ପାଲି,୫।୧: ରାଜସ୍ଥାନର ପାଲି ଜିଲା ଅନ୍ତର୍ଗତ ନିମ୍ବଲି ଗ୍ରାମରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ବୁଧବାର ଅପରାହ୍ନରେ ୧୮ତମ ଜାତୀୟ ସ୍କାଉଟ୍ସ ଆଣ୍ଡ ଗାଇଡ୍ସ ଜାମ୍ବୋରିକୁ ଉଦ୍ଘାଟନ କରିଛନ୍ତି। ଭାରତ ସ୍କାଉଟ୍ସ ଓ ଗାଇଡ୍ସ ସର୍ବବୃହତ୍ ସ୍ବେଚ୍ଛାସେବୀ, ଅଣରାଜନୈତିକ ଯୁବ ସଂଗଠନ ଏବଂ ଦେଶର ଶୈକ୍ଷିକ ଆନ୍ଦୋଳନ ବୋଲି ଏହି ଅବସରରେ ରାଷ୍ଟ୍ରପତି କହିଛନ୍ତି। ଜାତି, ଧର୍ମ, ଲିଙ୍ଗ ନିର୍ବିଶେଷରେ ପୁଅ ଝିଅଙ୍କ ଚରିତ୍ର ଗଠନ ଦିଗରେ ଏହା କାର୍ଯ୍ୟ କରିଥାଏ। ୬୩ ଲକ୍ଷରୁ ଊର୍ଦ୍ଧ୍ୱ ସଦସ୍ୟତା ସହ ଭାରତ ସ୍କାଉଟ୍ସ ଆଣ୍ଡ ଗାଇଡ୍ସ ବିଶ୍ୱର ସର୍ବବୃହତ୍ ସ୍କାଉଟ୍ ଗାଇଡ୍ ସଂଗଠନ। ଏହାର ସଦସ୍ୟମାନେ ଉତ୍ସର୍ଗୀକୃତ ମନୋଭବ ନେଇ ମାନବ କଲ୍ୟାଣ ପାଇଁ ସେବା କରିଥାନ୍ତି।
ପ୍ରତ୍ୟେକ ସେମାନଙ୍କ ଜୀବନରେ ମାନବୀୟ ମନୋଭାବ ନେଇ ଭଲ ପାଇବାକୁ ରାଷ୍ଟ୍ରପତି ଆହ୍ବାନ ଦେଇଛନ୍ତି। ରାଷ୍ଟ୍ରପତି ନିମ୍ବଲିସ୍ଥିତ ହେଲିପ୍ୟାଡ୍ରେ ପହଞ୍ଚତ୍ବା ପରେ ତାଙ୍କୁ ରାଜ୍ୟପାଳ କଲରାଜ ମିଶ୍ର ଏବଂ ମୁଖ୍ୟମନ୍ତ୍ରୀ ଅଶୋକ ଗେହଲଟ ସ୍ବାଗତ କରିଥିଲେ। ସେ ପତାକା ଉତ୍ତୋଳନ କରି ଜାମ୍ବୋରିକୁ ଉଦ୍ଘାଟନ କରିବା ପରେ ପରେଡରେ ସାମିଲ ହୋଇଥିଲେ। ଏହି ସମୟରେ ବାୟୁସେନା ପକ୍ଷରୁ ସୂର୍ଯ୍ୟକିରଣ ଏୟାର ଶୋ’ ପ୍ରଦର୍ଶନ କରାଯାଇଥିଲା।
୧୦ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଜମ୍ବୋରିରେ ଭାଗନେବା ପାଇଁ ଭାରତ ଓ ବିଦେଶରୁ ପ୍ରାୟ ୩୫ ହଜାର ସ୍କାଉଟ୍ ଓ ଗାଇଡ୍ ଆସିଛନ୍ତି। ସେମାନଙ୍କ ଲାଗି ୨୨୦ ହେକ୍ଟର ଅଞ୍ଚଳରେ ୩,୫୨୦ଟି ଟେଣ୍ଟ ନିର୍ମାଣ କରାଯାଇଛି। ରାଜସ୍ଥାନରେ ଏହା ଦ୍ୱିତୀୟ ଜାମ୍ବୋରି। ପୂର୍ବରୁ ଜୟପୁରରେ ୧୯୫୬ ଜାମ୍ବୋରିର ଆୟୋଜନ କରାଯାଇଥିଲା। ଏଥର ବାଂଲାଦେଶ, ସାଉଦି ଆରବ, ଘାନା, ଶ୍ରୀଲଙ୍କା, ମାଲେସିଆ, ନେପାଳ, କେନିଆ ଆଦି ଦେଶରୁ ୪୦୦ ସ୍କାଉଟ୍ ଗାଇଡ୍ ଯୋଗ ଦେଉଛନ୍ତି।