ଖୋର୍ଦ୍ଧା,୨୩ା୩ (ପ୍ରଭାତ ପାଣିଗ୍ରାହୀ): ଆଗାମୀ ନିର୍ବାଚନ ପାଇଁ ତାରିଖ ଘୋଷଣା ହେବା ପରେ ରାଜନୈତିକ ଦଳଗୁଡ଼ିକ ମଧ୍ୟରେ ତତ୍ପରତା ପ୍ରକାଶ ପାଇଛି। ଖୋର୍ଦ୍ଧା ଜିଲା ଚିଲିକା ନିର୍ବାଚନମଣ୍ଡଳୀରେ ଶାସକ ଦଳରେ ଆଶାୟୀ ପ୍ରାର୍ଥୀଙ୍କ ମଧ୍ୟରେ ଛକାପଞ୍ଝା ଆରମ୍ଭ ହୋଇଯାଇଛି। ସମସ୍ତେ ନିଜ ସ୍ତରରେ ସମର୍ଥକଙ୍କ ସହ ଶକ୍ତି ପ୍ରଦର୍ଶନରେ ଲାଗିପଡ଼ିଛନ୍ତି। ଏପରିକି ଶୁକ୍ରବାର ଭାଜପା ରାଜ୍ୟ ସଭାପତି ମନମୋହନ ସାମଲ ସୋସିଆଲ ମିଡିଆ ‘ଏକ୍ସ’ ଜରିଆରେ ଭାଜପା ଏକାକୀ ଲଢ଼ିବ ବୋଲି କହିବା ପରେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ (ବବି) ଦଳ ପ୍ରସ୍ତୁତ ଥିବା କହିଛନ୍ତି। ବବିଙ୍କ ମତ ଜାଣିବା ପରେ ବିଜେଡି ଆଶାୟୀମାନେ ଉତ୍ସାହିତ ହୋଇପଡ଼ିଥିବା ଲକ୍ଷ୍ୟ କରାଯାଉଛି।
ନିକଟରେ ନବୀନ ନିବାସରେ ପୁରୀ ଲୋକ ସଭା ଆସନ ଅନ୍ତର୍ଗତ ସମସ୍ତ ବିଧାନସଭା କ୍ଷେତ୍ର ପାଇଁ ଦଳୀୟ ଆଶାୟୀ ପ୍ରାର୍ଥୀ ଯୋଗ ଦେଇଥିଲେ। ଏଥିରେ ଦଳରୁ ପୂର୍ବତନ ଏମ୍ପି ପ୍ରସନ୍ନ ପାଟଶାଣୀ ଓ ବରିଷ୍ଠ ନେତା ଅରୂପ ପଟ୍ଟନାୟକ ଉପସ୍ଥିତ ଥିଲେ। ପ୍ରସନ୍ନ ଚିଲିକାରୁ ବିଧାୟକ ପ୍ରାର୍ଥୀ ଭାବେ ଲଢ଼ିବା ସ୍ଥିର ହୋଇଥିବା ଚର୍ଚ୍ଚା ହେବା ପରେ ଦଳରେ ଏହାକୁ ନେଇ ଆଲୋଡ଼ନ ସୃଷ୍ଟି ହୋଇଥିଲା। ପ୍ରସନ୍ନଙ୍କ ଜନ୍ମସ୍ଥାନ ଚିଲିକା ଅଞ୍ଚଳ ହୋଇଥିବା ବେଳେ ତାଙ୍କ କର୍ମଭୂମି ଖୋର୍ଦ୍ଧା ଏବଂ ଭୁବନେଶ୍ୱର ରହିଛି। ସେ ଖୋର୍ଦ୍ଧାରୁ କ୍ରମାଗତ ୪ଥର ବିଧାୟକ ରହିଥିବା ବେଳେ ଏକାଧିକ ଥର ଭୁବନେଶ୍ୱର ଏମ୍ପି ରହିଥିଲେ। ଚିଲିକା ନିର୍ବାଚନମଣ୍ଡଳୀରେ ତାଙ୍କର କୌଣସି ଭୂମିକା ନ ଥିବା ବେଳେ ଏଠାରୁ ତାଙ୍କର ପ୍ରାର୍ଥତ୍ତ୍ୱକୁ ନେଇ ଦଳୀୟ ମହଲରେ ଅସନ୍ତୋଷ ଦେଖାଦେଇଛି। ୨୦୧୯ରେ ଏଠାରୁ ପ୍ରଶାନ୍ତ ଜଗଦ୍ଦେବ ବିଜୟୀ ହୋଇଥିବା ସତ୍ତ୍ୱେ ପରବର୍ତ୍ତୀ ସମୟରେ ତାଙ୍କ ବ୍ୟବହାର ଖରାପ ହେବାରୁ କେବଳ ଚିଲିକା ବିଧାନସଭା ନିର୍ବାଚନମଣ୍ଡଳୀ ନୁହେଁ, ସାରା ଓଡ଼ିଶାରେ ସେ ନିନ୍ଦିତ ହୋଇଥିଲେ। ଏଭଳି ସ୍ଥଳେ ଦଳ ତା’ର ଭୁଲ ସୁଧାରି ଚଳିତ ବର୍ଷ ଯୁବ ନେତୃତ୍ୱକୁ ସ୍ଥାନ ଦେଉ ବୋଲି ଦାବି ହେଲାଣି। ଦଳ ଚାହିଁଲେ ଏଠାରୁ ସେ ଲଢ଼ିବେ ବୋଲି ପ୍ରସନ୍ନ ଗଣମାଧ୍ୟମ ଆଗରେ କହିଛନ୍ତି। ହେଲେ ତାଙ୍କ ପ୍ରାର୍ଥତ୍ତ୍ୱ ପ୍ରତି ଦଳୀୟ ବିରୋଧ ବଢ଼ୁଥିବାରୁ ଚିଲିକା ନିର୍ବାଚନମଣ୍ଡଳୀରେ ବିଜେଡି କର୍ମୀଙ୍କ ମଧ୍ୟରେ ଭିନ୍ନ ବାତାବରଣ ସୃଷ୍ଟି ହୋଇଛି। ପୁଣି ଚିଲିକାରୁ ପ୍ରସନ୍ନଙ୍କ ନାଁ ଉଠିବା ପରେ ପୂର୍ବତନ ବିଧାୟକ ରଘୁନାଥ ସାହୁଙ୍କ ସମର୍ଥକମାନେ ଦଳୀୟ ନିଷ୍ପତ୍ତିକୁ ସହଜରେ ଗ୍ରହଣ କରିପାରିନାହାନ୍ତି। ଦୀର୍ଘ ବର୍ଷ ଧରି ସେ ନିଜର ସଙ୍ଗଠନ ବଢ଼ାଇ ଚାଲିଥିବା ବେଳେ ଦଳ ଟିକେଟ ନ ଦେଲେ ତାଙ୍କ ଆଗାମୀ ରଣନୀତି କ’ଣ ହେବ ତାହାକୁ ନେଇ ବିଭିନ୍ନ ମହଲରେ ଚର୍ଚ୍ଚା ଚାଲିଛି। ତେବେ ସେ ଏବେବି ଶୀର୍ଷ ନେତୃତ୍ୱଙ୍କ ଉପରେ ଭରସା ରଖିଥିବା କହୁଛନ୍ତି।