ନୂଆଦିଲ୍ଲୀ,୧।୧୧: ପାକିସ୍ତାନୀ ଗୁଇନ୍ଦା ଏଜେଣ୍ଟ ସହ ସମ୍ପର୍କ ଥିବା ଅଭିଯୋଗରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଭାରତୀୟ ସେନାରେ କାର୍ଯ୍ୟରତ ଜଣେ ମେଜରଙ୍କୁ ବରଖାସ୍ତ କରିଛନ୍ତି। ସୁରକ୍ଷା ପ୍ରୋଟୋକଲ ଉଲ୍ଲଂଘନ କରିଥିବା ଅଭିଯୋଗରେ ତାଙ୍କୁ ତୁରନ୍ତ ପ୍ରଭାବ ସହ ବାହାର କରାଯାଇଛି। ସେ ସେନାର ଷ୍ଟାଟର୍ଜିକ୍ ଫୋର୍ସେସ୍ କମାଣ୍ଡ ୟୁନିଟ୍ରେ ନିୟୋଜିତ ଥିଲେ।
ସେନାର ଯାଞ୍ଚ ସମୟରେ ମେଜର ଦେଶର ନିରାପତ୍ତା ଲାଗି ବିପଦ ସୃଷ୍ଟି କରିବା ଭଳି କାର୍ଯ୍ୟ କରୁଥିବା ଜଣାପଡ଼ିଥିଲା। ସେ ସୋସିଆଲ ମିଡିଆ ମାଧ୍ୟମରେ ଜଣେ ପାକିସ୍ତାନୀ ଗୁପ୍ତଚର ଅପରେଟରଙ୍କ ସମ୍ପର୍କରେ ଥିଲେ। ମାର୍ଚ୍ଚ ୨୦୨୨ରେ ତାଙ୍କ ଉପରେ ଲାଗିଥିବା ଅଭିଯୋଗକୁ ଯାଞ୍ଚ କରିବା ଲାଗି ଏକ କମିଟି ଗଠନ କରାଯାଇଥିଲା। ଯାଞ୍ଚ ସମୟରେ ମେଜରଙ୍କ ନିଜର ଇଲେକ୍ଟ୍ରୋନିକ୍ସ ଡିଭାଇସ୍ରେ ଗୁପ୍ତ ଦସ୍ତାବିଜ, ଯାହାକି ସେନାର ନିୟମ ବିରୋଧରେ ରଖିଥିବା ଦେଖାଯାଇଥିଲା। ଏହାଛଡ଼ା ସେ ‘ପଟିଆଲା ପେଗ୍’ ନାମକ ହ୍ବାଟ୍ସଆପ୍ ଗ୍ରୁପ୍ର ସଦସ୍ୟ ଥିଲେ। ଏହି ଗ୍ରୁପ୍ରେ ପାକିସ୍ତାନ ଗୁଇନ୍ଦା ବିଭାଗର ସଞ୍ଚାଳକ ମଧ୍ୟ ଥିବା ସନ୍ଦେହ କରାଯାଉଛି। ତେବେ ଏହି ଗ୍ରୁପ୍ର ସଦସ୍ୟ ରହିବାକୁ ନେଇ ଜଣେ ବ୍ରିଗେଡିଅର ଏବଂ ଜଣେ ଲେଫ୍ଟନାଣ୍ଟ କର୍ନେଲଙ୍କୁ ମଧ୍ୟ କାରଣ ଦର୍ଶାଅ ନୋଟିସ ଜାରି କରାଯାଇଥିବା କୁହାଯାଉଛି।