ଭୁବନେଶ୍ୱର,୨୬।୯(ବ୍ୟୁରୋ): ଲେଖିକା ତେଜସ୍ବିନୀ ପଣ୍ଡାଙ୍କ ପୁସ୍ତକ ‘ରାଷ୍ଟ୍ରପତି ଦ୍ରୌପଦୀ ମୁର୍ମୁ’ ଲୋକାର୍ପଣ ଉତ୍ସବ ସ୍ଥାନୀୟ ଏକ ହୋଟେଲରେ ରବିବାର ଅନୁଷ୍ଠିତ ହୋଇଯାଇଛି। ଓଡ଼ିଶା ସାହିତ୍ୟ ଏକାଡେମୀ ପୁରସ୍କାରପ୍ରାପ୍ତ କବି ରକ୍ଷକ ନାୟକ ମୁଖ୍ୟ ଅତିଥି ଭାବେ ଯୋଗଦେଇ କହିଛନ୍ତି, ଯେତେବେଳେ ସାହିତ୍ୟ ପ୍ରତି ଯୁବପିଢ଼ି ଆଗ୍ରହୀ ହେଉ ନାହାନ୍ତି ବୋଲି ଶୁଣିବାକୁ ମିଳୁଥିଲା, ସେହି ସମୟରେ ଲେଖିକା ପଣ୍ଡା ଏହି ନିରାଶତାକୁ ଭାଙ୍ଗିଛନ୍ତି। ବିଭିନ୍ନ ତଥ୍ୟ ସଂଗ୍ରହ କରି ସେ ନିଜର ଭାବ ଓ ଭାଷା ମାଧ୍ୟମରେ ପୁସ୍ତକ ଲେଖିଛନ୍ତି। ତାଙ୍କୁ ଶୁଭେଚ୍ଛା ଜଣାଇବା ସହ ଆଗାମୀ ଦିନରେ ସେ ଭାରତର ରାଷ୍ଟ୍ରପତି ହୁଅନ୍ତୁ ବୋଲି କାମନା କରିଥିଲେ। ମୁଖ୍ୟବକ୍ତା ଭାବେ କଥାକାର ଡ. ହିରଣ୍ମୟୀ ମିଶ୍ର ଯୋଗଦେଇ କହିଛନ୍ତି, ଲେଖିକା ପଣ୍ଡା ପୁସ୍ତକରେ ରାଷ୍ଟ୍ରପତି ମୁର୍ମୁଙ୍କୁ ନେଇ ବିଭିନ୍ନ ସମୟର ବିଭିନ୍ନ ନାମ ବଦଳିବା, ଶିକ୍ଷକତା ଓ ଆଦିବାସୀ ଜୀବନ ପାଖପାଖି ସବୁ ଦିଗକୁ ପୁସ୍ତକରେ ସ୍ଥାନ ଦେଇଛନ୍ତି। ପୁସ୍ତକରୁ ଜଣାପଡ଼ୁଛି ସେ ରାଷ୍ଟ୍ରପତିଙ୍କୁ ଅନୁସରଣ କରିବା ସହ ତାଙ୍କ ଦ୍ୱାରା ପ୍ରଭାବିତ ମଧ୍ୟ ହୋଇଛନ୍ତି। ଲେଖିକା ପଣ୍ଡା କହିଛନ୍ତି, ମୋ ବୟସ ମୋଠାରୁ ବଡ଼ ଓ ସାନମାନେ ଦ୍ରୌପଦୀ ମୁର୍ମୁଙ୍କଠାରୁ ପ୍ରେରଣା ପାଆନ୍ତୁ। ସେ ପୁସ୍ତକର ପାଠକୀୟ ସ୍ବୀକୃତି ଆଶା କରିଛନ୍ତି। ପୁସ୍ତକଟି ଟାଇମପାସ୍ ଦ୍ୱାରା ପ୍ରକାଶିତ ହୋଇଛି। କାର୍ଯ୍ୟକ୍ରମକୁ ଟାଇମପାସ୍ର ନିର୍ଦ୍ଦେଶକ ତଥା ଲେଖକ ସରୋଜ ବଳ ପରିଚାଳନା କରିଥିଲେ। ଅନ୍ୟମାନଙ୍କ ମଧ୍ୟରେ ଲେଖିକାଙ୍କ ବାପା, ମା’ ଓ ଲେଖକ ମନୋରଞ୍ଜନ ହୋତା ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ଅତିଥିମାନେ ପୁସ୍ତକକୁ ଲୋକାର୍ପଣ କରିଥିଲେ।
