କୋଲକାତା,୧୩।୬ : ପଶ୍ଚିମବଙ୍ଗ ଶକ୍ତି ମନ୍ତ୍ରୀ ଅରୁପ ବିଶ୍ୱାସ ମଙ୍ଗଳବାର କହିଛନ୍ତି ରାଜ୍ୟରେ ସମ୍ପ୍ରତି ବିଦ୍ୟୁତ କାଟ ଅଭାବ ଯୋଗୁ ନୁହେଁ ବରଂ ବଣ୍ଟନ ନେଟୱାର୍କରେ ସମସ୍ୟାକାରଣରୁ ହୋଇଛି। ଏହି ପ୍ରସଙ୍ଗରେ ସେ ବିରୋଧୀ ଦଳର ନେତା ସୁଭେନ୍ଦୁ ଅଧିକାରୀଙ୍କୁ କଡ଼ା ସମାଲୋଚନା କରିଛନ୍ତି।
ବାସ୍ତବରେ ଶୁଭେନ୍ଦୁ ସୋମବାର ଦଳର ବିଧାୟକଙ୍କ ସହ ବିଦ୍ୟୁତ ଭବନ ଯାଇଥିଲେ। ଏହି ସମୟରେ ସେ ଅଭିଯୋଗ କରିଥିଲେ, ରାଜ୍ୟ ସରକାର ଗତ କିଛି ଦିନ ମଧ୍ୟରେ ଶକ୍ତିର ଚାହିଦା ପୂରଣ କରିବାରେ ଅସମର୍ଥ ହୋଇ ଭାର ହ୍ରାସ କରି ଅଭାବକୁ ପରିଚାଳନା କରିଥିଲେ ଯାହା ଗ୍ରୀଷ୍ମ ମଧ୍ୟଭାଗରେ ଦୀର୍ଘ କାଟ ସୃଷ୍ଟି କରିଛି।
ଏହି ଅଭିଯୋଗର ଜବାବରେ ବିଶ୍ୱାସ କହିଛନ୍ତି, ଆମର ଚାହିଦାଠାରୁ ଅଧିକ ଶକ୍ତି ଅଛି, ତେଣୁ ସେଥି ପାଇଁ ବିଦ୍ୟୁତ୍ କାଟ ହୋଇ ନାହିଁ। ସମ୍ପ୍ରତି ଝଡ଼ ଏବଂ ପ୍ରାକୃତିକ ବିପର୍ଯ୍ୟୟ ଯୋଗୁ ବଣ୍ଟନ ନେଟୱାର୍କରେ କ୍ଷତି ଘଟିଛି, ଯାହା ବିଦ୍ୟୁତ ସରବରାହର ଯୋଗାଣରେ ସମସ୍ୟା ସୃଷ୍ଟି କରିବାର କାରଣ ହୋଇଛି, ଯାହା ଆମ ନିୟନ୍ତ୍ରଣ ବାହାରେ। ଝଡ଼ ଏବଂ ପ୍ରାକୃତିକ ବିପର୍ଯ୍ୟୟକୁ ରୋକିବା ଆମ ହାତରେ ନାହିଁିଁ। ଏହା ସହିତ କାଟର ଅନ୍ୟ ଏକ କାରଣ ହେଉଛି ଗ୍ରାହକଙ୍କ ଦ୍ୱାରା ଅସୀମିତ ଶକ୍ତି ବ୍ୟବହାର ।
ସେ କହିଛନ୍ତି ସବଷ୍ଟେଶନକୁ ସଂଯୋଗ କରୁଥିବା ଅନେକ ପାୱାର ଟାୱାର ଗୋଟିଏ ପରେ ଗୋଟିଏ ଝଡ଼ରେ ନଷ୍ଟ ହୋଇଯାଇଥିଲା। ଏହାକୁ ପୁନରୁଦ୍ଧାର ପାଇଁ ୨୪ ଘଣ୍ଟାରୁ ଅଧିକ ସମୟ ଲାଗିଥିଲା। ବିଶ୍ୱାସ କହିଛନ୍ତି ୨୦୧୧ ମସିହାରୁ ରାଜ୍ୟ ସରକାର ବିଦ୍ୟୁତକ୍ଷେତ୍ରରେ ୨୭,୦୦୦ କୋଟି ଟଙ୍କା ବିନିଯୋଗ କରିଛନ୍ତି। ଏହା ସହିତ ଉତ୍ପାଦନ, ପରିବହନ ଏବଂ ବିତରଣ କ୍ଷମତା ବିକାଶ କରିଛନ୍ତି।
୨୦୧୧ଠାରୁ ୧୨,୫୦ ମେଗାୱାଟ ନୂତନ କ୍ଷମତା ସୃଷ୍ଟି ହୋଇଛି ଏବଂ ପାଇପଲାଇନରେ ଅଧିକ ପ୍ରକଳ୍ପ ରହିଛି ଯେଉଁଥିରେ ତାପଜ, ସୌର ଏବଂ ଜଳ ବିଦ୍ୟୁତ କ୍ଷମତା ବୃଦ୍ଧି ହେବ। ବର୍ତ୍ତମାନର ଶକ୍ତି କ୍ଷମତାକୁ ୯,୫୨୧ ମେଗାୱାଟରୁ ୧୩,୬୮୯ ମେଗାୱାଟକୁ ବୃଦ୍ଧି କରିବାକୁ ବିନିଯୋଗ କରାଯାଉଛି। ବିରୋଧୀମାନେ ସରକାରଙ୍କୁ ତଥ୍ୟ ଏବଂ ଆକଳନ ସହ ସମାଲୋଚନା କରିବା ଉଚିତ। ବିନା ତଥ୍ୟ ଆଧାରରେ ଶୁଭେନ୍ଦୁ ଏଭଳି ଅଭିଯୋଗ ଆଣିବା ଯୁକ୍ତିଯୁକ୍ତ ନୁହେଁ ବୋଲି ସେ କହିଛନ୍ତି।