ବୁଗୁଡ଼ା,୧ା୧(ଡି.ଏନ.ଏ.): ଆନ୍ଧ୍ର ପ୍ରଦେଶର ଆଚାର୍ଯ୍ୟ ନାଗାର୍ଜୁନ ବିଶ୍ୱବିଦ୍ୟାଳୟଠାରେ ଚାଲିଥିବା ସର୍ବଭାରତୀୟ ଆନ୍ତଃ ବିଶ୍ୱବିଦ୍ୟାଳୟ ଭାରୋତ୍ତୋଳନ ପ୍ରତିଯୋଗିତାରେ ଗଞ୍ଜାମ ଜିଲା ବୁଗୁଡ଼ା ପିପୁଲସ୍ କଲେଜ ଛାତ୍ରୀ ପ୍ରମିଳା କିସାନୀ ରୌପ୍ୟ ପଦକ ଜିତି ଓଡ଼ିଶାର ନାମ ଉଜ୍ଜ୍ୱଳ କରିଛନ୍ତି। ଡିସେମ୍ବର ୨୭ରୁ ୩୦ ଯାଏ ଚାଲିଥିବା ଏହି ପ୍ରତିଯୋଗିତାରେ ସେ ୫୫ କିଲୋ ବର୍ଗରେ ୧୭୦ ଅଙ୍କ ହାସଲ କରି ଏହି ସଫଳତା ପାଇଥିବା ଜଣାପଡିଛି। ବ୍ରହ୍ମପୁର ବିଶ୍ୱବିଦ୍ୟାଳୟ ତରଫରୁ ବିଭିନ୍ନ ବର୍ଗରେ ୫ ଜଣ ଝିଅ ଅଂଶଗ୍ରହଣ କରିଥିବା ବେଳେ ପ୍ରମିଳାଙ୍କୁ ହିଁ ଏହି ସଫଳତା ମିଳିଛି। ବୁଗୁଡ଼ା ପିପୁଲସ୍ କଲେଜରେ ଯୁକ୍ତ ୩ ଇତିହାସ ସମ୍ମାନ ନେଇ ଶେଷ ବର୍ଷରେ ପଢୁଥିବା ପ୍ରମିଳା ଏହି ସଫଳତା ପାଇଁ ସେ ପିପୁଲସ୍ କଲେଜ କ୍ରୀଡ଼ା ଶିକ୍ଷକ କ୍ରିଷ୍ଣା ରାଓ ପାତ୍ର ଓ ବ୍ରହ୍ମପୁର ହନୁମାନ କ୍ଲବର କେ. ରବି କୁମାର, ଚିତ୍ତରଞ୍ଜନ ପଟ୍ଟନାୟକଙ୍କ ସମେତ କ୍ଲବର ସିନିୟର ଭାରୋତ୍ତୋଳନକାରୀମାନଙ୍କୁ ଶ୍ରେୟ ଦେଇଛନ୍ତି। ତାଙ୍କର ଏହି କୃତିତ୍ୱରେ ବୁଗୁଡା ପିପୁଲ୍ସ କଲେଜର ଅଧ୍ୟକ୍ଷ ରଜନୀ କାନ୍ତ ଦାଶଙ୍କ ସମେତ ସମସ୍ତ ଅଧ୍ୟାପକ, କର୍ମଚାରୀ, ଛାତ୍ରୀଛାତ୍ର ପ୍ରଶଂସା କରିଛନ୍ତି।