କାନପୁର,୧୨।୧୦: କଶ୍ମୀର ପ୍ରସଙ୍ଗରେ ନେହେରୁଙ୍କୁ ଟାର୍ଗେଟ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇତିହାସ ଉପରେ ପୁଣିଥରେ ପରଦା ଢାଙ୍କିବାକୁ ଉଦ୍ୟମ କରିଛନ୍ତି। ବାସ୍ତବ କଥା କ’ଣ ତାହା ଦେଶବାସୀଙ୍କୁ ଭଲ ଭାବେ ଜଣା ବୋଲି ମଙ୍ଗଳବାର କଂଗ୍ରେସ କହିଛି।
ଗୁଜରାଟ ଗସ୍ତରେ ଥିବା ପ୍ରଧାନମନ୍ତ୍ରୀ ମୋଦି ସୋମବାର ଆଣନ୍ଦରେ ଏକ ସଭାକୁ ସମ୍ବୋଧିତ କରି ପୂର୍ବତନ ପ୍ରଧାନମନ୍ତ୍ରୀ ଜବାହର ଲାଲ ନେହେରୁଙ୍କୁ ପରୋକ୍ଷରେ ସମାଲୋଚନା କରିଥିଲେ। ମୋଦି କହିଥିଲେ, ପୂର୍ବତନ ସ୍ବରାଷ୍ଟ୍ର ମନ୍ତ୍ରୀ ସର୍ଦ୍ଦାର ବଲ୍ଲଭ ଭାଇ ପଟେଲ ଛୋଟ ଛୋଟ ରାଜ୍ୟଗୁଡ଼ିକୁ ମିଶ୍ରଣ କରି ସମସ୍ୟାର ସମାଧାନ କରିଥିବାବେଳେ ଜଣେ ବ୍ୟକ୍ତି କଶ୍ମୀର ପ୍ରସଙ୍ଗର ଅଡ଼ୁଆ ଛିଣ୍ଡାଇ ପାରି ନ ଥିଲେ। ଏହାର ଜବାବରେ କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି, ପ୍ରଧାନମନ୍ତ୍ରୀ ପୁନର୍ବାର ବାସ୍ତବ ଇତିହାସକୁ ଘୋଡ଼ାଇ ଦେବା ପାଇଁ ଉଦ୍ୟମ କରିଛନ୍ତି। ଜମ୍ମୁ-କଶ୍ମୀରକୁ ନେଇ ନେହେରୁଙ୍କ ଉଦ୍ୟମ ସମ୍ପର୍କରେ ପଟେଲଙ୍କ ଜୀବନୀରେ ଉଲ୍ଲେଖ ରହିଛି। ଏ କଥା ମୋଦିଙ୍କ ନୂଆ କଶ୍ମୀରଦୂତଙ୍କୁ ମଧ୍ୟ ଜଣା। ନେହେରୁଙ୍କ ସହ ସମ୍ପର୍କକୁ ସମ୍ମାନ ଦେଇ ଶେଖ୍ ଅବଦୁଲ୍ଲା ଭାରତ ସହ କଶ୍ମୀରର ମିଶ୍ରଣ କରାଇଥିଲେ। ୧୯୪୭ ସେପ୍ଟେମ୍ବର ୧୩ ପର୍ଯ୍ୟନ୍ତ ପାକିସ୍ତାନ ସହ ଜମ୍ମୁ-କଶ୍ମୀର ମିଶିବା ନେଇ ପଟେଲଙ୍କ ଆପତ୍ତି ନ ଥିଲା ବୋଲି ଜୟରାମ ରମେଶ କହିଛନ୍ତି।