେବା ଦରକାର ବୋଲି ଗ୍ରାମବାସୀ କହିଛନ୍ତି।ପ୍ରକାଶ ଯେ, ଉକ୍ତ ବିଦ୍ୟାଳୟ ୨୦୦୮ରେ ସ୍ଥାପନ କରାଯାଇଥିଲା। ଦୁର୍ଗମ ଅଞ୍ଚଳରେ ଶିକ୍ଷାର ବିକାଶ ପାଇଁ ଛାତ୍ରୀଛାତ୍ରଙ୍କୁ ସର୍ବଶିକ୍ଷା ଅଭିଯାନରେ ସାମିଲ କରି ମାଗଣା ଶିକ୍ଷା ପାଇଁ ପାଠ୍ୟ ପୁସ୍ତକ, ପୋଷାକ, ମଧ୍ୟାନ୍ନଭୋଜନ ବ୍ୟବସ୍ଥା କରାଯିବା ସହ ପ୍ରାୟ ୧୦ ଲକ୍ଷ ବିନିମୟରେ ୩ଟି ଶ୍ରେଣୀକୋଠା ପାଇଁ ଅନୁଦାନ ଦିଆଯାଇଥିଲା। ବିଦ୍ୟାଳୟ କୋଠାକୁ ତତ୍କାଳ ଦାୟିତ୍ୱରେ ଥିବା ସର୍ବଶିକ୍ଷା ଅଭିଯାନର ବୈଷୟିକ ସହାୟକ ଓ ଦାୟିତ୍ୱରେ ଥିବା ପ୍ରଧାନ ଶିକ୍ଷକଙ୍କ ସମ୍ପାଦନରେ କୋଠା ନିର୍ମାଣ ହୋଇଥିଲା। ୨୦୧୭ରେ ପ୍ରଥମେ ବିଦ୍ୟାଳୟର ତାଜା ଭାଙ୍ଗି ଯାଇଥିଲା। ଧୀରେ ଧୀରେ ଶ୍ରେଣୀ କୋଠାଗୁଡିକରୁ ପାଣି ଗଳିବା ଆରମ୍ଭ ହୋଇ ସମସ୍ତ ତାଜା, କାନ୍ଥ, ଛାତ ଦୁର୍ବଳ ହୋଇଗଲା। ୩ଟି କୋଠା ମଧ୍ୟରୁ ୨ଟି ସମ୍ପୂର୍ଣ୍ଣ ଦୁର୍ବଳ ହେବାରୁ ଏବେ ସମଗ୍ର ଶିକ୍ଷା ଦାୟିତ୍ୱରେ ଥିବା ଯନ୍ତ୍ରୀ ବିଶ୍ୱରଞ୍ଜନ ହାତୀ ୨୦୨୦ରେ ଦୁଇଟି ଶ୍ରେଣୀ କୋଠରିକୁ ବିପଦପୂର୍ଣ୍ଣ ବୋଲି ଘୋଷଣା କରିଥିଲେ। ଏବେ ସେଠାରେ ଛାତ୍ରୀଛାତ୍ରଙ୍କୁ ମାତ୍ର ଗୋଟିଏ କୋଠରିରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ପାଠ ପଢ଼ାଯାଉଥିବା ବିଦ୍ୟାଳୟ କର୍ତ୍ତୃପକ୍ଷ କ୨ହିଛନ୍ତି। ଏନେଇ ଦାରିଙ୍ଗବାଡ଼ି ବିଇଓ ରସାନନ୍ଦ କରଙ୍କୁ ପଚାରିବାରୁ ଛାତ ଭୁଶୁଡ଼ିବା ସମ୍ପର୍କରେ ତାଙ୍କୁ କେହି ଜଣାଇନାହାନ୍ତି, ତେବେ ସେ ସୋମବାର ତଦନ୍ତ
କରିବେ ବୋଲି କହିଛନ୍ତି।