ମଥୁରା,୨।୧୧: ଦିଲ୍ଲୀରୁ ସଦ୍ଭାବନା ଯାତ୍ରା ଆରମ୍ଭ କରିଥିବା ଦୁଇ ମୁସଲମାନ୍ ଶ୍ରଦ୍ଧାଳୁ ମଥୁରାର ନନ୍ଦଗାଓ୍ବଁର ନନ୍ଦବାବା ମନ୍ଦିର ପରିସରରେ ଶନିବାର ନମାଜ ପଢ଼ିଥିବା ଖବର ପ୍ରଚାରିତ ହେବାପରେ ଏନେଇ ବିବାଦ ଆରମ୍ଭ ହୋଇଛି। ଦିଲ୍ଲୀର ଫୈଜଲ ଖାଁ ଏବଂ ମହମ୍ମଦ୍ ଚାନ୍ଦ୍ ଗାନ୍ଧୀବାଦୀକର୍ମୀ ନିଲେଶ ଗୁପ୍ତା ଏବଂ ଆଲୋକ ରତ୍ନଙ୍କ ସହିତ ସଦ୍ଭାବନା ଯାତ୍ରାରେ ଆସି ନନ୍ଦଗାଓ୍ବଁରେ ପହଞ୍ଚିଥିଲେ। ନନ୍ଦବାବା ମନ୍ଦିରରେ ସେମାନେ ପ୍ରଭୁ ଶ୍ରୀକୃଷ୍ଣଙ୍କୁ ଦର୍ଶନ କରିଥିଲେ। ତେବେ ଏହି ୪ ଜଣଙ୍କ ବିରୋଧରେ ଧାରା ୧୫୩-କ, ୨୯୫ ଏବଂ ୫୦୫ ଅନ୍ତର୍ଗତ ମାମଲା ଦାଏର କରାଯାଇଛି। ଅଭିଯୁକ୍ତଭାବେ ମନ୍ଦିର ସେବାୟତଙ୍କୁ ଭ୍ରମିତ କରି ଏଭଳି କରିଥିବା ଅଭିଯୋଗ ମନ୍ଦିର ପ୍ରଶାସନ ପକ୍ଷରୁ କରାଯାଇଛି। ଅଭିଯୁକ୍ତମାନେ ଉଠାଯାଇ ଥିବା ଫଟୋର ଦୂରୁପଯୋଗ କରିବାର ଆଶଙ୍କା ଥିବା ଅଭିଯୋଗ ହୋଇଛି। ସୂଚନାଯୋଗ୍ୟ ନନ୍ଦବାବା ମନ୍ଦିରର ସେବାୟତ କୃଷ୍ଣ ମୁରାରୀ ଗୋସ୍ବାମୀ ସଦ୍ଭାବନା ଦଳଙ୍କୁ ସ୍ବାଗତ କରିବା ସହିତ ପ୍ରଭୁଙ୍କ ପ୍ରସାଦ ମଧ୍ୟ ପ୍ରଦାନ କରିଥିଲେ। ମାତ୍ର ସେ ନମାଜ ପାଠ ସମ୍ପର୍କରେ କିଛି ଜାଣି ନ ଥିବା କହିଛନ୍ତି।