ନୂଆଦିଲ୍ଲୀ,୪।୧୧: ଦେଶର ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ଯୋଗୁ ରାଜ୍ୟର ସମସ୍ତ ପ୍ରାଇମେରୀ ସ୍କୁଲକୁ ବନ୍ଦ ରଖିବାକୁ ନିର୍ଦ୍ଦେଶ ଦିଆଇଛି। ନଭେମ୍ବର ୫ ଅର୍ଥାତ୍ ଶନିବାରଠାରୁ ଏହି ସ୍କୁଲ ବନ୍ଦ ରହିବ। ତେବେ ଏହି ସ୍କୁଲ କେତେ ଦିନ ଯାଏ ବନ୍ଦ ରହିବ ସେନେଇ କୌଣସି ସୂଚନା ମିଳିନାହିଁ। ପରିସ୍ଥିତିକୁ ଅନୁଧ୍ୟାନ କରିବା ପରେ କେବେ ସ୍କୁଲ ଖୋଲାଯିବ ସେନେଇ ବିଚାର କରାଯିବ ବୋଲି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଶୁକ୍ରବାର ଘୋଷଣା କରିଛନ୍ତି। ଏହା ପୂର୍ବରୁ ପ୍ରଦୂଷଣକୁ ନେଇ ଦିଲ୍ଲୀ ଶିଶୁ ଅଧିକାର ସୁରକ୍ଷା କମିଶନ ସ୍କୁଲ ବନ୍ଦ କରିବାକୁ ପରାମର୍ଶ ଦେଇଥିେଲେ। ଶୁକ୍ରବାର ଏନେଇ ଦିଲ୍ଲୀ ପରିବେଶ ମନ୍ତ୍ରୀ ଏକ ବୈଠକ ମଧ୍ୟ ଡକାଇଥିଲେ। ଉକ୍ତ ବୈଠକରେ ସମସ୍ତ ବିଷୟ ଉପରେ ଆଲୋଚନା କରାଯିବା ପରେ ଏହି ନିଷ୍ପତ୍ତି ନିଆଯାଇଛି। ତେବେ ଛାତ୍ରୀଛାତ୍ରଙ୍କ ପାଠପଢ଼ା ଯେପରି ପ୍ରଭାବିତ ନ ହୁଏ ସେଥିପାଇଁ ଅନ୍ଲାଇନ୍ କ୍ଲାସ୍ ଜାରି ରଖିବାକୁ ଦିଲ୍ଲୀ ସରକାର ନିର୍ଦ୍ଦେଶ ଦେଇଛନ୍ତି। ପ୍ରଥମରୁ ଅଷ୍ଟମ ଯାଏ ଅନ୍ଲାଇନ୍ କ୍ଲାସ ଜାରି ରହିବ। ଦିଲ୍ଲୀରେ ଶୁକ୍ରବାର ପ୍ରଦୂଷଣର ସ୍ତର ବହୁତ ଖରାପ୍ ସ୍ଥିତିରେ ପହଞ୍ଚିଛି। ସେଠାରେ ବାୟୁର ମାନ ଏକ୍ୟୁଆଇ ୪୭୨ ବୃଦ୍ଧି ପାଇଛି। ଯାହା ଅତ୍ୟନ୍ତ ଗମ୍ଭୀର ବୋଲି କୁହାଯାଉଛି। ତେଣୁ ପିଲାମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ରାଜଧାନୀର ବିଦ୍ୟାଳୟଗୁଡ଼ିକରେ ଅଡ-ଇଭିନ୍ ଲାଗୁ କରାଯିବ ବୋଲି ଆଶା କରାଯାଉଛି। ଏହା ଦ୍ୱାରା କେବଳ ୫୦ପ୍ରତିଶତ ଛାତ୍ରୀଛାତ୍ର କ୍ଲାସରେ ଶାରୀରିକ ଭାବେ ଉପସ୍ଥିତ ରହିବେ ଏବଂ ଅନ୍ୟ ଛାତ୍ରୀଛାତ୍ର ୩ଦିନ ଯାଏ ଘରେ ରହିବେ ବୋଲି ସୂଚନା ରହିଛି।