କଟକ,୨୬ା୪(ଶିଳ୍ପା ପ୍ରିୟଦର୍ଶିନୀ):ଆପରାଧିକ ସାମ୍ରାଜ୍ୟକୁ ସୁରକ୍ଷା ଦେବା ପାଇଁ ମହିଳା କାର୍ଡ ଖେଳିବା ଲଜ୍ଜାଜନକ ବୋଲି କହି ମହମ୍ମଦ ମୋକିମଙ୍କୁ ଟାର୍ଗେଟ କରିଛନ୍ତି ବିଜେଡି ବିଧାୟକ ପ୍ରାର୍ଥୀ ପ୍ରକାଶ ବେହେରା। ବାରବାଟୀ-କଟକ ବିଜେଡିର ବୈଠକ ସମୟରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ପ୍ରକାଶ କହିଛନ୍ତି, ଅପରାଧର ଗନ୍ତାଘର ପାଲଟିଛନ୍ତି ମୋକିମ। ସେ ନିଜ ଆପରାଧିକ ସାମ୍ରାଜ୍ୟକୁ ସୁରକ୍ଷା ଦେବା ପାଇଁ ଏପରି ଗୋଟି ଚଳାଇଛନ୍ତି। ଯେପରି ନୂଆ ବୋତଲ ଓ ପୁରୁଣା ମଦର କଥା, ଠିକ ସେପରି ଏହି କାର୍ଡ ଖେଳିଛନ୍ତି ମୋକିମ। କଟକର ସ୍ବାଭିମାନ, ଭାଇଚାରା ଓ କଟକିଆ କହୁଥିବା ଲୋକଙ୍କୁ ପଚାରିବାକୁ ଚାହିଁବି ଯେ ମୋକିମ କେଉଁଭଳି କଟକିଆର ଦ୍ୱାହି ଦେଉଛନ୍ତି ଯିଏ କି, ଦୁଇ ଦୁଇ ଥର ବିଧାୟକ ହେବା ନେଇ ଅଯୋଗ୍ୟ ଘୋଷଣା କରାଯିବା ଏବଂ ଆପରାଧିକ ମାମଲାରେ ସୁପ୍ରିମକୋର୍ଟ ରାୟ ସ୍ଥଗିତ ନ କରିବା ପରେ ମଧ୍ୟ ଏଥିରୁ ନ ଓହରି ମହିଳା କାର୍ଡ଼ ଖେଳୁଛନ୍ତି। ଗଣତନ୍ତ୍ରରେ ଏହା ଶୋଭନୀୟ ନୁହେଁ। ପୂର୍ବ ନିର୍ବାଚନରେ ମୋକିମଙ୍କ ପାଇଁ ତାଙ୍କ ଝିଅ ପ୍ରଚାର କରୁଥିଲେ। ତେଣୁ ସେ ସମୟରେ ଡବଲ ଇଞ୍ଜିନ କାମ କରୁଥିଲା। ସେତେବେଳେ ବଡ଼ ଇଞ୍ଜିନ ପଛରେ ଛୋଟ ଇଞ୍ଜିନ କାମ କରୁଥିଲା। ହେଲେ ଏବେ ଓଲଟା ହୋଇଛି। ଛୋଟ ଇଞ୍ଜିନ ପଛରେ ବଡ଼ ଇଞ୍ଜିନ କାମ କରିବ। ଏଥିରେ କୌଣସି ତଫାତ୍ ନାହିଁ ବୋଲି ପ୍ରକାଶ କହିଛନ୍ତି। ଏହି କଟାକ୍ଷକୁ ନେଇ କଟକ ରାଜନୀତି ସରଗରମ ହୋଇଛି। ଉଲ୍ଲେଖଥାଉ କି, ମଙ୍ଗଳବାର ମୋକିମ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଥିଲେ ଯେ, ପ୍ରକାଶ ବେହେରା କଂଗ୍ରେସରେ ଥିବା ସମୟରୁ ତାଙ୍କ ସହ ସମ୍ପର୍କ ରହିଛି। ଏପରିକି ବ୍ୟକ୍ତିଗତ ସମ୍ପର୍କ ମଧ୍ୟ ଭଲ। ହେଲେ ପ୍ରକାଶ କଟକିଆ ନୁହନ୍ତି। ଅନ୍ୟପକ୍ଷରେ ବ୍ୟକ୍ତିଗତ ସମ୍ପର୍କ ଓ ରାଜନୀତି ସମ୍ପର୍କ ପ୍ରସଙ୍ଗ ସାଧାରଣରେ ଆଲୋଚନାର ବିଷୟ ପାଲଟିଛି। ତେବେ ଏନେଇ ମୋକିମଙ୍କ ପ୍ରତିକ୍ରିୟା ମିଳିପାରିନାହିଁ।