ଭୁବନେଶ୍ୱର,୧।୭(ବ୍ୟୁରୋ):ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରର ନୂତନ ନିର୍ଦ୍ଦେଶକ ହେଲେ ପ୍ରସନ୍ନ ପ୍ରଧାନ। ସେ ଗୁରୁବାର ଦାୟିତ୍ୱ ଗ୍ରହଣ କରିଛନ୍ତି। ଏହାପୂର୍ବରୁ ସେ ଦିଲ୍ଲୀର କର୍ପୋରେଟ୍ ମୁଖ୍ୟାଳୟରେ ଜେନେରାଲ ମ୍ୟାନେଜର(ଆଡ଼ମିନ) ଭାବେ କାର୍ଯ୍ୟରତ ଥିଲେ। ଇଞ୍ଜିନିୟରିଂ ଗ୍ରାଜୁଏଟ ପ୍ରଧାନଙ୍କ ଏୟାର ଟ୍ରାଫିକ ମ୍ୟାନେଜମେଣ୍ଟ, ଆଭିଏଶନ ଇକୋନୋମିକ୍ସ ଭଳି ବିଭିନ୍ନ କ୍ଷେତ୍ରରେ ବହୁ ଅଭିଜ୍ଞତା ରହିଛି। ସେ ସମସ୍ତ ଭାରତୀୟ ବିମାନବନ୍ଦର ଓ ଏୟାର ସ୍ପେସରେ ବିମାନବନ୍ଦର ସୂଚନା ପରିଚାଳନା ବ୍ୟବସ୍ଥାର ବିକାଶରେ ସହଯୋଗ କରିଛନ୍ତି। ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଦ୍ୱାରା ଗଠିତ ନରେଶ ଚନ୍ଦ୍ର କମିଟି, ଅଜୟ ପ୍ରସାଦ କମିଟି ଏବଂ ଅଶୋକ ଚାଓ୍ବଲା କମିଟି ପରି ବିଭିନ୍ନ କମିଟିରେ ସାମିଲ ହୋଇ ଭାରତରେ ବିମାନ ଚଳାଚଳ ରୋଡ୍ ମାନଚିତ୍ରର ବିସ୍ତାର କ୍ଷେତ୍ରରେ ସଫଳତାର ସହ ଦାୟିତ୍ୱ କରିଛନ୍ତି। ଏହା ବ୍ୟତୀତ ସେ ନୂଆଦିଲ୍ଲୀ, ଗୁଆହାଟୀ ଏବଂ ଖଜୁରାହୋ ବିମାନବନ୍ଦରରେ ମଧ୍ୟ କାର୍ଯ୍ୟ କରିଛନ୍ତି। ଏବେ ଭୁବନେଶ୍ୱର ବିମାନବନ୍ଦର ନିର୍ଦ୍ଦେଶକ ଭାବେ ତାଙ୍କୁ ଅବସ୍ଥାପିତ କରାଯାଇଥିବାବେଳେ ବିମାନବନ୍ଦରର ଯାତ୍ରୀ ସୁବିଧା, ଏୟାରସାଇଡର ଦକ୍ଷତା ବୃଦ୍ଧି ସହିତ ଅନ୍ୟାନ୍ୟ ସହଯୋଗୀ ଭିତ୍ତିଭୂମି ଏବଂ ସେବା ପରିଚାଳନା ଉପରେ ତାଙ୍କର ଫୋକସ୍ ରହିବ।
