ନୂଆଦିଲ୍ଲୀ,୨୮।୮: ଲୋକ ସଭାରେ କଂଗ୍ରେସ ଏମପି ତଥା ବିରୋଧୀଦଳର ନେତା ରାହୁଲ ଗାନ୍ଧୀ ଜାତିଗତ ଜନଗଣନା ନେଇ ନିରନ୍ତର ଦାବି କରୁଛନ୍ତି। ସେ କହିଛନ୍ତି ଯେ, ଏହା ମାଧ୍ୟମରେ ଆମେ ଜାଣିବାକୁ ପାଇବା ଯେ କେଉଁ ସମାଜ କେତେ ପଛୁଆ ବର୍ଗରେ ଅଛି। ଅନେକ ଦଳ ମଧ୍ୟ ତାଙ୍କ ଦାବିକୁ ସମର୍ଥନ କରିଛନ୍ତି। ଏହି ସମୟରେ ଜନସୁରଜ ପ୍ରତିଷ୍ଠାତା ପ୍ରଶାନ୍ତ କିଶୋର, ରାହୁଲଙ୍କୁ ନେଇ ବଡ଼ ବୟାନ ଦେଇଛନ୍ତି। ସେ କହିଛନ୍ତି, ରାହୁଲଙ୍କ ଦଳର ପତାକା ଉତ୍ତୋଳନ କରିବାକୁ ମୁଁ ପ୍ରସ୍ତୁତ, କିନ୍ତୁ ଜାତିଗତ ଜନଗଣନା ମାଧ୍ୟମରେ କଂଗ୍ରେସ ଦାରିଦ୍ର୍ୟ ଦୂରୀକରଣ କରି ଦେଖାଉ।
ଜନଗଣନା ବିଷୟରେ ରାହୁଲ ଗାନ୍ଧୀ ଆଲୋଚନା କରିଛନ୍ତି। ସେ କହିଛନ୍ତି, ୯୦ ପ୍ରତିଶତ ଲୋକ ସିଷ୍ଟମରେ ନାହାଁନ୍ତି। ଏହାର ଜବାବରେ ପ୍ରଶାନ୍ତ କିଶୋର କହିଛନ୍ତି, ଆମେ ଗତ ଦୁଇ ବର୍ଷ ଧରି ଜାତିଗତ ଜନଗଣନା ସଂପର୍କରେ ବିବୃତ୍ତି ଦେଉଛୁ। ଜନଗଣନା ନିହାତି ହେବା ଉଚିତ। ଏଥିରେ କୌଣସି ଅସୁବିଧା ନାହିଁ। କିନ୍ତୁ ଜନଗଣନା ସରିବା ପରେ ସମସ୍ତଙ୍କର ଦାରିଦ୍ରତା ଏବଂ ସମସ୍ୟା ଦୂର ହୋଇଯିବ ତାହା ଘଟିବ ନାହିଁ।
ପ୍ରଶାନ୍ତ କିଶୋର ଆହୁରି କହିଛନ୍ତି, ଆମ ପାଖରେ ବର୍ତ୍ତମାନ ଜନଗଣନା ତଥ୍ୟ ଅଛି, ଯାହା ଦର୍ଶାଏ ଯେ ଏସସି-ଏସଟି ସମ୍ପ୍ରଦାୟର ଲୋକମାନେ ସବୁଠାରୁ ଗରିବ ଏବଂ ଅର୍ଥନୈତିକ-ସାମାଜିକ ଦୃଷ୍ଟିରୁ ପଛୁଆ। ରାହୁଲ ଗାନ୍ଧୀ କିମ୍ବା ସେହି ସମସ୍ତ ଲୋକ ଯେଉଁମାନେ ଜାତି ଜନଗଣନା କରିବାକୁ ଚାହୁଁଛନ୍ତି ସେମାନେ ଏହାର ଜବାବ ରଖନ୍ତୁ। ଏସସି-ଏସଟି ସମାଜର ଅବସ୍ଥା ବର୍ତ୍ତମାନ ପର୍ଯ୍ୟନ୍ତ କାହିଁକି ଉନ୍ନତ ହୋଇନାହିଁ, ଜନଗଣନା ଦ୍ୱାରା ଆପଣ କେବଳ ସୂଚନା ପାଇବେ, କିନ୍ତୁ ଏହା ଆପଣଙ୍କ ଅବସ୍ଥାରେ ଉନ୍ନତି ଆଣିବ ନାହିଁ। ଏହା ସମାନ କଥା ଯେ ଆପଣ ଲାଇବ୍ରେରୀକୁ ଯାଇ ପଣ୍ଡିତ ହୋଇପାରିବେ ନାହିଁ। ଆପଣଙ୍କୁ ସେଠାରେ ପଢିବାକୁ ପଡିବ।
ରାହୁଲ ଗାନ୍ଧୀ ଉତ୍ତର ରଖନ୍ତୁ ଯେ, ତାଙ୍କ ସରକାର ୬୦ବର୍ଷ ଧରି କ୍ଷମତାରେ ଥିଲେ, ତେବେ ଜାତିଗତ ଜନଗଣନା କାହିଁକି କରାଗଲା ନାହିଁ। ଯେଉଁ ରାଜ୍ୟଗୁଡିକରେ କଂଗ୍ରେସ ସରକାର ଅଛି ସେଠାରେ ଜାତି ଜନଗଣନା କରାଯାଉ। ଜନଗଣନା କରି ସେ ଦରିଦ୍ରତା ଦୂର କରି ଦିଅନ୍ତୁ ଆମେ ସମସ୍ତେ ତାଙ୍କ ଦଳର ପତାକା ଧରି ବୁଲିବୁ ବୋଲି ପିକେ କହିଛନ୍ତି।