କଲମ୍ବୋ,୧୧।୨ : ଶ୍ରୀଲଙ୍କାରେ ଜାତିଗତ ସମସ୍ୟାର ସମାଧାନ ପାଇଁ ସେ ପ୍ରତିଶ୍ରୁତିବଦ୍ଧ ବୋଲି ଶ୍ରୀଲଙ୍କା ରାଷ୍ଟ୍ରପତି ରାନିଲ ବିକ୍ରମସିଂଘେ ଶନିବାର କହିଛନ୍ତି। ସଂଘର୍ଷ ପ୍ରଭାବିତ ଉତ୍ତର ଅଞ୍ଚଳର ବିକାଶରେ ତାମିଲ ଦେଶବାସୀଙ୍କ ଅଂଶଗ୍ରହଣର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଛନ୍ତି।
ଜାଫନାରେ ରାଜ୍ୟ ଅଧିକାରୀଙ୍କୁ ସମ୍ବୋଧିତ କରି ରାଷ୍ଟ୍ରପତି ବିକ୍ରମମସିଂଘେ ଆଶା ପ୍ରକାଶ କରିଛନ୍ତି ଯେ ଟ୍ରିନକୋମାଲିର ପୂର୍ବ ବନ୍ଦରର ବିକାଶରେ ଭାରତ ସହଯୋଗ କରିବ। ଅର୍ଥନୈତିକ ବିକାଶ କାର୍ଯ୍ୟକ୍ରମ ସହିତ ଆମକୁ ଉତ୍ତର ଅଞ୍ଚଳପାଇଁ ପ୍ରମୁଖ ବିକାଶ କାର୍ଯ୍ୟକ୍ରମ ଆରମ୍ଭ କରିବାକୁ ପଡିବ।
ଏହି ଯୁଦ୍ଧ ଉତ୍ତର ଅର୍ଥନୀତିକୁ ନଷ୍ଟ କରି ଦେଇଛି। ଯୁଦ୍ଧ ଶେଷ ହେବାର ୧୪ ବର୍ଷ ପରେ, ଯେଉଁ ବିକାଶ ଘଟିଛି ତାହା ପର୍ଯ୍ୟାପ୍ତ ନୁହେଁ। ୧୯୮୩ରୁ ୨୦୦୯ ପର୍ଯ୍ୟନ୍ତ ଶ୍ରୀଲଙ୍କା ଗୃହଯୁଦ୍ଧର ସମ୍ମୁଖୀନ ହୋଇଥିଲା।
ଲିବରେଶନ ଟାଇଗର୍ସ ଅଫ ତାମିଲ ଏଲାମ ନେତୃତ୍ୱରେ ଏକ ଦ୍ୱୀପ ଦେଶର ଉତ୍ତର ଏବଂ ପୂର୍ବ ପ୍ରଦେଶରେ ଏକ ପୃଥକ ତାମିଲ ମାତୃଭୂମି ପ୍ରତିଷ୍ଠା ପାଇଁ ଏକ ଅଭିଯାନ ହୋଇଥିଲା। କିନ୍ତୁ ଏହାର ସୁପ୍ରିମୋ ଭେଲୁପିଲ୍ଲାଇଙ୍କ ହତ୍ୟା ପରେ ୧୮ ମଇ ୨୦୦୯ ରେ ଏହା ଶେଷ ହୋଇଥିଲା। ତାମିଲ ଅଭିଯୋଗ କରିଛନ୍ତି ଯେ ଯୁଦ୍ଧର ଶେଷ ପର୍ଯ୍ୟାୟରେ ହଜାର ହଜାର ଲୋକଙ୍କୁ ହତ୍ୟା କରାଯାଇଥିଲା। ତେବେ ଶ୍ରୀଲଙ୍କା ସେନା ଏହି ଅଭିଯୋଗକୁ ଅସ୍ବୀକାର କରିଛି। ଜାତିସଂଘର ରିପୋର୍ଟ ଅନୁଯାୟୀ, ଗୃହଯୁଦ୍ଧର ଶେଷ ମାସରେ ଅତି କମରେ ୪୦ ହଜାର ତାମିଲ ନାଗରିକଙ୍କୁ ହତ୍ୟା କରାଯାଇଥିଲା।