ନୂଆଦିଲ୍ଲୀ,୨।୧୧: ରାଜନୈତିକ ରଣନୀତିକାରରୁ ଜନସୁରାଜ ପାର୍ଟିରୁ ରାଜନେତା ପାଲଟିଥିବା ପ୍ରଶାନ୍ତ କିଶୋର କରିଛନ୍ତି ବଡ଼ ଖୁଲାସା। ରାଜନୀତିର ଚାଣକ୍ୟ ଭାବେ ବିବେଚିତ ପ୍ରଶାନ୍ତ କିଶୋର ବହୁ ରାଜନୈତିକ ପାର୍ଟିର ପରାମର୍ଶଦାତା ଭାବେ ଦାୟିତ୍ୱ ତୁଲାଇ ସାରିଛନ୍ତି। ବହୁ ଦଳ ତାଙ୍କ ଉପଦେଶ ପାଇ ଶାସନ କ୍ଷମତାକୁ ଫେରିଛନ୍ତି, ଆସିଛନ୍ତି କିମ୍ବା ବହୁ ବର୍ଷରୁ ଥିବା ଦଳକୁ ଚିତ ପଟାଙ୍ଗ ମଧ୍ୟ କରିଛନ୍ତି। ତେବେ ରାଜନୀତି ଗୋଟି ଚାଳନାରେ ସିଦ୍ଧହସ୍ତ ଥିବା ପ୍ରଶାନ୍ତ କିଶୋର ବା ପିକେ ପଲଟିକାଲ ପାର୍ଟିମାନଙ୍କୁ ଉପଦେଶ ଦେବାକୁ କେତେ ଟଙ୍କା ନିଅନ୍ତି ଜାଣିଛନ୍ତି କି?
ଏହାକୁ ନେଇ ସବୁବେଳେ ସସପେନ୍ସ ଲାଗି ରହୁଥିବା ବେଳେ ଏହାର ବଡ଼ ଖୁଲାସା କରିଛନ୍ତି ପିକେ। ଯେକୌଣସି ପଲଟିକାଲ ପାର୍ଟି ନିମନ୍ତେ ରଣନୀତି ପ୍ରସ୍ତୁତ କରିବା ପାଇଁ ପିକେ ଡିମାଣ୍ଡ କରନ୍ତି ଶହେ କୋଟି। ଏହା ଖୋଦ ଗଣମାଧ୍ୟମରେ ଖୁଲାସା କରିଛନ୍ତି ପ୍ରଶାନ୍ତ କିଶୋର। ବିହାରରେ ଏକ ନିର୍ବାଚନୀ ସଭାରେ ଉଦବୋଧନ ଦେଉଥିବା ବେଳେ ସେ ଏପରି ଖୁଲାସା କରିଛନ୍ତି।
ପ୍ରଶାନ୍ତ କିଶୋର ନିଜର ରାଜନୈତିକ ଦଳ ‘ଜନ ସୁରାଜ’ ପାର୍ଟି ଲଞ୍ଚ କରିଛନ୍ତି। ତେବେ ଏଥିପାଇଁ ସେ କିପରି ଟଙ୍କା ଯୋଗାଡ କରୁଛନ୍ତି ବୋଲି ତାଙ୍କୁ ପ୍ରଶ୍ନ ପଚରାଯାଉଛି। ଏହାର ଉତ୍ତର ଦେବାକୁ ଯାଇ ସେ କହିଛନ୍ତି, ମୋ’ ନିଜ ଦଳ ନିମନ୍ତେ ମୁଁ ପର୍ଯ୍ୟାପ୍ତ ଟଙ୍କା ରଖିଛି। କେବଳ ସେତିକି ନୁହେଁ, ନିର୍ବାଚନୀ ସଭା ଠାରୁ ଆରମ୍ଭ କରି ଟେଣ୍ଟ ବାନ୍ଧିବା ଓ ଖୁଣ୍ଟ ପୋତିବା ଯାଏ ମୋ ପାଖରେ ଟଙ୍କାର ଅଭାବ ନାହିଁ। କାରଣ କେବଳ ଉପଦେଶ ଦେବା ନିମନ୍ତେ ମୁଁ ଶହେ କୋଟି ଚାର୍ଜ କରୁଛି। ତେଣୁ ମାତ୍ର ଗୋଟିଏ ପଲଟିକାଲ ପାର୍ଟିକୁ ଉପଦେଶ ଦେଇ ପାଉଥିବା ଟଙ୍କାରେ ମୁଁ ଆସନ୍ତା ୨ ବର୍ଷ ପାଇଁ ମୋ’ ଦଳର ଖର୍ଚ୍ଚ ତୁଲାଇ ପାରିବି। ଏଥିସହ ସେ କହିଛନ୍ତି, ମୋ’ ରଣନୀତି ଯୋଗୁ ୧୦ଟି ରାଜ୍ୟରେ ବିଭିନ୍ନ ଦଳ ଏବେ କ୍ଷମତାରେ ବସିଛନ୍ତି। ସେମାନେ ଶାସନ କଳ ସମ୍ଭାଳୁଛନ୍ତି। ତେଣୁ ମୋ’ ନିଜ ଦଳର ପରିଚାଳନା ନିମନ୍ତେ ମୁଁ ରଣନୀତି ପ୍ରସ୍ତୁତ କରି ନ ଥିବି ବୋଲି ଭାବିବା ବୋକାମି।
ଚଳିତ ମାସ ୧୩ ତାରିଖରେ ହେବାକୁ ଥିବା ବିହାରର ୪ ବିଧାନସଭା ଆସନ ନିମନ୍ତେ ହେଉଥିବା ଉପ ନିର୍ବାଚନ ପାଇଁ ରାଜନୈତିକ ପାର୍ଟିମାନେ ଜୋରସୋରରେ ପ୍ରଚାର ଅଭିଯାନ ଚଳାଇଛନ୍ତି। ପ୍ରଶାନ୍ତ କିଶୋରଙ୍କ ଦଳ ‘ଜନ ସୁରାଜ’ ପାର୍ଟି ପକ୍ଷରୁ ୪ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଯାଇଛି। ଖୋଦ ପ୍ରଶାନ୍ତ କିଶୋର ନିଜେ ମଇଦାନକୁ ଓହ୍ଲାଇ ନ ଥିବା ବେଳେ ନିଜ ପ୍ରାର୍ଥୀଙ୍କ ପାଇଁ ଫୁଲ ଦମ୍ରେ ପ୍ରଚାରରେ ମାତି ଯାଇଛନ୍ତି। ଆସନ୍ତା ୨୩ ତାରିଖରେ ଏହାର ଫଳାଫଳ ପ୍ରକାଶ ପାଇବ।