କଲମ୍ବୋ,୧୨।୭: ଆର୍ଥିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କାରେ ଏବେ ରାଜନୈତିକ ଅସ୍ଥିରତା ଲାଗି ରହିଛି। ଜନତାଙ୍କ ବିରୋଧ ପ୍ରଦର୍ଶନ ପରେ ରାଷ୍ଟ୍ରପତି ଗୋଟବାୟା ରାଜପକ୍ସେ ନିଜ ପଦରୁ ଇସ୍ତଫା ଦେବେ ବୋଲି ସୋମବାର ଘୋଷଣା କରିଥିଲେ। ଇତିମଧ୍ୟରେ ଗୋଟବାୟା ମଙ୍ଗଳବାର ନିଜ ଇସ୍ତଫା ପତ୍ରରେ ହସ୍ତାକ୍ଷର କରିଥିବା ଜଣାପଡ଼ିଛି। ବୁଧବାର ରାଷ୍ଟ୍ରପତି କାର୍ଯ୍ୟକାଳ ଶେଷ ହେବା ନେଇ ସେ ଔପଚାରିକ ଭାବେ ଘୋଷଣା କରିବେ। ତେବେ ସର୍ବସାଧାରଣରେ ଘୋଷଣା କରିବା ପାଇଁ ଏହି ଇସ୍ତଫା ପତ୍ରକୁ ସଂସଦର ବାଚସ୍ପତିଙ୍କୁ ପ୍ରଦାନ କରାଯିବ। ରାଷ୍ଟ୍ରପତିଙ୍କ ଇସ୍ତଫା ପତ୍ରରେ ହସ୍ତାକ୍ଷର ହେବା ପରେ ଏହାକୁ ଜଣେ ବରିଷ୍ଠ ସରକାରୀ ଅଧିକାରୀଙ୍କୁ ହସ୍ତାନ୍ତର କରାଯାଇଥିଲା। ଯିଏ ଏହାକୁ ସଂସଦର ବାଚସ୍ପତିଙ୍କୁ ହସ୍ତାନ୍ତର କରିବେ। ଏହି ପତ୍ର ପାଇବା ପରେ ବାଚସ୍ପତି ମହିନ୍ଦା ୟାପା ଆବେୱାର୍ଡେନା ବୁଧବାର ଗୋଟାବାୟା ରାଜପକ୍ସେଙ୍କ ରାଷ୍ଟ୍ରପତି କାର୍ଯ୍ୟକାଳ ଶେଷ ବୋଲି ସର୍ବସାଧାରଣରେ ଘୋଷଣା କରିବେ। ଅନ୍ୟପଟେ ବୁଧବାର ଅସ୍ଥାୟୀ ରାଷ୍ଟ୍ରପତି ଭାବେ ରାନିଲ ବିକ୍ରମସିଂଘେ ଶପଥ ଗ୍ରହଣ କରିବେ। ଜୁଲାଇ ୨୦ରେ ସଂସଦ ଦ୍ୱାରା ନୂତନ ରାଷ୍ଟ୍ରପତି ନିର୍ବାଚିତ ହେବା ପର୍ଯ୍ୟନ୍ତ ରାନିଲ ଏହି ଦାୟିତ୍ୱ ସମ୍ଭାଳିବେ। ସୂଚନାଯୋଗ୍ୟ, ଜୁଲାଇ ୧୯ରେ ରାଷ୍ଟ୍ରପତି ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ କରାଯିବ ଏବଂ ୨୦ରେ ମତଦାନ ଗ୍ରହଣ କରାଯିବ ବୋଲି ଶ୍ରୀଲଙ୍କା ବାଚସ୍ପତି କହିଛନ୍ତି।