ଭୁବନେଶ୍ୱର,୩।୮(ଶର୍ମିଷ୍ଠା ପାଣିଗ୍ରାହୀ): ବଲିଉଡ୍ରେ ଓଡ଼ିଆ ପୁଅ ପ୍ରେମ ପରିଜା। ଆସନ୍ତା ୧୧ତାରିଖରେ ଡିଜ୍ନି + ହଟ୍ଷ୍ଟାର ଓଟିଟି ପ୍ଲାଟଫର୍ମରେ ପ୍ରେମ୍ଙ୍କ ଆକ୍ସନ-ଥ୍ରୀଲର ୱେବ୍ସିରିଜ ‘କମାଣ୍ଡୋ’ ମୁକ୍ତି ଲାଭ କରିବ। ଯେଉଁଥିରେ ପ୍ରେମ୍ଙ୍କୁ ମୁଖ୍ୟ ଭୂମିକାରେ ଦେଖିବାକୁ ମିଳିବ। ତାଙ୍କ ସହ ବଲିଉଡ୍ ଅଭିନେତ୍ରୀ ଅଦା ଶର୍ମା, ଶ୍ରେୟା ସିଂ ଚୌଧୁରୀ, ମୁକେଶ ଛାବ୍ରା, ଅମିତ୍ ଶିଆଲ୍, ତିଗ୍ମାନସୁ ଧୁଲିଆ ପ୍ରମୁଖଙ୍କୁ ଦେଖିବାକୁ ମିଳିବ। ଏହାର ପ୍ରଯୋଜକ ଭିପୁଲ ଅମ୍ରୁତଲାଲ ଶାହା ଅଛନ୍ତି। ସପ୍ତାହେ ତଳେ ଏହାର ଟିଜର ଅପ୍ଲୋଡ୍ ହୋଇସାରିଛି, ଯାହାକୁ ବହୁତ ପ୍ରଶଂସା ମିଳିଛି। ଟିଜରରେ ପ୍ରେମ୍ଙ୍କ ଫାଇଟ୍ ସିନ୍ ଜବରଦସ୍ତ ରହିଛି। ସୋସିଆଲ ମିଡିଆରେ ଓଡ଼ିଶାର ପୁଅ ପ୍ରେମ୍ ପରିଜାଙ୍କୁ ନେଇ ଅନେକ ପୋଷ୍ଟ ଦେଖିବାକୁ ମିଳିଛି। ଏଥିସହ ବଲିଉଡ୍ରେ ମଧ୍ୟ ଅନେକ କଳାକାର ପ୍ରେମଙ୍କୁ ଶୁଭେଚ୍ଛା ଜଜଣାଇଛନ୍ତି। କମାଣ୍ଡୋମାନେ ଆମ ଦେଶର ପ୍ରକୃତ ହିରୋ। ଜଣେ କମାଣ୍ଡୋ ଦେଶକୁ ବଞ୍ଚାଇବା ତା’ର ମିଶନକୁ କିଭଳି ଶେଷ କରୁଛି ତାହାକୁ ନେଇ କାହାଣୀର ବିଷୟବସ୍ତୁ ରହିଛି।
ପ୍ରେମ୍ ୨୦୧୪ରୁ ବଲିଉଡ ସହ ଯୋଡ଼ିହୋଇ ରହିଥିଲେ ସୁଦ୍ଧା ଏବେ କମାଣ୍ଡୋ ଚଳଚ୍ଚିତ୍ରରେ ତାଙ୍କୁ ମୁଖ୍ୟ ନାୟକ ଭୂମିକାରେ ଦେଖିବାକୁ ମିଳିବାକୁ ଥିବାରୁ ଖବ୍ ଉତ୍କଣ୍ଠାର ସହ ଅପେକ୍ଷା କରି ରହିଛନ୍ତି ଓଡ଼ିଶାବାସୀ। ଭୁବନେଶ୍ୱରର ସେଣ୍ଟ ଜୋସେଫ ସ୍କୁଲରେ ଅଧ୍ୟୟନ ପରେ ଉଚ୍ଚଶିକ୍ଷା ପାଇଁ ଦିଲ୍ଲୀ ବିଶ୍ୱବିଦ୍ୟାଳୟକୁ ଯାଇଥିଲେ। ସେଠାରୁ ଆରମ୍ଭ କରିଥିଲେ ବଲିଉଡ୍ର ଯାତ୍ରା। ନାଟକରେ ମଧ୍ୟ ପ୍ରେମଙ୍କର ରହିଛି ବେଶ୍ ଦଖଲ। ଦିଲ୍ଲୀ ହନ୍ସରାଜ କଲେଜର ଡ୍ରାମାଟିକ ସୋସାଇଟି ତରଫରୁ ଦେଶର ବିଭିନ୍ନ ସ୍ଥାନରେ ଆୟୋଜିତ ନାଟକରେ ସେ ଅଭିନୟ କରିଛନ୍ତି। ଜଣେ ସହ ନିର୍ଦ୍ଦେଶକ ଭାବେ ବଲିଉଡ୍ରେ ସେ ତାଙ୍କର ଯାତ୍ରା ଆରମ୍ଭ କରିଥିଲେ। ଚଳଚ୍ଚିତ୍ର ‘ୱେଲ୍କମ୍ ଟୁ କରାଚି’, ‘ସତ୍ୟମେବ ଜୟତେ’, ‘ବାଜାର’, ନେଟଫ୍ଲିକ୍ସର ହଲିଉଡ୍ ସିରିଜ୍ ‘ସେନ୍ସ ୮’ ଏବଂ ‘ବାଟଲା ହାଉସ’ରେ ପରଦା ପଛରେ କାମ କରିଛନ୍ତି ପ୍ରେମ୍।
ଦ୍ଧଆଗକୁ କମାଣ୍ଡୋ ମୁକ୍ତିଲାଭ କରୁଥିବା ବେଳେ ଏନେଇ ପ୍ରେମ୍ କହିଛନ୍ତି, ମୁଁ ମୋର ସ୍ବପ୍ନର ନିକଟତର ହୋଇପାରିଛି। କମାଣ୍ଡୋକୁ ନେଇ ମୁଁ ବହୁତ ଏକ୍ସାଇଟେଡ୍ ଅଛି। ଛୋଟବେଳୁ କେବଳ ବଲିଉଡ୍ ହିଁ ଲକ୍ଷ୍ୟ ଥିଲା। ମୁଁ ବଲିଉଡ୍ର ବିକଳ୍ପ କିଛି ରଖି ନ ଥିଲି। ବହୁତ ଖୁସି ଯେ, ମୋ ଲକ୍ଷ୍ୟ ପୂରଣ ହୋଇପାରିଛି। କମାଣ୍ଡୋକୁ ଦର୍ଶକ ପସନ୍ଦ କରିବେ ବୋଲି ମୋର ସମ୍ପୂର୍ଣ୍ଣ ଆଶା ଓ ଭରସା ରହିଛି।