ବାଲିକୁଦା,୭ା୭(ତାପସ ସ୍ବାଇଁ): ଶ୍ରାବଣ ଆରମ୍ଭରୁ ରାଜ୍ୟରେ ପରିବା ଦର ଆକାଶଛୁଆଁ ହୋଇଛି। ବଜାରରେ କେବଳ ଆଳୁକୁ ଛାଡିଦେଲେ ସମସ୍ତ ପରିବା କିଲୋ ପ୍ରତି ୫୦ ଟଙ୍କାରୁ ଊର୍ଦ୍ଧ୍ୱରେ ପହଞ୍ଚ।ଏହା ଏବେ ଖାଉଟିଙ୍କ ପାଇଁ ମୁଣ୍ଡବିନ୍ଧାର କାରଣ ପାଲଟିଛି। ବୋଲବମ୍ ଭକ୍ତମାନେ ଏହି ମାସରେ ପାଣି ଢାଳିବାକୁ ଯାଉଥିବାରୁ ସେମାନଙ୍କ ଘରେ ଆମିଷ ବନ୍ଦ ହୋଇଯାଇଛି। ଏନେଇ ଲୋକେ ପରିବା ଉପରେ ଅଧିକ ନିର୍ଭରଶୀଳ ଥିବାବେଳେ ଏହାର ଦର ବଢ଼ି ଚାଲିଛି।
ବାଲିକୁଦା ବ୍ଲକର ୮୦ ଭାଗ ଲୋକ ଚାଷ ଉପରେ ନିର୍ଭରଶୀଳ। ଏହି ଅଞ୍ଚଳର ବୋରିକିନା, କୁନ୍ଦୁପୁର, ଦୋଭାଳ, ବାରିଲୋ, ନାରଦିଆ, କାଳିଓ, ଭୋଦା, ତଣ୍ଡାଉଣି, ନାଳିଓ, ଅଢଙ୍ଗା, ଖାଲେରୀ, ବେଲପୁର, ଶ୍ରୀବନ୍ତପୁର, ପୋଦରୁଆଁ, ପାଟଣା, ଈଶ୍ୱରପୁର, କୁଳିଆ ଗାଁ ଆଦି ଗ୍ରାମରେ ବିଭିନ୍ନ ପ୍ରକାର ପରିବା ଚାଷ ହୁଏ। ମାତ୍ର ଏସବୁକୁ ସଂରକ୍ଷିତ ରଖିବା ପାଇଁ ଶୀତଳ ଭଣ୍ଡାର ନାହଁ। ଏଥିଯୋଗୁ ପରିବା ଦର ଉପରେ ଅଙ୍କୁଶ ଲାଗିପାରିନାହିଁ ବୋଲି ବୁଦ୍ଧିଜୀବୀମାନେ କହିଛନ୍ତି। ବାଲିକୁଦା ବଜାରରେ ବାଇଗଣ, ଭେଣ୍ଡି, କୁନ୍ଦୁରୀ, ଜହ୍ନି ଆଦି କିଲୋ ପ୍ରତି ୬୦ ଟଙ୍କା ଦରରେ ବିକ୍ରି ହେଉଥିବା ବେଳ ଗାଜର, ପୋଟଳ, କାଙ୍କଡ଼ ଆଦି ୮୦ ଟଙ୍କା ଦରରେ ବିକ୍ରି ହେଉଛି। ସେହିପରି ପତ୍ରକୋବି, ଛଚିନ୍ଦ୍ରା ଦର କିଲୋ ପ୍ରତି ୫୦ ଟଙ୍କା ଥିବା ବେଳେ ଝୁଡ଼ଙ୍ଗ, ଶଜନା ଛୁଇଁ, ବିଲାତି ବାଇଗଣ ଆଦି ଦର ୧୨୦ ଟଙ୍କାକୁ ଛୁଇଁଛି। ଫୁଲ କୋବି ୧୦୦ ଟଙ୍କା ପାର ହୋଇଯାଇଛି। ଏଭଳିସ୍ଥିତିରେ ଖାଉଟି କ’ଣ କିଣିବେ ସେନେଇ ଚିନ୍ତାରେ ପଡ଼ିଛନ୍ତି। ଶୀତଳ ଭଣ୍ଡାର ଖୋଲିବା ସମ୍ପର୍କରେ ବିଡିଓ ଜିତେନ୍ଦ୍ର ନାୟକଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ମୋବାଇଲ ଫୋନ ଉଠାଇ ନ ଥିଲେ।