ପ୍ରୟାଗରାଜ,୨୮।୮: ପାକିସ୍ତାନ ଓ ଚାଇନା ସହ ଜାରି ରହିଥିବା ସୀମା ବିବାଦ ମଧ୍ୟରେ ଭାରତ ସରକାର ୩ସେନା ବାହିନୀକୁ ଲଗାତାର ସଶକ୍ତ ଓ ଆଧୁନିକୀକରଣ କରିବାକୁ ଉଦ୍ୟମ ଚଳାଇଛନ୍ତି। ଏଥିପାଇଁ ବାୟୁସେନାର ଅଧିନରେ ଆଉ ଏକ ନୂଆ ଏୟାର ଡିଫେନ୍ସ ଉତ୍ତରପ୍ରଦେଶ ପ୍ରୟାଗରାଜରେ ଗଠନ କରାଯିବ। ଚଳିତ ବର୍ଷ ଅକ୍ଟୋବର ଦ୍ୱିତୀୟ ସପ୍ତାହ ଅର୍ଥାତ୍ ୮ତାରିଖରେ ଏନେଇ ଘୋଷଣା କରାଯିବ ବୋଲି ଜଣାପଡ଼ିଛି। କାରଣ ଅକ୍ଟୋବର ୮ରେ ବାୟୁସେନା ଦିବସ ପାଳିତ ହେବ। ଭାରତୀୟ ବାୟୁସେନାର ସେଣ୍ଟ୍ରାଲ କମାଣ୍ଡ ସହିତ ପ୍ରୟାଗରାଜର ଏୟାର ଡିଫେନ୍ସ କମାଣ୍ଡକୁ ସଂଯୋଗ କରାଯିବ। ଏପର୍ଯ୍ୟନ୍ତ ଆଗ୍ରା, ଗ୍ବାଲିଅର ଓ ବରେଲି ଏୟାରବେସ୍ ସେଣ୍ଟ୍ରାଲ କମାଣ୍ଡ ଅଧୀନରେ ଆସୁଥିଲେ। ଏହି କମାଣ୍ଡ ଗଠନ କରିବାର ମୁଖ୍ୟ ଉଦ୍ଦେଶ୍ୟ ହେଉଛି ୩ସୈନ୍ୟ ବାହିନୀଙ୍କ ମଧ୍ୟରେ ସମନ୍ବୟ ରକ୍ଷା କରିବା। ଏଥିସହ ଦେଶର ବୃହତ ବାୟୁକ୍ଷେତ୍ରକୁ ସୁରକ୍ଷିତ କରିବା। ତେବେ କମାଣ୍ଡ ପ୍ରତିଷ୍ଠା କରିବା ପାଇଁ ପ୍ରସ୍ତୁତି ଜୋରସୋରରେ ଚାଲିଛି। ଆଉ ଏହାର ନେତୃତ୍ୱ ଭାରତୀୟ ବାୟୁସେନାର ଏୟାର ମାର୍ଶଲ କରିବେ ବୋଲି ସୂଚନା ରହିଛି।