ହାଙ୍ଗଝୋ,୧।୧୦: ଭାରତୀୟ ବକ୍ସର ପ୍ରୀତି ପାଓ୍ବାର ଚଳିତ ଏସିଆନ୍ ଗେମ୍ସ ସେମିଫାଇନାଲରେ ପ୍ରବେଶ କରି ପଦକ ନିଶ୍ଚିତ କରିଛନ୍ତି। ଏହା ସହିତ ଆସନ୍ତା ପ୍ୟାରିସ୍ ୨୦୨୪ ପାଇଁ ଯୋଗ୍ୟତା ଅର୍ଜନ କରିଛନ୍ତି। ସେହିପରି ଅଲିମ୍ପିକ୍ସ ପଦକ ବିଜୟିନୀ ଲଭଲିନା ବୋର୍ଗୋହେନ୍ ମଧ୍ୟ ସେମିରେ ପ୍ରବେଶ କରିଛନ୍ତି। ଅଲିମ୍ପିକ୍ସ ଯୋଗ୍ୟତା ହାସଲ କରିବା ପାଇଁ ଲଭଲିନାଙ୍କୁ ଆଉ ଏକ ବିଜୟ ଆବଶ୍ୟକ। ମହିଳା ୫୪ କିଗ୍ରା କ୍ୱାର୍ଟର ଫାଇନାଲରେ ୧୯ ବର୍ଷୀୟା ପ୍ରୀତି ଚମତ୍କାର ପ୍ରଦର୍ଶନ କରିଥିଲେ। କାଜାଖସ୍ତାନର ଜାଇନା ସେକେରବେକୋଭାଙ୍କୁ ୪-୧ରେ ପରାସ୍ତ କରିବା ସହିତ ଭାରତ ପାଇଁ ଏକ ପଦକ ନିଶ୍ଚିତ କରିଥିବା ବେଳେ ପ୍ରଥମ ଥର ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। ସେହିପରି ୭୫ କିଗ୍ରା ଓଜନ ବର୍ଗରେ ଅଲିମ୍ପିକ୍ସ ପଦକ ବିଜୟିନୀ ଲଭଲିନା ବୋର୍ଗୋହେନ୍ ୫-୦ରେ ଦକ୍ଷିଣ କୋରିଆର ସେଓଙ୍ଗ ସୁଏଓନଙ୍କୁ ପରାସ୍ତ କରିଛନ୍ତି। ପ୍ରଥମ ରାଉଣ୍ଡ ବାଇ ପାଇଥିବା ଲଭଲିନା ନିଜ ଉଚ୍ଚତାର ଫାଇଦା ଉଠାଇଥିଲେ। ସମସ୍ତ ୫ ଜଜ୍ ଲଭଲିନାଙ୍କ ସପକ୍ଷରେ ରାୟ ଦେଇଥିଲେ। ଉଲ୍ଲେଖଯୋଗ୍ୟ ଯେ, ମହିଳା ବକ୍ସିଂ ଇଭେଣ୍ଟର ୫୦, ୫୪, ୫୭ ଓ ୬୦ କିଗ୍ରା ଓଜନ ବର୍ଗରେ ସେମି ଫାଇନାଲିଷ୍ଟଙ୍କୁ ଅଲିମ୍ପିକ୍ସ ଯୋଗ୍ୟତା ମିଳୁଥିବା ବେଳେ ୬୬ ଓ ୭୫ କିଗ୍ରା ବର୍ଗର ଫାଇନାଲିଷ୍ଟଙ୍କୁ ଅଲିମ୍ପିକ୍ସ ଯୋଗ୍ୟତା ମିଳିଥାଏ।
