ନୂଆଦିଲ୍ଲୀ, ୨୫ା୧୨: ଗତ ସପ୍ତାହରେ ପାର୍ଲାମେଣ୍ଟର ଉଭୟ ସଦନରେ ପାରିତ ହୋଇଥିବା ୩ ନୂଆ କ୍ରିମିନାଲ ବିଲ୍ ଯଥା ଭାରତୀୟ ନ୍ୟାୟ ସଂହିତା, ଭାରତୀୟ ନାଗରିକ ସୁରକ୍ଷା ସଂହିତା ଓ ଭାରତୀୟ ସାକ୍ଷ୍ୟ ଅଧିନିୟମକୁ ସୋମବାର ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୋହର ମାରିଛନ୍ତି। ଫଳରେ ଏହା ଆଇନରେ ପରିଣତ ହୋଇଛି। ବ୍ରିଟିଶ୍ ଅମଳରୁ ପ୍ରଚଳିତ ଆପରାଧିକ ଆଇନ ଇଣ୍ଡିଆନ ପେନାଲ କୋଡ୍ (ଆଇପିସି), କୋଡ୍ ଅଫ୍ କ୍ରିମିନାଲ ପୋସିଜିଓର (ସିଆର୍ପିସି) ଏବଂ ଇଣ୍ଡିଆନ୍ ଏଭିଡେନ୍ସ ଆକ୍ଟ ପରିବର୍ତ୍ତେ ଏହି ୩ ଆଇନ ଅଣାଯାଇଛି। ଏଥିରେ ଭିଡ଼ହିଂସା, ଆତଙ୍କବାଦ ଏବଂ ଜାତୀୟ ସୁରକ୍ଷା ପ୍ରତି ଅପରାଧ ଭଳି ଅପରାଧରେ ଦଣ୍ଡକୁ ବଢ଼ାଇ ଦିଆଯାଇଛି।
ଗତ ୨୦ ତାରିଖ ଲୋକ ସଭା ଏବଂ ୨୧ ତାରିଖରେ ରାଜ୍ୟ ସଭାରେ ଦୁଇତୃତୀୟାଂଶ ବିରୋଧୀ ଏମ୍ପିଙ୍କ ଅନୁପସ୍ଥିତିରେ ଶାସକ ଓ ପରୋକ୍ଷରେ ସହଯୋଗ କରୁଥିବା ଅନ୍ୟ କେତୋଟି ଦଳର ସମର୍ଥନରେ ବିଲ୍ଗୁଡ଼ିକୁ ଗୃହୀତ କରାଯାଇଥିଲା। ବିଲ୍ଗୁଡ଼ିକୁ ପ୍ରଶଂସା କରି ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ନୂଆ ଯୁଗର ଆରମ୍ଭ ହୋଇଥିବା କହିଥିଲେ। ଭାରତର ନାଗରିକଙ୍କୁ ସମୟସୀମା ମଧ୍ୟରେ ନ୍ୟାୟ ଦେବା ଲକ୍ଷ୍ୟରେ ଏବଂ ସେମାନଙ୍କ ମାନବାଧିକାରର ସୁରକ୍ଷା ଦେବା ନିମନ୍ତେ ଉପରୋକ୍ତ ୩ ବିଲ୍ ଅଣାଯାଇଥିବା ଶାହା କହିଥିଲେ।
ଆଇପିସିରେ ୫୧୧ଟି ଦଫା ଥିବାବେଳେ ଏହା ବଦଳରେ ଅଣାଯାଇଥିବା ଭାରତୀୟ ନ୍ୟାୟ ସଂହିତାରେ ୩୫୮ଟି ଦଫା ରହିଛି। ୨୦ଟି ନୂଆ ଦଫା ଯୋଡ଼ାଯାଇଛି। ୩୩ଟି ଦଫାର ଜେଲଦଣ୍ଡର ଅବଧି ବଢ଼ାଯାଇଥିବାବେଳେ ୮୩ଟିର ଜରିମାନା ପରିମାଣ ବଢ଼ାଯାଇଛି। ସେହିପରି ୨୩ଟି ଅପରାଧ ନିମନ୍ତେ ସର୍ବନିମ୍ନ ଦଣ୍ଡକୁ ବାଧ୍ୟତାମୂଳକ କରାଯାଇଛି। ୬ଟି ଅପରାଧ ନିମନ୍ତେ ଦଣ୍ଡ ଭାବେ ଗୋଷ୍ଠୀ ସେବା କରିବାକୁ ଏହି ନୂଆ ଆଇନରେ ବ୍ୟବସ୍ଥା କରାଯାଇଛି। ୧୯ଟି ଦଫାକୁ ବିଲ୍ରୁ ବାଦ୍ ଦିଆଯାଇଛି।
ସେହିପରି ୪୮୪ଟି ଦଫା ବିଶିଷ୍ଟ ସିଆର୍ପିସି ପରିବର୍ତ୍ତେ ଅଣାଯାଇଥିବା ଭାରତୀୟ ନାଗରିକ ସୁରକ୍ଷା ସଂହିତାରେ ୫୩୧ଟି ଦଫା ରହିଛି। ମୋଟ ୧୭୭ଟି ପ୍ରୋଭିଜନକୁ ପରିବର୍ତ୍ତନ କରାଯାଇଥିବାବେଳେ ୯ଟି ନୂଆ ଦଫା ଯୋଡ଼ାଯାଇଛି। ସେହିପରି ୩୯ଟି ନୂଆ ଉପ ଦଫା ସାମିଲ କରାଯାଇଛି। ୧୪ଟି ଦଫାକୁ ବିଲ୍ରୁ ହଟାଇ ଦିଆଯାଇଛି। ଅନ୍ୟପକ୍ଷରେ ଭାରତୀୟ ସାକ୍ଷ୍ୟ ଅଧିନିୟମରେ ୧୭୦ଟି ପ୍ରୋଭିଜନ ରହିଛି। ପୂର୍ବର ଇଣ୍ଡିଆନ୍ ଏଭିଡେନ୍ସ ଆକ୍ଟରେ ୧୬୭ଟି ପ୍ରୋଭିଜନ ରହିଥିଲା। ମୋଟ ୨୪ଟି ପ୍ରୋଭିଜନକୁ ପରିବର୍ତ୍ତନ କରାଯାଇଛି। ୨ ନୂଆ ପ୍ରୋଭିଜନ ଏବଂ ୬ଟି ସବ୍-ପ୍ରୋଭିଜନକୁ ଯୋଡ଼ାଯାଇଛି। ୬ଟି ପ୍ରୋଭିଜନକୁ ବିଲ୍ ବାଦ୍ ଦିଆଯାଇଛି।
ନୂଆ ଆଇନରେ ଭିଡ଼ହିଂସା ଅପରାଧ ପାଇଁ ମୃତ୍ୟୁଦଣ୍ଡ ବ୍ୟବସ୍ଥା ରହିଛି। ସେହିପରି ପୋଲିସକୁ ଅଧିକ ଉତ୍ତରଦାୟୀ କରିବା ପାଇଁ ବ୍ୟବସ୍ଥା ହୋଇଛି। ନୂଆ ଆଇନ ଅନୁଯାୟୀ ଗିରଫ ବ୍ୟକ୍ତିଙ୍କ ସବିଶେଷ ବିବରଣୀ ପ୍ରତି ଥାନାରେ ରେକର୍ଡ ହେବ ଏବଂ ଦାୟିତ୍ୱରେ ଥିବା ପୋଲିସ ଅଫିସର ଉକ୍ତ ରେକର୍ଡ ପରିଚାଳନା କରିବେ। ସେହିପରି ମାନବ ଚାଲାଣକୁ ନିୟନ୍ତ୍ରଣ କରିବା ପାଇଁ ଥିବା ଆଇନକୁ ଲିଙ୍ଗଗତ ନିରପେକ୍ଷ କରାଯାଇଛି। ୧୮ ବର୍ଷରୁ କମ୍ ବୟସର ନାବାଳିକାଙ୍କୁ ବଳାତ୍କାର କ୍ଷେତ୍ରରେ ସ୍ବତଃ ପୋକ୍ସୋ ଆଇନର ଧାରା ଲାଗୁ ହେବା ବ୍ୟବସ୍ଥା ନୂଆ ଆଇନରେ ରହିଛି।