ବଡବିଲ,୧୪।୧୧(ଦେବପ୍ରିୟ ରଣା): କେନ୍ଦୁଝର ଜିଲା ବଡବିଲ ପୌରାଞ୍ଚଳରେ ବଡବିଲ ମହୋତ୍ସବ ରୌପ୍ୟ ଜୟନ୍ତୀ ପାଳନ ନେଇ ଗୁରୁବାର ଅପରାହ୍ନରେ ସ୍ଥାନୀୟ ବିକାଶ ମହଲ ସଭା ଗୃହରେ କମିଟି ସଦସ୍ୟଙ୍କ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି।
ବୈଠକରେ ବଡବିଲ ମହାବିଦ୍ୟାଳୟ ଗଣିତ ଅଧ୍ୟାପକ ପ୍ରତାପ କୁମାର ଜେନା ଅତିଥି ପରିଚୟ ପ୍ରଦାନ କରିଥିବା ବେଳେ କମିଟି ସଭାପତି ତଥା ଚମ୍ପୁଆ ଉପଜିଲାପାଳ ଉମାକାନ୍ତ ପରିଡା ଉପସ୍ଥିତ ରହି ଅଧ୍ୟକ୍ଷତା କରିଥିଲେ। ବଡବିଲ ପୌର ନିର୍ବାହୀ ଅଧିକାରୀ ରମେଶ ଚନ୍ଦ୍ର ନାଏକ, ମହୋତ୍ସବର ବରିଷ୍ଠ କର୍ମକର୍ତ୍ତା ବିଜୟ ମହାନ୍ତି ପ୍ରମୁଖ ଯୋଗଦେଇ ମହୋତ୍ସବ କିପରି ସୁରୁଖୁରୁରେ ପାଳନ କରାଯିବ ସେନେଇ ମତବ୍ୟକ୍ତ କରିଥିଲେ।
କରୋନା କାଳ ପରେ ବଡବିଲ ମହୋତ୍ସବ ଖୋଲା ମଞ୍ଚରେ ପାଳନ ହେବାକୁ ଥିବା ରୌପ୍ୟ ଜୟନ୍ତୀ ପାଳନ ନେଇ ଏବେ ନୂଆ କମିଟି ଗଠନ ନେଇ ସଭାପତି ତଥା ଚମ୍ପୁଆ ଉପଜିଲାପାଳ ପରାମର୍ଶ ଦେଇଥିଲେ। କମିଟି ପୂର୍ବ କାର୍ଯ୍ୟକାରୀ ସଭାପତି ଓ ସମ୍ପାଦକଙ୍କ ଦେହାନ୍ତ ପରେ କମିଟି ସଦସ୍ୟଙ୍କ ଦ୍ୱାରା ନବ ମନୋନୀତ କାର୍ଯ୍ୟକାରୀ ସଭାପତି ଚନ୍ଦ୍ରଗୁପ୍ତ ପ୍ରସାଦ, ସମ୍ପାଦକ ନୀଳମଣି ମହାନ୍ତ ପ୍ରମୁଖ ବୈଠକରେ ମଞ୍ଚାସୀନ ଥିଲେ।
କମିଟି ସଭାପତି ତଥା ଚମ୍ପୁଆ ଉପଜିଲାପାଳ ମହୋତ୍ସବର ଆୟବ୍ୟୟର ହିସାବରେ ସ୍ବଚ୍ଛତା ରହିବା ନିହାତି ଆବଶ୍ୟକ ବୋଲି କହିଥିଲେ। ପରିଡା ଆହୁରି କହିଥିଲେ ଯେ, ବଡବିଲ ମହୋତ୍ସବ ଯୋଗୁ ଅଞ୍ଚଳରେ ଭାଇଚାରାର ସୃଷ୍ଟି ହେବ। ଏପରିକି ମହୋତ୍ସବ ମାଧ୍ୟମରେ ଓଡ଼ିଆ ପରମ୍ପରା, ସଂସ୍କୃତିକୁ ଉଜ୍ଜୀବିତ ହୋଇପାରିବ।ମହୋତ୍ସବରେ ସ୍ଥାନୀୟ ଅଞ୍ଚଳର ପ୍ରତିଭାଙ୍କୁ ସ୍ଥାନ ଦିଆଯିବ ବୋଲି ସେ କହିଥିଲେ।
ମହୋତ୍ସବ ପାଳନ ନେଇ ଆଗାମୀ ଦିନରେ ବ୍ୟୟ ଅଟକଳ ଉପସ୍ଥାପନ କରି କମିଟି ସଦସ୍ୟଙ୍କ ସହ ଚର୍ଚ୍ଚା କରାଯିବ ବୋଲି ସଭାପତି କହିଥିଲେ। ବୈଠକ ପରେ କମିଟି ସଦସ୍ୟଙ୍କ ସହ ଉପଜିଲାପାଳ ଉତ୍ସବ ପଡିଆକୁ ବୁଲି ଦେଖିଥିଲେ।