ଭୁବନେଶ୍ଵର,୨୧।୧୨: ଗୁରୁ ଦେବପ୍ରସାଦ ନୃତ୍ୟ ଧାରା, ସିଙ୍ଗାପୁର ପକ୍ଷରୁ ପ୍ରଥମ ଥର ପାଇଁ ଭୁବନେଶ୍ବର ସ୍ଥିତ ଜିକେସିଏମ ଓଡ଼ିଶୀ ଗବେଷଣା ପ୍ରତିଷ୍ଠାନର ଉତ୍କଳ ରଙ୍ଗମଞ୍ଚରେ ନୃତୋତ୍ସବ” ପ୍ରତିଧ୍ଵନି” ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମକୁ ଗୁରୁ ପଦ୍ମଶ୍ରୀ ଅରୁଣା ମହାନ୍ତି ଉଦଘାଟନ କରିଥିଲେ। ଅନ୍ୟ ଅତିଥି ଭାବେ ଗୁରୁ ରତିକାନ୍ତ ମହାପାତ୍ର, ଗୁରୁ ସୁକାନ୍ତ କୁମାର କୁଣ୍ଡୁ, ଚଳଚ୍ଚିତ୍ର ଅଭିନେତା ଅନୁଭବ ମହାନ୍ତି ଯୋଗ ଦେଇଥିଲେ।
ବର୍ଷା ଭିଜା ଶୀତୁଆ ସନ୍ଧ୍ୟାର ମୁଖ୍ୟ ଆକର୍ଷଣ ଥିଲା ପୋରାଣିକ କଥାବସ୍ତୁ ଆଧାରିତ ଗ୍ରୁପ୍ ନୃତ୍ୟ ନାଟିକା “ବୃନ୍ଦା”। ଗୁରୁ ଦେବପ୍ରସାଦ ଦାସ ନୃତ୍ୟ ଧାରା, ସିଙ୍ଗାପୁରର ଛାତ୍ରୀ ମାନଙ୍କ ଦ୍ବାରା ଅତି ନିଖୁଣ ଭାବରେ ପରିବେଷିତ ଓଡ଼ିଶୀ ନୃତ୍ୟ ନାଟିକା ବୃନ୍ଦା ଦର୍ଶକଙ୍କ ମନ ମୋହି ଥିଲା। ଏହି ନୃତ୍ୟ ନାଟିକାର ନିର୍ଦ୍ଦେଶନା ଦେଇଥିଲେ ସିଙ୍ଗାପୁର ସ୍ଥିତ ଉକ୍ତ ଅନୁଷ୍ଠାନର ଗୁରୁ ସସ୍ମିତା ପାଳ। ନୃତ୍ୟ କୋରିଓଗ୍ରାଫି ଓ ଗୀତ ଗୁରୁ ବିଜନ କୁମାର ପିଲାଇ କରିଥିଲେ। ଛନ୍ଦ ରଚନା ଗୁରୁ ଧନେଶ୍ଵର ସ୍ୱାଇଁ ଓ ସଙ୍ଗୀତ ରଚନା ଗୁରୁ ସୁକାନ୍ତ କୁମାର କୁଣ୍ଡୁ କରିଥିଲେ।
ଲିତାଲି ମହାପାତ୍ର, କୃତ୍ତିକା ତ୍ରିପାଠୀ, ପ୍ରିୟା ଦାଶ, ପ୍ରୀତି ଦାଶ, ସ୍ମୃତି ପ୍ରଜ୍ଞା ମହାନ୍ତି, ଆୟୁଷି ପ୍ରଧାନ, ରାମେଶ୍ୱରୀ ମହାନ୍ତି, ବେଷ୍ଓବୀ ବାରିକ, ଅନୁସ୍ମିତା ସାବତ, ଶ୍ରେୟାଶି ପ୍ରଧାନ, ପୂଜା ପ୍ରିୟା ମହାନ୍ତି,ଶିଳ୍ପୀ ମହାପାତ୍ର, ନୃତ୍ୟ ପରିବେଷଣ କରିଥିଲେ। ସିଙ୍ଗାପୁରର ପିକୋଟେକ୍ ସଲ୍ୟୁସନ୍ସ ପ୍ରାଇଭେଟ୍ ଲିମିଟେଡ ପ୍ରାୟୋଜିତ ଏହି ସାଂସ୍କୃତିକ କାର୍ଯ୍ୟକ୍ରମର ପ୍ରାରମ୍ଭରେ ଗୁରୁ ପ୍ରଭାତ କୁମାର ସ୍ବାଇଁଙ୍କ ଦ୍ଵାରା ବରବଧୂ ସୋଲୋ ପ୍ରଦର୍ଶନ ହୋଇଥିଲା। ଏହାପରେ ପ୍ରକୃତି ପୁରୁଷ ନୃତ୍ୟରେ ଯୁଗଳ ପ୍ରଦର୍ଶନ କରିଥିଲେ ଦିପ୍ତିରଞ୍ଜନ ବରାଳ ଓ ହିମାଂଶୁ ରାୟ। ଏହି ଅବସରରେ ପ୍ରସିଦ୍ଧ ନୃତ୍ୟ ଓ ସଙ୍ଗୀତ ଗୁରୁ ମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଓଡିଶୀ ଡ୍ୟାନ୍ସ ଏକାଡେମୀ ଓ ନୃତ୍ୟ ନୈବେଦ୍ୟ ସହଯୋଗ ରେ ଓଡ଼ିଶୀ ନୃତ୍ୟ ଉତ୍ସବ ଆୟୋଜିତ ହୋଇଥିଲା।