କିଭ୍୍, ୧୧ା୧୦:ରୁଷିଆକୁ କ୍ରିମିଆ ସହ ସଂଯୋଗ କରୁଥିବା ୧୯ କି.ମି. ଦୀର୍ଘ କର୍ଚ ବ୍ରିଜ୍ ବିସ୍ଫୋରଣର ୨ ଦିନ ପରେ ପ୍ରତିଶୋଧ ପରାୟଣ ହୋଇଛନ୍ତି ରାଷ୍ଟ୍ରପତି ଭ୍ଲାଡିମିର ପୁଟିନ୍। ପ୍ରାୟ ୪ ବିଲିୟନ୍ ଡଲାରରେ ନିର୍ମିତ ଉକ୍ତ ବ୍ରିଜ୍କୁ ଟାର୍ଗେଟ କରି ୟୁକ୍ରେନ୍ ଆତଙ୍କବାଦୀ କାର୍ଯ୍ୟକଳାପ କରିଥିବା ପୁଟିନ୍ କହିବା ସହ ରାଜଧାନୀ କିଭ୍ ସମେତ ଅନ୍ୟ ୟୁକ୍ରେନୀୟ ସହରରେ ସୋମବାର ଘନଘନ ମିଶାଇଲ ମାଡ଼ ହୋଇଛି। ରୁଷିଆ ୮୪ କ୍ଷେପଣାସ୍ତ୍ର ଛାଡ଼ିଥିବାବେଳେ ଏଥିରେ ଅନୂ୍ୟନ ୧୧ ଜଣଙ୍କ ମୃତ୍ୟୁ ଘଟିଛି। ୬୦ରୁ ଊର୍ଦ୍ଧ୍ୱ ଆହତ ହୋଇ ଚିକିତ୍ସାଧୀନ ଅଛନ୍ତି। ପୁଟିନ୍ଙ୍କ ଏଭଳି ବର୍ବରତାକୁ ୟୁରୋପୀୟ ସଂଘ (ଇୟୁ) ସମେତ ନାଟୋ ରାଷ୍ଟ୍ରଗୁଡ଼ିକ ନିନ୍ଦା କରିଛନ୍ତି। ପୁଟିନ୍ ଜଣେ ଆତଙ୍କବାଦୀ ଏବଂ ସେ ମିଶାଇଲରେ କଥା କୁହନ୍ତି ବୋଲି ୟୁକ୍ରେନ୍ ବହିର୍ବ୍ୟାପାର ମନ୍ତ୍ରୀ ଡିମିଟ୍ରୋ କୁଲେବା କହିଛନ୍ତି। ସଦ୍ୟ ଘଟଣାବଳୀକୁ ନେଇ ଭାରତ ବେଶ୍ ଚିନ୍ତିତ। ଶତ୍ରୁତା ବୃଦ୍ଧି କାହା ସ୍ବାର୍ଥରେ ନାହିଁ। ବିବାଦ ବନ୍ଦ କରି ସମସ୍ତ ପକ୍ଷ କୂଟନୈତିକ ରାସ୍ତାକୁ ଫେରିବାକୁ ଭାରତ ଅନୁରୋଧ କରୁଛି ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଅରିନ୍ଦମ୍ ବାଗ୍ଚୀ କହିଛନ୍ତି।
ଗତ ଜୁନ୍ ୧୬ରେ ୟୁକ୍ରେନ୍ ରାଜଧାନୀ କିଭ୍ରେ ରୁଷିଆ ଶେଷଥର ପାଇଁ ଆକ୍ରମଣ କରିଥିଲା। କିଭ୍ରୁ ରୁଷୀୟ ସୈନ୍ୟଙ୍କୁ ୟୁକ୍ରେନ୍ ଘଉଡ଼ାଇବା ପରେ ରୁଷିଆ ପୂର୍ବ ୟୁକ୍ରେନ୍କୁ ଟାର୍ଗେଟ କରିଥିଲା। ତେବେ ସୋମବାର ରୁଷିଆ ପୁଣି କିଭ୍ରେ ଆକ୍ରମଣ କରିଛି। ୟୁକ୍ରେନ୍ର ଲଭିଭ୍, ଟର୍ନୋପିଲ୍, ଇଭାନୋ-ଫ୍ରାଙ୍କିଭ୍ସ୍କ, ଜିଟୋମିର୍, ନିପ୍ରୋ, ଖକିର୍ଭ, ନୋଟୋପ୍, ଓଡେଶା, କ୍ରେମେନ୍ଚୁଗ୍ ଆଦି ସହରରେ ମସ୍କୋ ମିଶାଇଲ ଛାଡ଼ିଛି। ଏହାର ଭିଡିଓ କେତେଜଣଙ୍କ ମୋବାଇଲରେ କଏଦ ହୋଇଥିବାବେଳେ ତାହା ସୋସିଆଲ ମିଡିଆରେ ଅପ୍ଲୋଡ୍ ହୋଇଛି। ୟୁକ୍ରେନ୍ର ଶକ୍ତି ଭିତ୍ତିଭୂମିକୁ ରୁଷିଆ ଟାର୍ଗେଟ କରିଛି। କେତେକ ସରକାରୀ କାର୍ଯ୍ୟାଳୟ, ପାର୍ଲାମେଣ୍ଟ, ଟେଲିକମ୍ୟୁନିକେଶନ ବିଲ୍ଡିଂ ଏବଂ ଅନ୍ୟ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ନିକଟରେ ମଧ୍ୟ ମିଶାଇଲ ପଡ଼ିଛି। ଅନେକ ଅଫିସ୍, ଘରଗୁଡ଼ିକ ଭାଙ୍ଗି ନଷ୍ଟ ହୋଇଛି। ୟୁକ୍ରେନ୍ ସଶସ୍ତ୍ର ବାହିନୀର ଜେନେରାଲ ଷ୍ଟାଫ୍ଙ୍କ ସୂଚନା ଅନୁସାରେ ରୁଷିଆ ୮୪ କ୍ଷେପଣାସ୍ତ୍ର ଛାଡ଼ିଥିଲା। ସେଥିମଧ୍ୟରୁ ୟୁକ୍ରେନ୍ ଏୟାର ଡିଫେନ୍ସ ସିଷ୍ଟମ୍ ୪୧ଟିକୁ ନଷ୍ଟ କରିଥିଲା। କେବଳ କିଭ୍ ସହରରେ ୫ଟି ମିଶାଇଲ ପଡ଼ିଥିବାବେଳେ ଖର୍କିଭରେ ୩ଟି କ୍ଷେପଣାସ୍ତ୍ର ମାଡ଼ ହୋଇଥିଲା।
