ସତରେ ସୋନାକ୍ଷୀଙ୍କ ଆଇଡିଆକୁ ମାନିବାକୁ ପଡ଼ିବ। ଦେଖୁନାହାନ୍ତି ସେ କେମିତି ଖିଲାଡି ମାଷ୍ଟର ଅକ୍ଷୟ କୁମାରଙ୍କର ଭୁରି ଭୁରି ପ୍ରଶଂସା କରିବୁଲୁଛନ୍ତି। ନିକଟରେ ଏକ କାର୍ଯ୍ୟକ୍ରମରେ ଯୋଗ ଦେବା ଅବସରରେ ଅକ୍ଷୟଙ୍କୁ ପ୍ରଶଂସାରେ ପୋତି ପକାଇଥିଲେ ସେ। ଏ ନେଇ ଦବଙ୍ଗ ଗର୍ଲ କହନ୍ତି, ‘ଅକ୍ଷୟ ଜଣେ ଅଭିଜ୍ଞ ଅଭିନେତା। ଆକ୍ଟିଂ ବିଷୟରେ ତାଙ୍କଠାରୁ ଅନେକ କିଛି ଶିଖିଛି। ଏବେ ପୁଣି ଥରେ ତାଙ୍କ ସହ ଅଭିନୟ କରିବାର ସୁଯୋଗ ମିଳିଛି। କଥା କ’ଣ କି ୟା ଭିତରେ ମୁଁ ଚିନ୍ତା କରୁଥିଲି ଯେ, ଅକ୍ଷୟଙ୍କ ସହ ଆଉ ଥରେ ସ୍କ୍ରିନ୍ ଶେୟାର କରିବାର ସୁଯୋଗ କ’ଣ ମୋତେ ମିଳିବନି ? ଯାହା ହେଉ ମୋର ଏହି ଆଶା ପୂରଣ ହୋଇଛି।’ ଏହି ନୂଆ ସିନେମାର ଟାଇଟଲ ରହିଛି ‘ଟୁ ଏକ୍ସଏଲ୍’। ଫିଲ୍ମଟିର ପ୍ରଯୋଜନା କରିଛନ୍ତି ଅଶ୍ୱିନୀ ଭାର୍ଦେ ଏବଂ ନିର୍ଦ୍ଦେଶନା ଭାର ସମ୍ଭାଳୁଛନ୍ତି ମୁଦ୍ଦାସର ଅଜିଜ୍। ଏହି ଚିତ୍ରର ଶୁଟିଂ ଆସନ୍ତା ବର୍ଷ ମାର୍ଚ୍ଚରୁ ଆରମ୍ଭ ହେବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚନା ଦିଆଯାଇଛି। ଏହାପୂର୍ବରୁ ଅକ୍ଷୟ-ସୋନାକ୍ଷୀ ଯୋଡି ‘ରାଉଡି ରାଠୋଡ’, ‘ମଙ୍ଗଲ ମିଶନ’, ଏବଂ ‘ହଲିଡେ : ଏ ସୋଲଜର ନେଭର ଅଫ୍ ଡିୟୁଟି’ ଆଦି ସିନେମାରେ ଅଭିନୟ କରିସାରିଛନ୍ତି।