ଭୁବନେଶ୍ୱର, ୨୦।୫ (କ୍ରୀଡ଼ା ପ୍ରତିନିଧି): ବାହାରିନ୍ର ମାନାମାଠାରେ ଚାଲିଥିବା ଅନ୍ତର୍ଜାତୀୟ ପାରା ବ୍ୟାଡ୍ମିଣ୍ଟନ ଟୁର୍ନାମେଣ୍ଟର ସିଙ୍ଗଲ୍ସ ପ୍ରି-କ୍ୱାର୍ଟର ଫାଇନାଲରେ ଓଡ଼ିଶାର ପ୍ରମୋଦ ଭଗତ ଓ ଦିଲେଶ୍ୱର ରାଓ ପ୍ରବେଶ କରିଛନ୍ତି। ଶୁକ୍ରବାର ଅନୁଷ୍ଠିତ ସିଙ୍ଗଲ୍ସ ମ୍ୟାଚରେ ପ୍ରମୋଦ ବାହାରିନ୍ର ହୁସେନ ଏମ୍ଡି. ମିର୍ଶ ଅବଦୁଲ ରହମନଙ୍କୁ ୨୧-୮, ୨୧-୪ରେ ପରାସ୍ତ କରିଛନ୍ତି। ମିକ୍ସଡ ଡବଲ୍ସରେ ପ୍ରମୋଦ ଓ ମନୀଷା ରାମଦାସ ଯୋଡ଼ି ଫ୍ରାନ୍ସର ମାଥ୍ୟୁ ଥୋମାସ ଓ ମାଉଦ ଲେଫୋର୍ଟ ଯୋଡ଼ିଙ୍କୁ ୨୧-୧୮, ୨୧-୧୨ରେ ହରାଇ ଦେଇଛନ୍ତି। ସେହିପରି ପ୍ରମୋଦ ଡବଲ୍ସରେ ସୁକାନ୍ତ କଦମଙ୍କୁ ସାଥିକରି କାମେରୁନ୍ର ଇମାନୁଏଲ ପିନୋଚେଟ ଅମୋଉଗୁଲ ଓ ଇଟିଏନେ ସୋଙ୍ଗା ବିଜୋକାଙ୍କୁ ୨୧-୭, ୨୧-୮ରେ ହରାଇଛନ୍ତି। ଦିଲେଶ୍ୱର ରାଓ ୟୁକ୍ରେନର ଓଲେକଜାଣ୍ଡର ଚିର୍କୋଭଙ୍କଠାରୁ ହାରିଯାଇଥିଲେ ମଧ୍ୟ ୩ ମ୍ୟାଚରୁ ୨ଟିରେ ବିଜୟୀ ହୋଇଥିବାରୁ ପ୍ରି-କ୍ୱାର୍ଟରରେ ପହଞ୍ଚତ୍ଛନ୍ତି। ଡବଲ୍ସରେ ଦିଲେଶ୍ୱର-ଶୁଭ୍ରଜିତ ମହାରଣା ଯୋଡ଼ି ପେରୁର ରେଞ୍ଜୋ ଡିକ୍ୱେଜ ବନ୍ସେସ ମୋରାଲେସ ଓ ପେତ୍ରୋ ପାବ୍ଲୋ ଡି ଭିନାଟାଙ୍କୁ ୨୧-୯, ୨୧-୧୯ରେ ପରାସ୍ତ କରିଛନ୍ତି। ଅନ୍ୟ ୨ଟି ଡବଲ୍ସ ମ୍ୟାଚରେ ଦୀପ୍ ରଞ୍ଜନ ବିଷୋୟୀ ଓ ମନୋଜ ସରକାରଙ୍କ ଯୋଡ଼ି ଚାଇନାର ଗାଓ ୟୁୟାଙ୍ଗ୍ ଓ ୟାଙ୍ଗ୍ ଜିଆନୟୁଆନଙ୍କୁ ଏବଂ ସେହି ଦେଶର ଡୋମିନିକ୍ ବୁଜ୍ବର୍ଗର ଓ ମାଉରିନ୍ ଷ୍ଟୁବିଙ୍କୁ ହରାଇ ଦେଇଛନ୍ତି।