ଢେଙ୍କାନାଳ ଅଫିସ, ୧୯ା୭-ଢେଙ୍କାନାଳ ସହରସ୍ଥିତ ଏକ ଘରୋଇ ହସ୍ପିଟାଲକୁ ପ୍ରସବ ଲାଗି ଆସିଥିବା ଜଣେ ମହିଳା କରୋନା ଆକ୍ରାନ୍ତ ବୋଲି ଜଣାପଡ଼ିଛି। ଏହାପରେ ପୌରସଂସ୍ଥା ପକ୍ଷରୁ ରବିବାର ସହରରେ ଥିବା ୮ ନର୍ସିଂହୋମ୍, କ୍ଲିନିକ ଏବଂ ଔଷଧ ଦୋକାନକୁ ସିଲ୍ କରାଯାଇଛି। ଏଥିସହ ରୋଗୀଙ୍କ ସଂସ୍ପର୍ଶରେ ଆସିଥିବା ଡାକ୍ତର, ଷ୍ଟାଫ୍ନର୍ସ, କର୍ମଚାରୀଙ୍କ ସମେତ ୬୦ଜଣଙ୍କୁ ହୋମ୍ କ୍ୱାରାଣ୍ଟାଇନ୍ରେ ରଖାଯାଇଛି। ସିଲ୍ ହୋଇଥିବା କ୍ଲିନିକ୍ଗୁଡ଼ିକ ମଧ୍ୟରେ ଜଗନ୍ନାଥ, ସାଇ, ଦିଶା, ଦିପାଳୀ, ତୁଳସୀ ଅଛନ୍ତି। ସେହିପରି ଚନ୍ଦନବଜାର ଓ ଗୁଡିଆନାଳୀ ଅଞ୍ଚଳରେ ଥିବା ୨ଟି ଅଲଟ୍ରାସାଉଣ୍ଡ୍ ସେଣ୍ଟର ଏବଂ ଗୋଟିଏ ଔଷଧ ଦୋକାନକୁ ମଧ୍ୟ ସିଲ୍ କରାଯାଇଥିବା ପୌରସଂସ୍ଥା ଯନ୍ତ୍ରୀ ରଶ୍ମିତା ମିଶ୍ର ସୂଚନା ଦେଇଛନ୍ତି। ସମ୍ପୃକ୍ତ ମହିଳା ଜଣକ ପ୍ରସବ ଲାଗି ଜଗନ୍ନାଥ ଘରୋଇ ଚିକିତ୍ସାଳୟକୁ ଆସିଥିଲେ। ତାଙ୍କ ଶ୍ୱାସକ୍ରିୟାରେ ସମସ୍ୟା ହେବାରୁ ତାଙ୍କୁ ଭୁବନେଶ୍ୱରସ୍ଥିତ ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ସେଠାରେ ସ୍ବାବ୍ ଟେଷ୍ଟ ପରେ ତାଙ୍କ ରିପୋର୍ଟ ପଜିଟିଭ୍ ଆସିଥିଲା।