ସିଓଲ,୨୦।୮: ଦକ୍ଷିଣ କୋରିଆ ଏବଂ ଆମେରିକା ଚଳିତ ସପ୍ତାହରେ ମିଳିତ ସମରାଭ୍ୟାସ ଆରମ୍ଭ କରିବାକୁ ଯାଉଛନ୍ତି। ଉତ୍ତର କୋରିଆରୁ ବଢୁଥିବା ସାମରିକ ବିପଦ ବିରୋଧରେ ଉଭୟ ଦେଶ ମିଳିତ ପ୍ରସ୍ତୁତି ବୃଦ୍ଧି ପାଇଁଚେଷ୍ଟା କରୁଛନ୍ତି।
ପୂର୍ଣ୍ଣ ଯୁଦ୍ଧ ପରିସ୍ଥିତି ଉପରେ ଆଧାରିତ ବାର୍ଷିକ ଉଲ୍ଚି ଫ୍ରିଡମ ସିଲ୍ଡ (ୟୁଏଫଏସ) ସମରାଭ୍ୟାସ ଅଗଷ୍ଟ ୨୧ ରୁ ଅଗଷ୍ଟ ୩୧ ପର୍ଯ୍ୟନ୍ତ ଅନୁଷ୍ଠିତ ହେବାକୁ ଯାଉଛି, ଯେଉଁଥିରେ ବିଭିନ୍ନ କଣ୍ଟିଜେନ୍ସି ସମରାଭ୍ୟାସ ଅନ୍ତର୍ଭୁକ୍ତ ହେବ । ଏହି ସମରାଭ୍ୟାସରେ କମ୍ପ୍ୟୁଟର ସିମୁଲେଶନ-ଆଧାରିତ କମାଣ୍ଡ ପୋଷ୍ଟ ସମରାଭ୍ୟାସ , ଏକକାଳୀନ ଫିଲ୍ଡ ଟ୍ରେନିଂ ଏବଂ ଉଲଚି ସିଭିଲ ଡିଫେନ୍ସ ସମରାଭ୍ୟାସ ଅନ୍ତର୍ଭୁକ୍ତ ହେବ ବୋଲି ୟୋନହାପ ନ୍ୟୁଜ ଏଜେନ୍ସି ରିପୋର୍ଟ କରିଛି।
ଯୁଗ୍ମ ଚିଫ ଅଫ ଷ୍ଟାଫ (ଜେସିଏସ) ଅଧିକାରୀଙ୍କ ଅନୁଯାୟୀ, ସମରାଭ୍ୟାସ ସମୟରେ ପ୍ରାୟ ୩୦ ସହଯୋଗୀ ଫିଲ୍ଡ ଟ୍ରେନିଂ ଇଭେଣ୍ଟ ଅନୁଷ୍ଠିତ ହେବାର ଯୋଜନା ରହିଛି।
ଚଳିତ ବର୍ଷର ସମରାଭ୍ୟାସର ଅଂଶ ଭାବରେ ସୈନିକମାନଙ୍କୁ ଯୁଦ୍ଧ ସମୟରେ କିମ୍ବା ପରିସ୍ଥିତିରେ ପ୍ୟୋଙ୍ଗୟାଙ୍ଗ ଦ୍ୱାରା ବିସ୍ତାରିତ ମିଥ୍ୟା ତଥ୍ୟର ଜବାବ ଦେବା ସହିତ ଯୁଦ୍ଧ ସମୟରେ ଶୀଘ୍ର ଆକ୍ରମଣ କରିବାକୁ ତାଲିମ ଦିଆଯିବ।
ଆମେରିକାର ଫୋର୍ସ କୋରିଆ ଅନୁଯାୟୀ ନୌସେନା, ବାୟୁସେନା ଏବଂ ସାମୁଦ୍ରିକ କର୍ମଚାରୀଙ୍କ ବ୍ୟତୀତ ଆମେରିକାର ମହାକାଶ ବାହିନୀ ମଧ୍ୟ ଏହି ସମରାଭ୍ୟାସରେ ଭାଗ ନେବେ। ଦକ୍ଷିଣ କୋରିଆ ଏବଂ ଆମେରିକାର ସମରାଭ୍ୟାସ ପ୍ରସ୍ତୁତି ନେଇ ଉତ୍ତରକୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନଙ୍କ ଚିନ୍ତା ବଢ଼ିବାରେ ଲାଗିଛି।