ଶ୍ରୀନଗର,୮।୧୧: ଜମ୍ମୁ-କଶ୍ମୀରରେ ଖରାପ ପାଗକୁ ଦୃଷ୍ଟିରେ ରଖି ୨ଟି ଜିଲାର ସ୍କୁଲକୁ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି। ଜମ୍ମୁ-କଶ୍ମୀରର ରାମବାନ ଏବଂ କିଶ୍ତଓ୍ବାଡା ଜିଲାରେ ବର୍ତ୍ତମାନ ପାଗ ଖରାପ ରହିଛି। ଫଳରେ ପ୍ରଶାସନ ପକ୍ଷରୁ ସମସ୍ତ ପ୍ରାଥମିକ ଓ ମଧ୍ୟମ ବିଦ୍ୟାଳୟକୁ ବନ୍ଦ ରଖାଯାଇଛି। ଅନ୍ୟପଟେ ଉଚ୍ଚ ବିଦ୍ୟାଳୟ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟ ଖୋଲା ରହିବ। ସୂଚନାଯୋଗ୍ୟ, ଗତ କିଛି ଦିନରୁ ପାହାଡିଆ ଅଞ୍ଚଳରେ ପ୍ରବଳ ବର୍ଷା ହେବା ସହ ଅନେକ ଅଞ୍ଚଳରେ ତୁଷାରପାତ ମଧ୍ୟ ହେଉଛି। କିଶ୍ତଓ୍ବାଡାର ଉପର ଅଞ୍ଚଳରେ ଓ ରାମବାନର ପାହାଡିଆ ଅଞ୍ଚଳରେ ତୁଷାରର ଏକ ଧଳା ଚାଦର ପଡ଼ିଥିବା ଦେଖିବାକୁ ମିଳିଛି। ଯେତେବେଳେ ଘାଟିରେ ଅଧିକ ତୁଷାରପାତ ହୋଇଥାଏ ସେତେବେଳେ ଏହି ଦୁଇଟି ଜିଲାରେ ତୁଷାରପାତ ଯୋଗୁ ଜୀବନଯାପନ ବାଧାପ୍ରାପ୍ତ ହୋଇଥାଏ। କେବଳ ଏତିକି ନୁହେଁ ଅନେକ ରାସ୍ତାଘାଟ ବନ୍ଦ ରହିବା ସହ କେତେକ ଅଞ୍ଚଳରେ ଭୂସ୍ଖଳନ ହେବାର ମଧ୍ୟ ଆଶଙ୍କା ରହିଥାଏ। ତେଣୁ ଜିଲା ପ୍ରଶାସନ ଛୋଟ ପିଲାମାନଙ୍କୁ ଆଶ୍ୱସ୍ତି ଦେଇ ସ୍କୁଲ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି।
