ଭୁବନେଶ୍ୱର, ୧।୪(କ୍ରୀଡ଼ା ପ୍ରତିନିଧି)- ଦୁବାଇ ଅନ୍ତର୍ଜାତୀୟ ପାରା ବ୍ୟାଡ୍ମିଣ୍ଟନ ଟୁର୍ନାମେଣ୍ଟର ପ୍ରଥମ ଦିବସରେ ଓଡ଼ିଶାର ପ୍ରମୋଦ ଭଗତ ଟ୍ରିପଲ ବିଜୟ ହାସଲ କରିଛନ୍ତି। ପ୍ରତିଯୋଗିତାରେ ଭାରତ ପକ୍ଷରୁ ପ୍ରତିନିଧିତ୍ୱ କରୁଥିବା ଅର୍ଜୁନ ପୁରସ୍କାରପ୍ରାପ୍ତ ପ୍ରମୋଦ ଗ୍ରୁପ୍ ‘ଏ’ ଏସଏଲ-୩ ଗାଟେଗୋରି ପୁରୁଷ ସିଙ୍ଗଲ୍ସରେ ଫ୍ରାନ୍ସର ମାଥ୍ୟୁ ଥୋମାସଙ୍କୁ ୨୧-୧୧ ଓ ୨୧-୧୨ ପଏଣ୍ଟରେ ହରାଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ମ୍ୟାଚ ଅବସରରେ ସେ ଗୋଟିଏ ହେଲେ ଗେମ୍ ଡ୍ରପ୍ କରି ନ ଥିଲେ। ପୁରୁଷ ଡବଲ୍ସରେ ପ୍ରମୋଦ ଓ ମନୋଜ ସରକାରଙ୍କ ଯୋଡ଼ି ମାଲେସିଆର ମହମଦ ହୁଜାଇର ଅବଦୁଲ ମାଲେକ ଓ ମହମଦ ଜୁଲଫାଥି ଜାଫରଙ୍କୁ ୧୮-୨୧, ୨୧-୧୧ ଓ ୨୧-୧୭ ପଏଣ୍ଟରେ ପରାସ୍ତ କରିଥିଲେ। ମ୍ୟାଚଟି ତୀବ୍ର ସଂଘର୍ଷପୂର୍ଣ୍ଣ ହୋଇଥିଲା। ସେହିପରି ମିକ୍ସଡ ଡବଲ୍ସରେ ପଲକ କୋହଲିଙ୍କୁ ସାଥିକରି ଖେଳୁଥିବା ପ୍ରମୋଦ ରୁଷିଆର ପାଭେଲ କୁଲିକୋଭ ଓ ଫ୍ରାନ୍ସର ଲେନାଗ ମୋରିନ ଯୋଡ଼ିଙ୍କୁ ସିଧାସଳଖ ୨୧-୧୭ ଓ ୨୧-୧୪ ପଏଣ୍ଟରେ ହରାଇ ଦେଇ ଗୋଟିଏ ଦିନରେ ଟ୍ରିପଲ ସଫଳତା ପାଇଥିଲେ। ଭାରତ ପକ୍ଷରୁ ପ୍ରତିନିଧିତ୍ୱ କରୁଥିବା ଓଡ଼ିଶାର ଅନ୍ୟତମ ଖେଳାଳି ଦୀପ ରଞ୍ଜନ ବିଷୋଇ (ଏସଏଲ-୪ କାଟେଗୋରି) ଏବଂ ଜି. ଦିଲେଶ୍ୱର ରାଓ (ଏସଏଲ୍-୩ ଗାଟେକୋରି) ସିଙ୍ଗଲ୍ସ ଓ ଡବଲ୍ସରେ ଗୋଟିଏ ଲେଖାଏ ବିଜୟ ଓ ପରାଜୟ ସହ ମିଶ୍ରିତ ସଫଳତା ପାଇଛନ୍ତି।