ନୂଆଦିଲ୍ଲୀ,୩।୧୨: ଅନ୍ତର୍ଜାତୀୟ ଭିନ୍ନକ୍ଷମ ଦିବସ ଆଜି ପାଳିତ ହେଉଛି। ଏହି ଅବସରରେ ନୂଆଦିଲ୍ଲୀଠାରେ ସାମାଜିକ ନ୍ୟାୟ ଓ ସଶକ୍ତୀକରଣ ମନ୍ତ୍ରଣାଳୟ ପକ୍ଷରୁ ଆୟୋଜିତ ଜାତୀୟ ଦିବ୍ୟାଙ୍ଗ ସଶକ୍ତୀକରଣ ପୁରସ୍କାର-୨୦୨୩ ଉତ୍ସବରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଉଦ୍ବୋଧନ ଦେଇଛନ୍ତି।
ଦେଶରେ ୧୫ ପ୍ରତିଶତରୁ ଅଧିକ ଦିବ୍ୟାଙ୍ଗ ଜନ ରହିଛନ୍ତି। କେନ୍ଦ୍ର ସରକାର ସେମାନଙ୍କୁ ସଶକ୍ତୀକରଣ କରିବା ଦିଗରେ ଗ୍ରହଣ କରିଥିବା ପଦକ୍ଷେପ ଅତ୍ୟନ୍ତ ଉତ୍ସାହଜନକ। ସେମାନଙ୍କ ସଂଘର୍ଷ ଓ ଉପଲବ୍ଧିକୁ ସ୍ୱୀକୃତି ଦେବାପାଇଁ ଏଭଳି ପୁରସ୍କାର ସେମାନଙ୍କ ସକରାତ୍ମକ ଭାବନାକୁ ଆଗକୁ ବଢ଼ାଇବ। ସମାଜର ପ୍ରତ୍ୟେକ ବର୍ଗ ଦିବ୍ୟାଙ୍ଗ ଜନଙ୍କ ପ୍ରତି ସମ୍ବେଦନଶୀଳ ହେଲେ ସେମାନେ ଆଗକୁ ବଢ଼ିପାରିବେ।
ଦେଶରେ ଦିବ୍ୟାଙ୍ଗ ଜନଙ୍କ ପାଇଁ ଉଭୟ ଶାରୀରିକ ଓ ଡିଜିଟାଲ ଭିତ୍ତିଭୂମିର ବ୍ୟବସ୍ଥା କରାଯାଉଛି। ମାନୁଫ୍ୟାକ୍ଚରିଂ କ୍ଷେତ୍ରରେ ଦିବ୍ୟାଙ୍ଗ ଜନଙ୍କ ପାଇଁ ସ୍ୱତନ୍ତ୍ର ଯାନ ତିଆରି କରାଯିବା ଆମ ଅଟୋମୋବାଇଲ କ୍ଷେତ୍ରକୁ ଅଧିକ ମଜବୁତ୍ କରିଛି। ଏସିଆନ୍ ପାରା- ଅଲିମ୍ପିକ୍ସରେ ୪୦ ପ୍ରତିଶତ ଦିବ୍ୟାଙ୍ଗ ମହିଳାଙ୍କ ଯୋଗଦାନ ଓ ଅନୁରୂପ ପଦକ ବିଜୟୀ ହେବା ଭାରତ ପାଇଁ ଗୌରବର କଥା ବୋଲି ରାଷ୍ଟ୍ରପତି ମୁର୍ମୁ କହିଛନ୍ତି।