ନୂଆଦିଲ୍ଲୀ, ୧୯।୭-ଚଳିତ ବର୍ଷ ଟି୨୦ ବିଶ୍ୱକପ ହେବ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଏ ସମ୍ପର୍କରେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)ର ଆନୁଷ୍ଠାନିକ ନିଷ୍ପତ୍ତିକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ଅପେକ୍ଷା କରିଛି। ଟି୨୦ ବିଶ୍ୱକପ ବାତିଲ ହେଲେ ବିସିସିଆଇ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ)ର ୧୩ତମ ସଂସ୍କରଣ ସମ୍ପର୍କରେ ଘୋଷଣା କରିବ। ତେବେ ଇତିମଧ୍ୟରେ ଫ୍ରାଞ୍ଚାଇଜ୍ମାନେ ଏହି ଲିଗ୍କୁ ୟୁଏଇରେ କରାଇବା ପାଇଁ ପ୍ରସ୍ତୁତି ଆରମ୍ଭ କରି ଦେଇଛନ୍ତି। ”ଆଗୁଆ ଯୋଜନା ନିହାତି ଆବଶ୍ୟକ। ଆବୁଧାବିରେ କେଉଁ ହୋଟେଲ ବୁକ୍ କରାଯିବ, ଖେଳାଳି ଓ ଅଫିସିଆଲମାନେ କେବେ ଯିବେ, ୟୁଏଇରେ କ୍ୱାରାଣ୍ଟାଇନ୍ ପିରିୟଡ କେବେଠାରୁ ଆରମ୍ଭ ହେବ ସେ ସମ୍ପର୍କରେ ଯୋଜନା କରାଯିବା ଅତ୍ୟନ୍ତ ଜରୁରୀ। ଏହା ବ୍ୟତୀତ ଦେଶର ସ୍ବାସ୍ଥ୍ୟ ବିଭାଗର ଗାଇଡଲାଇନ୍କୁ ମଧ୍ୟ ପାଳନ କରାଯିବ“ ବୋଲି ଜଣେ ଫ୍ରାଞ୍ଚାଇଜ୍ କର୍ମକର୍ତ୍ତା ପ୍ରକାଶ କରିଛନ୍ତି। ଅନ୍ୟପକ୍ଷରେ ଭାରତରେ ଆଇସୋଲେଶନ ପିରିୟଡ ଶେଷ କରି ୟୁଏଇ ଯିବାକଥା ଚିନ୍ତା କରାଯାଉଛି। ଭାରତରେ ସମସ୍ତ ଖେଳାଳି ଓ କର୍ମକର୍ତ୍ତା ଜୈବ-ସୁରକ୍ଷିତ ପରିବେଶରେ ଆଇସୋଲେଶନ ସମୟ କାଟିବାପରେ କୋଭିଡ ଟେଷ୍ଟ ହେବ ଏବଂ ତା’ ପରେ ଯାଇ ୟୁଏଇ ଯିବାକୁ ଯୋଜନା ରହିଛି ବୋଲି ଅନ୍ୟ ଏକ ଫ୍ରାଞ୍ଚାଇଜ୍ର ଜଣେ କର୍ମକର୍ତ୍ତା ପ୍ରକାଶ କରିଛନ୍ତି। କାରଣ କୌଣସି ଜଣକ ଦେହରେ ଲକ୍ଷଣ ଥିଲେ ଅନ୍ୟକୁ ସଂକ୍ରମିତ କରିବାର ରିସ୍କ ରହିଛି। ତେଣୁ ଏଠାରେ କିଛି ସପ୍ତାହ ଆଇସୋଲେଶନରେ ରହି କୋଭିଡ ଟେଷ୍ଟ ହେବାପରେ ବାହାରକୁ ଯିବା ଭଲ ହେବ ବୋଲି ସେ କହିଛନ୍ତି। ଅଗଷ୍ଟ ଶେଷ କିମ୍ବା ସେପ୍ଟେମ୍ବର ଆରମ୍ଭ ବେଳକୁ ବିମାନ ଚଳାଚଳ ସ୍ବାଭାବିକ ହେବା ଆଶା କମ୍। ତେଣୁ ଅଧିକାଂଶ ଦଳ ଭଡ଼ାରେ ଚାର୍ଟାର୍ଡ ବିମାନ ଆଣି ଯିବାକୁ ଯୋଜନା କରୁଛନ୍ତି। ଫଳରେ ଏକାଥରକେ ୩୦ରୁ ୪୦ ଜଣ ୟୁଏଇ ଯାଇ ପାରିବେ। ପ୍ରତିଯୋଗିତା ବାହାର ପରିବେଶରେ ହେବାକୁ ଯାଉଥିବାରୁ ଏକ କଟକଣା ଯୋଗୁ ପ୍ରତି ଦଳରେ ଅଧିକ ସଦସ୍ୟ ରହିବା ସ୍ବାଭାବିକ। ଅନ୍ୟଜଣେ କର୍ମକର୍ତ୍ତାଙ୍କ ମତରେ ଆମେ ଭାରତରେ ଏକତ୍ରିତ ନ ହୋଇ ସିଧାସଳଖ ୟୁଏଇରେ ଏକାଠି ହେବାକଥା ଚିନ୍ତା କରୁଛୁ। ସେତେବେଳେ ବିମାନ ଚଳାଚଳ ସ୍ବାଭାବିକ ହୋଇଥିଲେ ଆମେ ସେଥିରେ ଯିବାକୁ ପସନ୍ଦ କରିବୁ। ବିମାନର ପ୍ରଥମଶ୍ରେଣୀରେ ଯାତ୍ରା କଲେ ସାମାଜିକ ଦୂରତ୍ୱ ଭଲଭାବେ ରକ୍ଷା ହୋଇ ପାରିବ। ଯେଉଁ ଫ୍ରାଞ୍ଚାଇଜ୍ ଦଳ ଯେଉଁଠାରେ ରହିବା କଥା ସେଠାରେ ପହଞ୍ଚତ୍ କୋଭିଡ ଟେଷ୍ଟ ଦେଲେ ଭଲ ହେବ। ଏପରିସ୍ଥଳେ ଫ୍ରାଞ୍ଚାଇଜ୍ ମାଲିକମାନଙ୍କୁ ୮-୧୦ ଥର ଚାର୍ଟାର୍ଡ ଟ୍ରିପ୍ ପାଇଁ ଭଡ଼ା ଦେବାକୁ ପଡ଼ିବ ନାହିଁ। ଯଦି ବିମାନ ଚଳାଚଳ ସ୍ବାଭାବିକ ନ ହୁଏ ତେବେ ଭିନ୍ନକଥା ଚିନ୍ତା କରାଯିବ ବୋଲି ସେ କହିଛନ୍ତି। ତେବେ ବିଦେଶୀ ଖେଳାଳିମାନେ ସିଧାସଳଖ ୟୁଏଇରେ ଏକତ୍ରିତ ହେବେ ବୋଲି ସମସ୍ତ ଫ୍ରାଞ୍ଚାଇଜ୍ କର୍ମକର୍ତ୍ତା ଯୋଜନା ରଖିଛନ୍ତି। ସେଠାରେ ସେମାନେ କ୍ୱାରାଣ୍ଟାଇନ୍ରେ ରହିବାପରେ ଦଳ ସହ ଯୋଗଦେବେ।